વિદ્યાર્થિની પર ક્લાસમેટે કર્યું દુષ્કર્મ

પશ્ચિમ બંગાળમાં મહિલા સુરક્ષાના મુદ્દે સતત ચિંતા પ્રવર્તી રહી છે, ત્યારે 23 વર્ષીય મેડિકલ વિદ્યાર્થિની પર દુર્ગાપુરમાં થયેલા કથિત દુષ્કર્મના આક્રોશ વચ્ચે જ કોલકત્તામાંથી વધુ એક ગંભીર ઘટના સામે આવી છે. કોલકત્તાના આનંદપુર વિસ્તારમાં બીજા વર્ષમાં અભ્યાસ કરતી એક એન્જિનિયરિંગની વિદ્યાર્થિની પર તેના ક્લાસમેટે કથિત રીતે દુષ્કર્મ ગુજાર્યો હતો. પોલીસ રિપોર્ટ્સ અનુસાર, આરોપીએ પીડિતાના ભાડાના ફ્લેટ પર તેના પીણામાં ડ્રગ્સ ભેળવ્યું હતું, જેના કારણે વિદ્યાર્થિની બેભાન થઈ ગઈ હતી. 

આરોપીને 22 ઓક્ટોબર સુધી પોલીસ કસ્ટડીમાં

એકવાર તે બેભાન થઈ ગયા પછી આરોપીએ તેની પર દુષ્કર્મ ગુજાર્યો હતો. પીડિતા, જે મૂળ અન્ય રાજ્યની છે, તેણે બાદમાં આનંદપુર પોલીસ સ્ટેશનમાં આ અંગે ફરિયાદ નોંધાવી હતી. આ ઘટના બાદ મુખ્ય આરોપી છુપાઈ ગયો હતો, પરંતુ ઘરે પરત ફરતાં જ તેની ધરપકડ કરવામાં આવી હતી. કોર્ટના આદેશ બાદ આરોપીને 22 ઓક્ટોબર સુધી પોલીસ કસ્ટડીમાં મોકલી દેવામાં આવ્યો છે. આ તબક્કે અધિકારીઓએ આ કેસની અન્ય કોઈ વધારાની વિગતો જાહેર કરી નથી, પરંતુ તપાસ શરૂ કરી દેવામાં આવી છે.

આ પણ વાંચો: મેડિકલ કેમ્પસમાં દુષ્કર્મ કરનાર 3ને દબોચ્યા

દુર્ગાપુર મેડિકલ વિદ્યાર્થીની દુષ્કર્મ કેસમાં નવો વળાંક

દુર્ગાપુરમાં મેડિકલ વિદ્યાર્થિની પર થયેલા દુષ્કર્મ કેસમાં પણ નવી માહિતી સામે આવી છે. તપાસ અધિકારીઓએ CCTV ફૂટેજ અને મેડિકલ રિપોર્ટ્સની ઝીણવટભરી ચકાસણી કર્યા બાદ ગેંગરેપની શક્યતાને નકારી કાઢી છે. પોલીસ કમિશનર સુનીલ કુમાર ચૌધરીએ જણાવ્યું કે, પુરાવા માત્ર એક જ શંકાસ્પદ વ્યક્તિની સંડોવણી સૂચવે છે, જે પીડિતાનો પુરુષ ક્લાસમેટ છે અને જેની પહેલેથી જ ધરપકડ કરવામાં આવી ચૂકી છે. CCTV ફૂટેજમાં 10 ઓક્ટોબરની રાત્રે વિદ્યાર્થિની અને તેનો ક્લાસમેટ એકસાથે કેમ્પસ છોડતા અને ફરીથી પ્રવેશતા જોવા મળ્યા હતા, જે અગાઉના અનેક હુમલાખોરોના આક્ષેપોથી વિપરીત છે. જોકે, અન્ય 5 આરોપીઓ પોલીસ કસ્ટડીમાં છે અને તેમની વિરુદ્ધની તપાસ આગળ વધી રહી છે.