ગોવા અગ્નિકાંડના આરોપીને ગોવા લઈ ગયા

ગોવા સ્થિત બર્ચ બાય રોમિયો લેન નાઈટક્લબમાં 6 ડિસેમ્બરના રોજ લાગેલી ભીષણ આગની ઘટનામાં 25 લોકોના મોત થયા હતા, જેના મામલે મોટો અપડેટ સામે આવ્યો છે. આ દુર્ઘટનાના આરોપી અને નાઈટક્લબના માલિક ગૌરવ લૂથરા અને સૌરભ લૂથરાને ગોવા પોલીસ હવે ગોવા લઈ જઈ રહી છે. 

થાઈલેન્ડથી ડિપોર્ટ કરીને ભારત લાવ્યા

બન્ને ભાઈઓને થાઈલેન્ડથી ડિપોર્ટ કરીને ભારત લાવવામાં આવ્યા હતા, જ્યાં દિલ્હી એરપોર્ટ પરથી તેમની ધરપકડ કરવામાં આવી હતી અને કોર્ટે ગોવા પોલીસને 2 દિવસની ટ્રાન્ઝિટ રિમાન્ડ આપી દીધી છે. ઉત્તર ગોવાના અરપોરામાં આવેલા બર્ચ બાય રોમિયો લેન નાઈટક્લબમાં આગ લાગ્યા પછી ફરાર થઈ ગયેલા નાઈટક્લબના માલિકો, સૌરભ લૂથરા અને ગૌરવ લૂથરાને મંગળવારે બપોરે લગભગ અઢી વાગ્યે IGI એરપોર્ટ પરથી ધરપકડ કરવામાં આવી હતી.

મેડિકલ બાદ ગોવા પોલીસ રિમાન્ડ પર લઈ ગઈ

દ્વારકા સ્થિત ઈન્દિરા ગાંધી સુપર સ્પેશિયાલિટી હોસ્પિટલમાં મેડિકલ પરીક્ષણ અને ત્યારબાદ પટિયાલા હાઉસ કોર્ટમાં રજૂ કર્યા પછી ટ્રાન્ઝિટ રિમાન્ડ મેળવીને ગોવા પોલીસ બંને ભાઈઓને પોતાની સાથે ગોવા લઈ ગઈ છે. ગોવામાં કોર્ટમાં રજૂ કરીને તેમને વધુ પૂછપરછ માટે રિમાન્ડ પર લેવામાં આવશે. ગોવાના ડીજીપી આલોક કુમારે તેમની ધરપકડની પુષ્ટિ કરી છે. લૂથરા બ્રધર્સ પર આરોપ છે કે 6 ડિસેમ્બરની રાત્રે ગોવા સ્થિત નાઈટક્લબમાં આગ લાગવાથી 25 લોકોના મોત થયા હતા અને અનેક લોકો ગંભીર રીતે ઘાયલ થયા હતા.

આ પણ વાંચો: લુથરા બ્રથર્સ થાઇલેન્ડથી ડિપોર્ટ, આજે થશે ધરપકડ

ફ્લાઈટમાં થાઈલેન્ડના ફુકેટ માટે ઉડાન ભરી

જ્યારે પોલીસ અને ફાયર વિભાગ આગ બુઝાવવામાં અને ફસાયેલા લોકોને બચાવવામાં વ્યસ્ત હતા, ત્યારે લૂથરા ભાઈઓએ એક કલાકની અંદર થાઈલેન્ડ ભાગવા માટેની ટિકિટ બુક કરાવી લીધી હતી. બન્ને ક્લબના કર્મચારીઓ સાથે રાતોરાત કાર દ્વારા મુંબઈ ભાગી ગયા હતા અને ત્યાંથી સવારે 5.30 વાગ્યાની ઇન્ડિગો એરલાઈન્સની ફ્લાઈટમાં થાઈલેન્ડના ફુકેટ માટે ઉડાન ભરી હતી.

ઈન્ટરપોલ દ્વારા લુક આઉટ સર્ક્યુલર અને બ્લુ કોર્નર નોટિસ

ઘટનાની જાણ થતાં જ ગોવા પોલીસે તાત્કાલિક કાર્યવાહી કરી હતી. 7 ડિસેમ્બરે, લૂથરા ભાઈઓ સૌરભ લૂથરા અને ગૌરવ લૂથરાની સાથે અજય ગુપ્તા અને સુરેન્દ્ર કુમાર ખોસલા વિરુદ્ધ ઇન્ટરપોલ દ્વારા લુક આઉટ સર્ક્યુલર નોટિસ જારી કરવામાં આવી હતી. મુંબઈ ઇમિગ્રેશન પાસેથી માહિતી મળી કે લૂથરા ભાઈઓ થોડા કલાકો પહેલા જ થાઈલેન્ડ ભાગી ચૂક્યા છે. આના પછી 8 ડિસેમ્બરે તેમને ભારત લાવવા માટે બ્લુ કોર્નર નોટિસ જારી કરવામાં આવી હતી.

લૂથરા ભાઈઓ સિવાય 6 લોકોની ધરપકડ

ભારતીય સુરક્ષા એજન્સીના અનુરોધ પર થાઈલેન્ડ પોલીસે 11 ડિસેમ્બરે બન્ને ભાઈઓને કસ્ટડીમાં લીધા અને આઈબીને જાણ કરી. ત્યારબાદ તેમને ભારત લાવવાની કાયદાકીય પ્રક્રિયા શરૂ કરવામાં આવી. લૂથરા ભાઈઓએ પોતાના વકીલ દ્વારા રોહિણી કોર્ટમાં આગોતરા જામીન માટે અરજી દાખલ કરી હતી, પરંતુ ગોવા પોલીસના જવાબ પર તેમની અરજી રદ્દ કરી દેવામાં આવી હતી. આ મામલામાં ગોવા પોલીસે લૂથરા ભાઈઓ સિવાય અત્યાર સુધીમાં અન્ય 6 લોકોની ધરપકડ કરી છે.