અમદાવાદ ગ્રામ્ય SOGનું મેગા ઓપરેશન

 ઉત્તરાયણ પર્વ પહેલા ગુજરાતમાં પ્રતિબંધિત ચાઈનીઝ દોરી (માંજા)ના વેચાણ અને ઉત્પાદનને રોકવા માટે અમદાવાદ ગ્રામ્ય SOGએ મોટી કાર્યવાહી હાથ ધરી છે. SOGની ટીમે દાદરા નગર હવેલીમાં આવેલી વંદના પ્રાઈવેટ લિમિટેડ નામની ફેક્ટરી પર દરોડા પાડીને કરોડો રૂપિયાની કિંમતની પ્રતિબંધિત ચાઈનીઝ દોરી જપ્ત કરી છે. આ ઓપરેશનમાં કુલ 2.34 કરોડ રૂપિયાનો મુદ્દામાલ જપ્ત કરવામાં આવ્યો છે, જેમાં દોરીના રીલ્સ, મશીનરી અને કાચા માલનો સમાવેશ થાય છે.

કેવી રીતે પહોંચી SOG ફેક્ટરી સુધી?

દર વર્ષે ઉત્તરાયણ પહેલા ગુજરાતમાં ચાઈનીઝ દોરીને કારણે અનેક અકસ્માતો થાય છે, જેમાં વાહનચાલકોના ગળા કપાઈ જવાના કિસ્સા સામાન્ય છે. આને રોકવા માટે અમદાવાદ ગ્રામ્ય SOGએ વેચાણકર્તાઓ, સપ્લાયર્સ અને ઉત્પાદકો પર ફોકસ કરીને તપાસ શરૂ કરી હતી. સાણંદમાં ચાઈનીઝ દોરીનો જથ્થો ઝડપાયા બાદ તપાસ આગળ વધી અને દાદરા નગર હવેલીમાં આવેલી ફેક્ટરી સુધી પહોંચી. આ ફેક્ટરીમાં ગુજરાતમાં પ્રતિબંધિત સિન્થેટિક દોરીનું બેધડક ઉત્પાદન થતું હતું.

SOGએ સ્થાનિક પોલીસની મદદથી ફેક્ટરીને સીલ કરી અને 43,192  ચાઇનીઝ દોરીની 
રીલ નંગ જપ્ત કર્યા, જેની કિંમત આશરે 1.5 કરોડ રૂપિયા છે. વધુમાં, દોરી બનાવવાની મશીનરી અને કાચા માલની કિંમત 50 લાખ રૂપિયા છે, જે કુલ મુદ્દામાલને 2 કરોડથી વધુ બનાવે છે. ફેક્ટરીના માલિક વિરેનકુમાર બાબુભાઈ પટેલ (મૂળ વાપીના રહેવાસી) વિરુદ્ધ ગુનો નોંધાયો છે અને તેમને ઝડપી પાડવા તપાસ ચાલુ છે.

અન્ય સ્થળોએ પણ દરોડા અને ધરપકડ

આ ઓપરેશનના ભાગરૂપે અમદાવાદ ગ્રામ્ય વિસ્તારમાં અનેક સ્થળોએ દરોડા પાડવામાં આવ્યા:

• સાણંદ: રણમલ ગઢ ગામમાં અમરતભાઈ રબારીના ફાર્મ હાઉસમાંથી 1,872 રીલ (કિંમત ₹7.48 લાખ) જપ્ત. ધરપકડ: ભીખાભાઈ શાંતિલાલ રાણા, રાજુભાઈ રાણા, અશોકભાઈ મુળજીભાઈ ઠાકોર, ભરતભાઈ ભોગીલાલ ગાંગવાણી.
• બાવળા: ગણેશ કોટન પ્રેસિંગ ફેક્ટરીમાંથી 3,864 ફીરકી (કિંમત ₹12.91 લાખ) જપ્ત. ધરપકડ: સમીરશા સુલ્તાનશા ફકીર.
• કોઠ: વટામણ ચોકડી પાસે આઈશર ગાડીમાંથી 2,400 ફીરકી (કિંમત ₹9.6 લાખ) જપ્ત. ધરપકડ: ઈર્ફાન હુસૈનભાઈ બ્લોચ, સમીર યુસુફ પરમાર.
• આણંદ: 672 ફીરકી (કિંમત ₹2.01 લાખ) જપ્ત. ધરપકડ: રસીદશા ભુરીયા મહેબુબશા દદવાન.

આ તમામ જગ્યાઓ પરથી કુલ 52,000થી વધુ ફીરકી જપ્ત કરાઈ છે, જેની કુલ કિંમત ₹1.82 કરોડ છે. વધુમાં, વાહનો, મોબાઈલ અને અન્ય મુદ્દામાલની કિંમત ₹52.5 લાખ છે. દાદરા નગર હવેલી, સાણંદ, બાવળા, કોઠ અને આણંદ પોલીસ સ્ટેશનમાં અલગ-અલગ ગુના નોંધાયા છે.

પ્રતિબંધિત દોરીનું જોખમ અને પોલીસની તપાસ

ચાઈનીઝ દોરી સિન્થેટિક મટિરિયલથી બનેલી હોય છે અને તે બાયો-ડિગ્રેડેબલ નથી, જેને કારણે તે પર પ્રતિબંધ છે. તે વાહનચાલકો, પક્ષીઓ અને અન્યને ઈજા પહોંચાડે છે. SOGના પોલીસ ઈન્સ્પેક્ટર એસ.એન. રામાણીના માર્ગદર્શન હેઠળ આ ઓપરેશન કરવામાં આવ્યું છે. અમદાવાદ રેન્જના IG વિધિ ચૌધરી અને SP ઓમ પ્રકાશ જાટે આને સફળતા ગણાવી છે.

આ કાર્યવાહીથી ચાઈનીઝ દોરીના સમગ્ર નેટવર્કનો પર્દાફાશ થયો છે અને ઉત્તરાયણને સુરક્ષિત બનાવવા તરફ મોટું પગલું છે. વધુ તપાસ ચાલુ છે અને અન્ય આરોપીઓને ઝડપી પાડવા પ્રયાસો કરવામાં આવી રહ્યા છે.