ડાયમંડ સિટી સુરતમાં ધુળેટીના પર્વની ઉજવણી વચ્ચે કતારગામ વિસ્તારમાં અસામાજિક તત્વોએ માજા મૂકી છે. કતારગામના બાપાસીતારામ ચોક નજીક રૂક્ષ્મણી સોસાયટી પાસે પરિવાર સાથે જઈ રહેલા લોકો પર લુખ્ખાતત્વોએ જીવલેણ હુમલો કરતા સમગ્ર વિસ્તારમાં સનસનાટી મચી ગઈ છે.
આ હુમલામાં મહિલાઓ અને બચાવવા આવેલા યુવકો સહિત કુલ 12 જેટલા લોકોને ગંભીર ઇજાઓ પહોંચી છે.
ગંદા પાણીની કોથળીઓ ફેંકી વિવાદ છેડ્યો
મળતી માહિતી મુજબ, ધુળેટીના દિવસે એક પરિવાર પોતાની ગાડીમાં સવાર થઈને પસાર થઈ રહ્યો હતો. તે દરમિયાન રૂક્ષ્મણી સોસાયટી પાસે ઉભેલા કેટલાક માથાભારે તત્વોએ ગાડી પર ગંદા પાણીની કોથળીઓ ફેંકી હતી.
જ્યારે પરિવારે આ ગંદકીનો વિરોધ કર્યો, ત્યારે લુખ્ખાતત્વોએ દાદાગીરી કરી રસ્તા વચ્ચે ગાડી અટકાવી દીધી હતી અને ગાડીની ચાવી પણ કાઢી લીધી હતી.
કડા અને દંડાથી ઢોર માર માર્યો
મામલો બિચકતા લુખ્ખાતત્વોએ અભદ્ર ગાળો આપી પરિવાર પર હુમલો કરી દીધો હતો. હુમલાખોરોએ હાથમાં પહેરેલા ભારે કડા અને લાકડાના ફટકાઓથી પરિવારના સભ્યોને બેરહેમ રીતે ફટકાર્યા હતા.
આતંક એટલો હતો કે મહિલાઓના કપડાં ફાડી નાખવામાં આવ્યા હતા અને જે લોકો બચાવવા માટે વચ્ચે પડ્યા તેમને પણ લુખ્ખાતત્વોએ છોડ્યા નહોતા.
આ હિચકારી ઘટના નજીકમાં લાગેલા CCTV કેમેરામાં કેદ થઈ ગઈ છે, જેમાં હુમલાખોરોનો આતંક સ્પષ્ટ દેખાઈ રહ્યો છે. તમામ 12 ઇજાગ્રસ્તોને તાત્કાલિક સારવાર માટે સ્મીમેર હોસ્પિટલ ખસેડવામાં આવ્યા છે.
ઘટનાની ગંભીરતા જોઈ પોલીસનો કાફલો હોસ્પિટલ અને ઘટના સ્થળે દોડી ગયો હતો. પોલીસે CCTV ફૂટેજના આધારે હુમલાખોરોની ઓળખ કરવાની અને તેમને કાયદાનું ભાન કરાવવાની તજવીજ હાથ ધરી છે.

કતારગામમાં લુખ્ખાતત્વોનો કેર

સુરતના બાપાસીતારામ ચોક પાસે લુખ્ખાતત્વોએ પરિવારને કડા-દંડાથી ઢોર માર માર્યો

March 5, 2026 | 12:47 IST