પશ્ચિમ બંગાળના દુર્ગાપુરમાં એક ખાનગી મેડિકલ કોલેજના હોસ્પિટલ પરિસરમાં જ એક મેડિકલ વિદ્યાર્થિની પર ગેંગરેપની સનસનાટીભરી ઘટના સામે આવી છે. પોલીસે આ કેસમાં ત્રણ આરોપીઓની ધરપકડ કરી છે, જ્યારે અન્ય બે આરોપીઓ હજી ફરાર છે. આ ઘટનાએ રાજ્યમાં મહિલાઓની સુરક્ષા પર ફરી એકવાર ગંભીર સવાલો ઉભા કર્યા છે.
હોસ્પિટલ બિલ્ડિંગની પાછળ દુષ્કર્મની ઘટના
આ ઘટના દુર્ગાપુરના શોભાપુર નજીક આવેલી એક ખાનગી મેડિકલ કોલેજની છે, જ્યાં MBBSના બીજા વર્ષમાં અભ્યાસ કરતી વિદ્યાર્થિની શુક્રવારે મોડી સાંજે તેના એક પુરુષ મિત્ર સાથે કેમ્પસની બહાર નીકળી હતી. સૂત્રોના જણાવ્યા અનુસાર, કેમ્પસ ગેટ નજીક એક વ્યક્તિએ કથિત રીતે તેને ખેંચીને હોસ્પિટલ બિલ્ડિંગની પાછળના એકાંત સ્થળે લઈ જઈને તેની પર બળાત્કાર ગુજાર્યો હતો. પીડિતા મૂળ ઓડિશાના જાલેશ્વરની રહેવાસી છે.
પોલીસને જાણ થતાં જ તાત્કાલિક ઘટનાસ્થળે દોડી ગઈ હતી અને તપાસ શરૂ કરી હતી. વિદ્યાર્થિનીને મેડિકલ તપાસ માટે હોસ્પિટલમાં દાખલ કરવામાં આવી છે અને હાલ તે ડૉક્ટરી દેખરેખ હેઠળ છે. પોલીસે આરોપીઓને ઝડપી પાડવા માટે CCTV ફૂટેજની તપાસ હાથ ધરી છે અને કેમ્પસના સ્ટાફ સભ્યો તેમજ પીડિતાના મિત્રની પણ પૂછપરછ કરી રહી છે.
2024ના RG કર કેસ જેવો મામલો
આ ગંભીર ગુનાથી પશ્ચિમ બંગાળમાં 2024માં થયેલી RG કર મેડિકલ કોલેજની દુર્ઘટનાની યાદ તાજી થઈ છે, જ્યાં એક જુનિયર ડૉક્ટર પર બળાત્કાર અને હત્યા કરવામાં આવી હતી. વેસ્ટ બંગાળ ડૉક્ટર્સ ફ્રન્ટ (WBDF)એ આ ગુનાની નિંદા કરી છે અને તેને શૈક્ષણિક સંસ્થાઓમાં પણ મહિલાઓ અસુરક્ષિત હોવાની "ચિંતાજનક યાદ અપાવનાર" ઘટના ગણાવી છે. WBDF એ ન્યાયિક તપાસ માટે ભારતના મુખ્ય ન્યાયાધીશને આ મામલે સંજ્ઞાન લેવા વિનંતી કરી છે.
ઓડિશાના મુખ્યમંત્રીનો યોગ્ય પગલાં લેવા આગ્રહ
ઓડિશાના મુખ્યમંત્રી મોહન ચરણ માંઝીએ આ ઘટના પર ઊંડો આક્રોશ વ્યક્ત કર્યો છે. તેમણે&nbsp;X પર પોસ્ટ કરીને પશ્ચિમ બંગાળ સરકારનો સંપર્ક કરવા અને પીડિતાના પરિવારને તમામ સંભવિત મદદ પૂરી પાડવા અધિકારીઓને સૂચના આપી હતી. તેમણે બંગાળના મુખ્યમંત્રી મમતા બેનર્જીને આરોપીઓ સામે "દાખલારૂપ પગલાં" લેવા વિનંતી કરી હતી.
દરમિયાન, ભાજપે TMC સરકાર પર કાયદો અને વ્યવસ્થા જાળવવામાં નિષ્ફળ રહેવાનો આરોપ લગાવીને રાજકીય પ્રહારો કર્યા છે. જોકે, TMC નેતા અને મંત્રી શશી પાંજાએ ભાજપ પર સંવેદનશીલ મુદ્દાનું રાજકારણ કરવાનો આરોપ લગાવીને વળતો પ્રહાર કર્યો છે. હાલમાં પોલીસ ફરાર બે આરોપીઓને ઝડપી પાડવા માટે સઘન પ્રયાસો કરી રહી છે.
&nbsp;

દુર્ગાપુર મેડિકલ કેમ્પસમાં દુષ્કર્મ કરનાર 3ને દબોચ્યા

કોલેજ પરિસરમાં વિદ્યાર્થિની પર બળાત્કાર બાદ પોલીસ એક્શનમાં, 3ને ઝડપ્યા - 2 હજુ ફરાર

October 12, 2025 | 15:29 IST