ફિલ્મ અને ટેલિવિઝન જગતના પીઢ અભિનેતા સતીશ શાહનું 74 વર્ષની વયે કિડની ફેલ થવાના કારણે 25 ઓક્ટોબર, 2025ના રોજ નિધન થયું છે. તેમના નિધનથી સમગ્ર ઈન્ડસ્ટ્રીમાં શોકનું મોજું ફરી વળ્યું છે. અભિનેતા તેમના પત્ની મધુ શાહને મૂકીને ગયા છે. આજે, 26 ઓક્ટોબરે 'સારાભાઈ vs સારાભાઈ' ફેમ સતીશ શાહના અંતિમ સંસ્કાર યોજાયા હતા, જેમાં હિન્દી ફિલ્મ જગતથી લઈને જાણીતા ટીવી કલાકારો સહિત અનેક હસ્તીઓએ તેમને અંતિમ શ્રદ્ધાંજલિ આપી હતી.
રૂપાલી ગાંગુલી ભાવુક થઈ ગયા
સતીશ શાહના અંતિમ સંસ્કાર દરમિયાન સૌથી ભાવુક દ્રશ્ય તેમની ઓન-સ્ક્રીન પુત્રવધૂ રૂપાલી ગાંગુલીનું જોવા મળ્યું હતું. 'સારાભાઈ VS સારાભાઈ'માં રૂપાલી ગાંગુલી એ સતીશ શાહની પુત્રવધૂનો રોલ કર્યો હતો. અંતિમ સંસ્કારનો એક વીડિયો અને કેટલાક ફોટા ઓનલાઈન સામે આવ્યા છે, જેમાં રૂપાલી ગાંગુલી તેમના સહ-કલાકારને અંતિમ વિદાય આપતી વખતે ભાવુક થઈને રડતી જોવા મળી હતી. આ દ્રશ્યોએ ચાહકોને પણ દુઃખી કર્યા છે.
આ પણ વાંચો: <a href="https://www.benefitnews24.com/gujarati/entertainment/comedy-king-sarabhai-fame-actor-satish-shah-passes-away/21337" target="_blank" rel="noopener">કોમેડી કિંગ 'સારાભાઈ' ફેમ એક્ટર સતીશ શાહનું નિધન</a>
અંતિમ સંસ્કારમાં કલાકારોની હાજરી
સતીશ શાહના અંતિમ સંસ્કારમાં તેમના 'સારાભાઈ vs સારાભાઈ'ના સહ-કલાકારો મોટી સંખ્યામાં હાજર રહ્યા હતા. રૂપાલી ગાંગુલી ઉપરાંત, સુમીત રાઘવન, રત્ના પાઠક શાહ અને રાજેશ કુમાર પણ તેમના ઓન-સ્ક્રીન પિતાને અંતિમ વિદાય આપવા પહોંચ્યા હતા. બોલિવૂડમાંથી જેકી શ્રોફ, નીલ નીતિન મુકેશ, ડેવિડ ધવન, નસીરુદ્દીન શાહ, સુપ્રિયા પાઠક, પંકજ કપૂર સહિતના સેલેબ્સ પણ અંતિમ સંસ્કારમાં હાજર રહ્યા હતા.
પિતા ગુમાવ્યા જેવું લાગે છે : રાજેશ કુમાર
ટીવી જગતમાંથી 'તારક મહેતા કા ઉલ્ટા ચશ્મા'ના અભિનેતા દિલીપ જોશી, કોમેડિયન અલી અસગર, નિર્માતા જેડી મજેઠિયા, દેવેન ભોજાણી સહિતના અન્ય કલાકારોએ પણ સતીશ શાહને શ્રદ્ધાંજલિ અર્પણ કરી હતી. 'સારાભાઈ vs સારાભાઈ'માં સતીશ શાહના ઓન-સ્ક્રીન પુત્ર રોશન સારાભાઈનો રોલ કરનાર રાજેશ કુમારે તેમના નિધન પર શોક અને દુઃખ વ્યક્ત કર્યું હતું. રાજેશ કુમારે મીડિયા સાથેની વાતચીતમાં કહ્યું, 'હું હજુ પણ એ વાત પચાવી શકતો નથી કે, સતીશજી હવે રહ્યા નથી. હું માત્ર એટલું જ કહી શકું છું કે મને મારા પિતા ગુમાવ્યા જેવું લાગે છે. તેઓ જીવન અને રમૂજથી ભરપૂર વ્યક્તિ હતા. એક અભિનેતા તરીકે તેમણે પોતાનું નામ બનાવ્યું અને પોતાની છાપ છોડી. આ ઇન્ડસ્ટ્રી માટે આ એક મોટું નુકસાન છે."

રૂપાલી ગાંગુલી ભાવુક થઈ, સુમીત રાઘવન, રત્ના પાઠક શાહ અને રાજેશ કુમારે શ્રદ્ધાંજલિ આપી

October 26, 2025 | 15:48 IST