અમદાવાદ: જાહેરમાં દારૂ પીવો યુવકને ભારે પડ્યો

ગુજરાતમાં દારૂબંધીનો કડક કાયદો અમલમાં હોવા છતાં અમદાવાદના વાસણા વિસ્તારમાંથી કાયદાના ડર વગરનો એક કિસ્સો પ્રકાશમાં આવ્યો છે. જાહેર માર્ગ પર બેસીને દેશી દારૂની મહેફિલ જમાવનાર અને હોબાળો મચાવનાર એક યુવકને પોલીસે કાયદાનું ભાન કરાવ્યું છે.

જાહેર રસ્તા પર જ બેસી ગયો દારૂ પીવા : 

વાસણા વિસ્તારમાં એક યુવકે જાહેરમાં જ દેશી દારૂ પીવાનું શરૂ કર્યું હતું. નશાની હાલતમાં આ શખસે ત્યાંથી પસાર થતા રાહદારીઓ અને વાહનચાલકો સાથે ગેરવર્તન કર્યું હતું. કોઈ પણ પ્રકારના ખચકાટ વગર જાહેર રોડ પર બેઠક જમાવીને તેણે કાયદાની મજાક ઉડાવી હતી, જેના કારણે આસપાસના લોકોમાં રોષ જોવા મળ્યો હતો.

વીડિયો વાઈરલ થતા પોલીસ એક્શનમાં : 

આ શરમજનક ઘટના સમયે ત્યાંથી પસાર થતા જાગૃત નાગરિકોએ પોતાના મોબાઈલ ફોનમાં આ દ્રશ્યો કેદ કરી લીધા હતા. સોશિયલ મીડિયા પર આ વીડિયો વાઈરલ થતા જ લોકોએ પોલીસની કામગીરી સામે સવાલો ઉઠાવ્યા હતા. મામલો ગરમાતા વાસણા પોલીસ તાત્કાલિક હરકતમાં આવી હતી.

પોલીસે ગણતરીના કલાકોમાં કરી ધરપકડ : 

સોશિયલ મીડિયા પર વાઈરલ થયેલા વીડિયો અને સ્થાનિક બાતમીદારોની મદદથી પોલીસે આરોપીનું લોકેશન ટ્રેસ કર્યું હતું. પોલીસે તાત્કાલિક સ્થળ પર પહોંચી નશામાં ધૂત હાલતમાં આ શખસની અટકાયત કરી હતી. હાલમાં પોલીસે આ આરોપી વિરુદ્ધ પ્રોહિબિશન એક્ટ હેઠળ ગુનો નોંધીને આગળની કાયદેસરની કાર્યવાહી હાથ ધરી છે.