નજીવી બાબતે ઝઘડો અને હત્યા: સરખેજમાં ચકચારી ઘટના
અમદાવાદ શહેરના સરખેજ પોલીસ સ્ટેશન વિસ્તાર હેઠળના ફતેવાડીમાં, રોનક પાનપાર્લર ચાર રસ્તાની સામે રવિવારે (7મી ડિસેમ્બર) રાત્રે એક ચકચારી હત્યાની ઘટના બની હતી. મૃતક યુવક જાવેદ અને આરોપી શાહરૂખ ઉર્ફે લીકેજ વચ્ચે સિગારેટ માંગવા જેવી નજીવી બાબતે માથાકૂટ થઈ હતી. આ ઝઘડો ઉગ્ર બનતા, શાહરૂખે આવેશમાં આવીને જાવેદને સાથળના ભાગે ચપ્પુનો ઘા મારી દીધો હતો. ઊંડા ઘાને કારણે વધુ પડતું લોહી વહી જતાં જાવેદનું તાત્કાલિક નજીકની હોસ્પિટલમાં લઈ જવામાં આવ્યું હતું, જ્યાં ડોક્ટરોએ તેને મૃત જાહેર કર્યો હતો.
હત્યારો ડ્રગ્સ માફિયા: અનેક ગુનાઓમાં સંડોવાયેલો
મૃતકના સાળા વસીમે આરોપી શાહરૂખ ઉર્ફે લીકેજ પર ગંભીર આક્ષેપો મૂક્યા છે. તેમના જણાવ્યાનુસાર, શાહરૂખ એમડી (MD) ડ્રગ્સનો ધંધો કરે છે. તે દારૂના નશામાં હતો અને સિગારેટ માંગવાના બહાને લોકોને હેરાન કરતો હતો. શાહરૂખ પર અગાઉ પોલીસકર્મીઓ પર હુમલો કરવા, લોકોને એસિડ મારવા સહિતના ઘણા ગંભીર ગુનાઓ નોંધાયેલા છે.
<video style="display: table; margin-left: auto; margin-right: auto;" poster="" controls="controls" width="400" height="300">
<source src="https://ibp-benefits.s3.ap-south-1.amazonaws.com/prod/news/uploads/videos/1765175530326_WhatsApp_Video_2025-12-08_at_11.40.02_AM.mp4.mp4" type="video/mp4"></video>
પીડિત પરિવારની સરકાર અને પોલીસ સમક્ષ માગ : 
પીડિત પરિવારે સરકાર અને પોલીસ સમક્ષ સખત માંગણી કરી છે કે ડ્રગ્સ માફિયા અને આવા ગંભીર ગુના કરનાર આરોપીઓને કડકમાં કડક સજા મળવી જોઈએ. તેમની માગ છે કે આવા ગુનેગારોના ગેરકાયદે બાંધકામો તોડી પાડવા જોઈએ અને તેમને એવી સજા થવી જોઈએ કે તેઓ ફરીથી જેલમાંથી બહાર ન આવી શકે. પરિવારનું કહેવું છે કે જે ગુનેગાર એક-બે ગુના કરીને પણ સુધરતો નથી, તે દેશ અને સમાજ માટે જોખમરૂપ છે, તેથી તેને ત્રીજો ગુનો કરવાનો મોકો ન મળવો જોઈએ.
હાલમાં, સરખેજ પોલીસે હત્યાના આરોપી શાહરૂખ ઉર્ફે 'લીકેજ'ને પકડી પાડવા માટેની કાર્યવાહી શરૂ કરી દીધી છે અને આ મામલે મર્ડરનો ગુનો દાખલ કરવાની પ્રક્રિયા ચાલી રહી છે.

ફતેવાડીમાં સિગારેટની બાબતે ઝઘડો, યુવકની હત્યા કરી

December 8, 2025 | 17:40 IST