અમદાવાદમાં ફેક કોલ સેન્ટરનો પર્દાફાશ, સસ્તી લોન સેટલમેન્ટની લાલચ આપી અમેરિકનોને ફસાવ્યા

Naroda Police Ahmedabad Call Center Raid: અમદાવાદના નરોડા હંસપુરામાં અમેરિકન નાગરિકોને લોન સેટલમેન્ટના નામે કથિત છેતરપિંડી કરતું ફેક કોલ સેન્ટર ઝડપાયું છે. નરોડા પોલીસે સાહિત્ય આર્કેડના પ્રથમ માળે આવેલી દુકાનમાં દરોડો પાડી બે યુવતી સહિત સાત આરોપીઓની ધરપકડ કરી છે. પોલીસ તપાસ મુજબ આરોપીઓ અમેરિકન નાગરિકોના બેન્કિંગ સંબંધિત ડેટાનો ઉપયોગ કરીને બેન્કના વકીલ અથવા કાનૂની સલાહકાર હોવાની ખોટી ઓળખ આપતા હતા અને સસ્તામાં લોન સેટલમેન્ટ કરાવવાની ઓફર કરતા હતા.

હંસપુરામાં દુકાનમાંથી ચાલતું હતું ફેક કોલ સેન્ટર
નરોડા પોલીસને મળેલી બાતમીના આધારે હંસપુરા સ્થિત સાહિત્ય આર્કેડની દુકાનમાં દરોડો પાડવામાં આવ્યો હતો. પોલીસના જણાવ્યા મુજબ સ્થળ પર ચાર ટેબલ ગોઠવાયેલા હતા અને બે યુવતી સહિત સાત લોકો લેપટોપ પર કામ કરતા મળી આવ્યા હતા. તપાસ દરમિયાન આરોપીઓ એક વેબસાઇટમાં લોગિન કરીને કામગીરી કરતા હોવાનું સામે આવ્યું હતું. પોલીસે સ્થળ પરથી સાત લેપટોપ, આઠ મોબાઈલ ફોન સહિત આશરે રૂ.2.60 લાખનો મુદ્દામાલ કબજે કર્યો છે. પોલીસ હવે આ કોલ સેન્ટરમાં ઉપયોગમાં લેવાતા ડિજિટલ સાધનો અને ડેટાના સ્ત્રોતની તપાસ કરી રહી છે.

અમેરિકન નાગરિકોને બેન્કના વકીલ બની લોન સેટલમેન્ટની ઓફર
પોલીસ તપાસ મુજબ મુખ્ય આરોપી જીગેશ ઝાલાહર પાસે અમેરિકન નાગરિકોના ઈમેલ અને બેન્કિંગ સંબંધિત ડેટા હતો. આ ડેટાના આધારે બેન્કના વકીલ હોવાની ઓળખ આપીને સસ્તામાં લોન સેટલમેન્ટ કરાવવાની ઓફર સાથે સ્ક્રિપ્ટેડ ઈમેલ મોકલવામાં આવતા હતા. કોઈ વ્યક્તિ ઈમેલનો જવાબ આપે ત્યારે તેની સાથે આગળની વાતચીત કરવામાં આવતી હતી. ત્યારબાદ લોન સેટલમેન્ટની પ્રક્રિયાના બહાને ક્રેડિટ કાર્ડની વિગતો મેળવવામાં આવતી હોવાનો પોલીસનો આરોપ છે. આ વિગતો વોટ્સએપ અને ટેલિગ્રામ મારફતે પેમેન્ટ હેન્ડલર્સ સુધી પહોંચાડવામાં આવતી હોવાનું તપાસમાં સામે આવ્યું છે.

10 લાખ લોકોને મેસેજ, 200થી વધુ લોકો ભોગ બન્યાનો પોલીસનો દાવો
ઝોન-4 DCP અતુલ બંસલના જણાવ્યા મુજબ આ કોલ સેન્ટર છેલ્લા પાંચથી છ મહિનાથી કાર્યરત હતું. પોલીસ તપાસમાં આશરે 10 લાખ લોકોને બલ્ક મેસેજ મોકલવામાં આવ્યા હોવાનો અંદાજ છે. પોલીસના જણાવ્યા મુજબ અત્યાર સુધીમાં 200થી વધુ લોકો કથિત રીતે આ છેતરપિંડીનો ભોગ બન્યા છે અને આશરે રૂ.38 લાખની છેતરપિંડી થઈ હોવાની આશંકા છે. તપાસ આગળ વધતાં ભોગ બનેલા લોકો અને કથિત નાણાકીય નુકસાનના આંકડામાં ફેરફાર થઈ શકે છે.

Bitcoin અને આંગડિયા મારફતે પૈસાની હેરફેરની તપાસ
પોલીસ મુજબ કથિત છેતરપિંડીથી મેળવેલી રકમનો એક હિસ્સો બિટકોઈન મારફતે મેળવવામાં આવતો હતો. ત્યારબાદ ક્રિપ્ટોકરન્સીને ભારતીય ચલણમાં રૂપાંતરિત કરીને આંગડિયા અથવા હવાલા મારફતે રકમ મેળવવામાં આવતી હોવાની તપાસમાં વિગતો સામે આવી છે. પોલીસે ટેલિગ્રામ ગ્રુપ, ક્રિપ્ટો વોલેટ અને નાણાકીય વ્યવહારોની તપાસ શરૂ કરી છે. આ નેટવર્કમાં અન્ય લોકો સંડોવાયેલા છે કે કેમ અને અમેરિકન નાગરિકોનો ડેટા ક્યાંથી મેળવવામાં આવ્યો હતો તે પણ તપાસનો મહત્વનો ભાગ છે.

નરોડા ફેક કોલ સેન્ટર કેસમાં 7 આરોપીની ધરપકડ
પોલીસે જીગેશ ઝાલાહર, દેવાંગ સપકાલ, સુશીલ તોમર, દેવ વૈષ્ણવ, ઇમ્તીહેન ચાર્મ્યાડ, પ્રીતિ પટેલ અને વૈશાલી વેધાનીની ધરપકડ કરી છે. પોલીસના જણાવ્યા મુજબ જીગેશ અગાઉ કોલ સેન્ટરમાં કામ કરી ચૂક્યો હતો અને બાદમાં અન્ય યુવક-યુવતીઓને માસિક પગાર પર રાખીને આ કામગીરી શરૂ કરી હતી. હવે પોલીસ ડેટા કોણે પૂરો પાડ્યો, ક્રિપ્ટો વોલેટ અને ટેલિગ્રામ ગ્રુપ સાથે કોણ જોડાયેલું છે તથા આ કથિત ફેક કોલ સેન્ટર નેટવર્કમાં અન્ય કોઈ વ્યક્તિની સંડોવણી છે કે કેમ તેની તપાસ કરી રહી છે.