અમદાવાદના સરખેજ વિસ્તારમાંથી એક સનસનાટીભર્યો ઘટના સામે આવી છે, જ્યાં નરીમનપુરા કેનાલમાંથી મંગળવારે સાંજે એક 15 વર્ષીય સગીરાનો મૃતદેહ મળી આવ્યો હતો. આ ઘટનાથી સમગ્ર વિસ્તારમાં ચકચાર મચી ગઈ છે. સ્થાનિક લોકોએ સૌપ્રથમ કેનાલમાં મૃતદેહ જોઈને તાત્કાલિક સરખેજ પોલીસને જાણ કરી હતી. પોલીસ અધિકારીઓએ ઘટનાસ્થળે પહોંચીને તપાસ હાથ ધરી હતી અને મૃતકની ઓળખ માટે સગીરાની માતાને બોલાવવામાં આવી હતી.
મૃતકના ગળા અને ચહેરા પર ઈજાના નિશાન
માતાએ પુષ્ટિ કરી હતી કે, મૃતદેહ તેમની ગુમ થયેલી પુત્રીનો છે, જે લગભગ 2 મહિના પહેલાં ઘરેથી ગાયબ થઈ ગઈ હતી. પ્રાથમિક તપાસમાં મૃતકના ગળા અને ચહેરા પર ગંભીર ઈજાના નિશાન જોવા મળ્યા હતા, જેના આધારે પોલીસ અનુમાન લગાવી રહી છે કે, કેનાલમાં મૃતદેહ ફેંકતા પહેલાં સગીરાનું ગળું દબાવીને હત્યા કરવામાં આવી હોઈ શકે છે.
આ પણ વાંચો:<a href="https://www.benefitnews24.com/gujarati/gujarat/mother-kills-2-year-old-twins-then-commits-suicide-by-jumping-off-building/20803" target="_blank" rel="noopener"> </a><a href="https://www.benefitnews24.com/gujarati/gujarat/mother-kills-2-year-old-twins-then-commits-suicide-by-jumping-off-building/20803" target="_blank" rel="noopener">માતાએ જોડિયા બાળકોની હત્યા કરીને આત્યહત્યા કરી</a>
પ્રેમસંબંધ અને હત્યાનો આરોપ
સરખેજ પોલીસે જણાવ્યું હતું કે, મૃતક સગીરા અજય ઠાકોર નામના રિક્ષાચાલક સાથે પ્રેમસંબંધમાં હતી. લગભગ 2 મહિના પહેલા સગીરા પોતાનું બર્થ સર્ટિફિકેટ અને અન્ય દસ્તાવેજો લઈને ઘરે કોઈને જાણ કર્યા વિના નીકળી ગઈ હતી અને ત્યારથી તે મુખ્ય આરોપી અજય ઠાકોર સાથે રહેતી હતી. મૃતદેહ મળી આવ્યા બાદ સગીરાની માતાએ તાત્કાલિક અજય ઠાકોર વિરુદ્ધ ફરિયાદ દાખલ કરાવી છે અને તેના પર હત્યાનો ગંભીર આરોપ મૂક્યો છે. પોલીસે મૃતદેહને પોસ્ટમોર્ટમ અને ફોરેન્સિક તપાસ માટે મોકલી આપ્યો છે, જેના રિપોર્ટથી મૃત્યુનું નક્કર કારણ અને હત્યાના સમય વિશે વધુ માહિતી પ્રાપ્ત થશે. હાલમાં, સરખેજ પોલીસે મુખ્ય આરોપી અજય ઠાકોરને પકડવા માટે સઘન શોધખોળ શરૂ કરી છે.
મુખ્ય આરોપી ફરાર
પોલીસ અધિકારીઓએ પુષ્ટિ કરી છે કે, ગુનામાં મદદ કરી હોવાની શંકાના આધારે અજય ઠાકોરના એક મિત્રની અટકાયત કરવામાં આવી છે અને તેની પૂછપરછ ચાલુ છે. જોકે, મુખ્ય આરોપી અજય ઠાકોર હજુ પણ ફરાર છે. એક પોલીસ અધિકારીએ જણાવ્યું હતું કે, 'અમે અજય ઠાકોરને પકડવા માટે વિવિધ ટીમો બનાવીને શોધખોળ શરૂ કરી દીધી છે. આ મામલો પ્રેમસંબંધના કરૂણ અંજામનો હોવાથી અમે ઝડપી કાર્યવાહી કરી રહ્યા છીએ.'

મૃતદેહ કેનાલમાંથી મળ્યો

અમદાવાદ કેનાલમાંથી 15 વર્ષીય સગીરાનો મૃતદેહ મળ્યો, પોલીસે હત્યાની આશંકા વ્યક્ત કરી

October 15, 2025 | 21:06 IST