પાંચમા માળેથી નીચે પટકાઈ બાળકીનું મોત, પછી માતા પર કેમ ગઈ પોલીસની શંકાની સોય?

Rajkot Mother Throws Toddler From Building: રાજકોટના કુવાડવા રોડ વિસ્તારની એક સોસાયટીમાં સવા બે વર્ષની બાળકીના શંકાસ્પદ મોતના કેસમાં ચોંકાવનારો વળાંક આવ્યો છે. 12 ઓક્ટોબરની સાંજે પાંચમા માળેથી નીચે પટકાતાં 2 વર્ષ અને 4 મહિનાની બાળકીનું ઘટનાસ્થળે જ મોત થયું હતું. શરૂઆતમાં બાળકી અકસ્માતે પડી કે કોઈએ તેને નીચે ફેંકી તે અંગે શંકા વ્યક્ત થઈ હતી. જોકે, બી-ડિવિઝન પોલીસની તપાસ દરમિયાન બાળકીની માતા પર શંકા મજબૂત બની હતી. પોલીસના જણાવ્યા મુજબ, આકરી પૂછપરછ દરમિયાન માતાએ પોતે જ બાળકીને નીચે ફેંકી દીધી હોવાની કબૂલાત આપી છે.

ચાર ફૂટની દીવાલથી પોલીસને શંકા
પોલીસના જણાવ્યા અનુસાર, ઘટના 12 ઓક્ટોબરે સાંજે આશરે 7 વાગ્યે બની હતી. બાળકી જ્યાંથી નીચે પડી હતી ત્યાં લગભગ ચાર ફૂટ ઊંચી દીવાલ હતી. આટલી નાની બાળકી જાતે દીવાલ પર ચડી શકે કે નહીં તે અંગે પરિવારજનોએ શંકા વ્યક્ત કરી હતી. ત્યારબાદ બી-ડિવિઝન પોલીસની ટીમ ઘટનાસ્થળે પહોંચી અને તપાસ શરૂ કરી હતી. પોલીસે માતા, પરિવારજનો અને પાડોશીઓ સહિત આશરે 15 લોકોની પૂછપરછ કરી હતી. બાળકીના મૃતદેહને પંચનામા બાદ ફોરેન્સિક પોસ્ટમોર્ટમ માટે સિવિલ હોસ્પિટલ ખસેડવામાં આવ્યો હતો.

માતાએ પોલીસને શું કહ્યું હતું?
14 ઓક્ટોબરે મીડિયાને આપેલા નિવેદનમાં મહિલાએ જણાવ્યું હતું કે તે બાથરૂમમાં હતી ત્યારે બાળકીએ “મમ્મી” કહીને બૂમ પાડી હોય તેવો અવાજ સંભળાયો હતો. ત્યારબાદ તે અલગ-અલગ માળે બાળકીને શોધવા ગઈ હતી. પછી પાંચમા માળે લોકો બાળક નીચે પડ્યું હોવાની વાત કરતા હતા અને નીચે પહોંચતાં પોતાની પુત્રીને જોઈ હોવાનો તેણે દાવો કર્યો હતો. જોકે, પોલીસના જણાવ્યા મુજબ, મહિલાના નિવેદન અને અન્ય વિગતોની તપાસ દરમિયાન શંકા ઊભી થઈ હતી. સોસાયટીના CCTV કેમેરા પણ તપાસવામાં આવ્યા હતા, પરંતુ તેમાં રેકોર્ડિંગ ઉપલબ્ધ નહોતું. અંતે પૂછપરછ દરમિયાન માતાએ જ બાળકીને નીચે ફેંકી દીધી હોવાની કબૂલાત આપી હોવાનું જણાવ્યું હતું.

પારિવારિક વિવાદની પણ તપાસ
પોલીસના જણાવ્યા મુજબ, પતિ સાથેના ઝઘડાને કારણે મહિલા માવતરના ઘરે રહેતી હતી. પ્રેમસંબંધ અને બાળકી પ્રત્યે અણગમાને કારણે આ કૃત્ય કર્યું હોવાની કબૂલાત તેણે આપી હોવાનું પોલીસનું કહેવું છે. 

ફરિયાદ નોંધવાની કાર્યવાહી શરૂ
પોલીસના જણાવ્યા મુજબ, બાળકીના પિતાને ફરિયાદી બનાવવા માટેની કાર્યવાહી ચાલી રહી છે. પોલીસ હવે કબૂલાત સહિતના ઉપલબ્ધ પુરાવાઓના આધારે આગળની કાનૂની કાર્યવાહી કરશે. રાજકોટના આ બાળકીના મોતના કેસમાં તપાસના પરિણામો અને સત્તાવાર કાર્યવાહી પર હવે સૌની નજર છે.