પાર્સલમાંથી 52 લાખનો હાઈબ્રિડ ગાંજો ઝડપાયો

અમદાવાદ શહેર ક્રાઈમ બ્રાન્ચના SOG એ એક મોટી સફળતા મેળવી છે. શુક્રવારે લંડનથી આવેલા પાર્સલમાંથી અંદાજે રૂપિયા 52.58 લાખની કિંમતનો 525 ગ્રામ હાઈડ્રોપોનિક ગાંજો ઝડપી પાડવામાં આવ્યો છે. આ ડ્રગ્સ ચોકલેટ અને બિસ્કિટના પેકેટમાં છુપાવીને મોકલવામાં આવ્યું હતું. SOG અધિકારીઓએ ગુપ્ત માહિતીના આધારે આ કાર્યવાહી કરી હતી.

વિદેશી પાર્સલમાંથી મળ્યો ગાંજો

અધિકારીઓના જણાવ્યા મુજબ, પોલીસે અમદાવાદના શાહીબાગ વિસ્તારમાં આવેલી ફોરેન પોસ્ટ ઓફિસના પહેલા માળેથી આ ગાંજો જપ્ત કર્યો હતો. SOGની ટીમે એરપોર્ટ સેક્શન ઓફિસમાં કુલ 6 પાર્સલની તપાસ કરી હતી, જેમાં આ માદક દ્રવ્યો મળી આવ્યા હતા. પોલીસે આ મામલે NDPS એક્ટની સંબંધિત કલમો હેઠળ ડિટેક્શન ઓફ ક્રાઈમ બ્રાન્ચ (DCB) પોલીસ સ્ટેશનમાં કેસ નોંધ્યો છે. આંતરરાષ્ટ્રીય સ્તરે ચાલતા આ ડ્રગ્સ રેકેટનો પર્દાફાશ કરવા માટે પોલીસ દ્વારા ઊંડાણપૂર્વક તપાસ ચાલી રહી છે.

આ પણ વાંચો: Ahmedabad આંતરરાષ્ટ્રીય એરપોર્ટ: ડ્રગ્સ અને દાણચોરીનું કેન્દ્ર?

આંતરરાષ્ટ્રીય રેકેટની તપાસ શરૂ

SOG અધિકારીઓએ જણાવ્યું કે, આ પાર્સલ લંડનથી મોકલવામાં આવ્યા હતા. હજુ સુધી પાર્સલ મોકલનાર અને જેને આ ગાંજો મળવાનો હતો તે વ્યક્તિની ઓળખ થઈ નથી. પોલીસ આ શિપમેન્ટ પાછળના આંતરરાષ્ટ્રીય નેટવર્કને શોધવા અને અમદાવાદમાં ડ્રગ્સની હેરાફેરી માટે જવાબદાર લોકોની ઓળખ કરવા માટે વધુ તપાસ કરી રહી છે.