સ્થાનિક સ્વરાજની સંસ્થાઓની ચૂંટણીમાં હવે 5085 ઉમેદવારો મેદાનમાં

સ્થાનિક સ્વરાજની સંસ્થાઓની ચૂંટણી અંતર્ગત આગામી 16 ફેબ્રુઆરીના રોજ મતદાન થશે. મનપા, નગરપાલિકા, તાલુકા પંચાયત અને જિલ્લા પંચાયતના કુલ 696 વોર્ડની 2178 બેઠકો માટે 5085 ઉમેદવારો મેદાનમાં રહ્યા છે. ઉલ્લેખનીય છે કે, 696 વોર્ડની 2178 બેઠકો માટે 7036 ફોર્મ ભરાયા હતા. તે પૈકી 1261 ફોર્મ રદ થયા હતા અને 478 ફોર્મ પરત ખેંચાયા હતા. જ્યારે 212 ઉમેદવારો બિનહરીફ ચૂંટાતા હવે 5085 ઉમેદવારો મેદાનમાં રહ્યા છે.

જૂનાગઢ મહાનગરપાલિકાની 15 વોર્ડની 60 બેઠક માટે 157 ઉમેદવારો મેદાનમાં રહ્યા છે. જ્યારે 66 નગરપાલિકાની સામાન્ય ચૂંટણીમાં 461 વોર્ડની 1844 બેઠક માટે 4374 ઉમેદવારો વચ્ચે જંગ ખેલાશે. બે નગરપાલિકાની મધ્યસત્ર ચૂંટણી માટેના 18 વોર્ડની 72 બેઠકો માટે 101 ઉમેદવારો રહ્યા છે. આ ઉપરાંત ખાલી પડેલી નગરપાલિકાની 21 બેઠકોની પેટા ચૂંટણીમાં 45 ઉમેદવારો, ખાલી પડેલી તાલુકા પંચાયતની 91 બેઠકોની પેટા ચૂંટણીમાં 191 ઉમેદવારો અને જિલ્લા પંચાયતની 9 બેઠકો માટે 22 ઉમેદવારો વચ્ચે ચૂંટણી જંગ ખેલાશે. ગાંધીનગર, કપવંજ અને કઠલાલ તાલુકા પંચાયતની સામાન્ય ચૂંટણીમાં 78 બેઠકો માટે 178 ઉમેદવારો મેદાનમાં રહ્યા છે.