જાહેરમાં થૂંકનારા કે કચરો ફેંકનારાનો ફોટો અપલોડ કરો અને વાઉચર મેળવો

રસ્તા પર થૂંકવુ કે કચરો ફેંકવો તે આપણે ત્યાં ટેવ તરીકે માનવામાં આવે છે. લોકો બિન્ધાસ્ત કોઇની પણ પરવા કર્યા વગર રસ્તા પર ચાલુ વાહનમાંથી પણ થૂંકે છે . એવું અનેકવાર જોવા મળે છે કે ચાલુ વાહનમાંથી કોઇ વ્યક્તિ થુંક્યું હોય અને પાછળ આવી રહેલા વાહન ચાલક ના કપડા બગડ્યા હોય. જાહેરમાં ગંદકી કરવા એ પણ હવે આપણી દિનચર્ચાનો એક ભાગ છે. જાહેરમાં સ્વચ્છતા રાખવી આપણા સંસ્કારમાં જ નથી. જો કે આજના બાળકો જાહેરમાં કચરો ના ફેંકવા કે જાહેરમાં ગંદકી ના કરવા વડીલોને સલાહ આપતા જ હોય છે અને ક્યારેક વડીલોને ટોકે પણ છે. સરકારના સ્વચ્છ ભારતના પ્રયાસમાં નાગરીકોનો જો સપોર્ટ ના મળે તો પછી સ્વચ્છતા રાખવાના સરકારના પ્રયાસો પણ નિષ્ફળ જાય છે. જો કે અમદાવાદ મહાનગરપાલિકાએ હવે એક નવતર પ્રયોગ કર્યો છે અને તે મુજબ રસ્તામાં કચરો ફેંકનારા કે ચાલુ વાહનમાંથી થૂંકનારા વ્યક્તિનો કોઇ પણ વ્યક્તિ ફોટો ખેંચીને અમદાવાદ કોર્પોરેશનની અમદાવાદ કેમ નામની એપ્લીકેશનમાં અપલોડ કરી શકશે. ચાલુ વાહનમાંથી થુંકનારા વાહન ચાલકને વાહનના નંબરના આધારે વાહન ચાલકના ઘેર નોટીસ મોકલી દંડ વસુલશે. સ્વચ્છતા જાળવવામાં લોકોની ભાગીદારી વધે તે માટે આ પ્રયાસ કરાયો છે. 

લોકોને પણ પ્રોત્સાહન મળે તે માટે અમદાવાદ કોર્પોરેશને ફોટો અપલોડ કરનારા લોકોને પ્રોત્સાહનરુપે જાણીતી બ્રાન્ડના ગીફ્ટ વાઉચર અપાશે. જો કે આ એપ્લિકેશન હાલ અંતિમ તબક્કામાં છે અને સંભવત એપ્રીલ મહિનામાં કોર્પોરેશન આ એપ્લીકેશન લોંચ કરી દેશે.

આ એપ્લીકેશનમાં ક્યાંય ટ્રાફિકજામ થયો હોય કે પછી યોગ્ય રીતે પાર્કીંગ ના થયું હોય, કોઇ દુકાનવાળા દ્વારા ગંદકી કરાતી હોય કે પછી રોંગ સાઇડમાં આવતા વાહનો અને ગંદકી તથા કચરો ફેંકવા સહિત લોકો જ્યાંથી પણ ફોટો લેશે તેમાં જીઓ ટેગિંગથી ઓટોમેટિક જ લોકેશન આવશે. જેથી લોકોએ અલગથી એડ્રેસ આપવાની જરૂર રહેશે નહીં. દંડની રકમ માટે આરટીઓને પણ આ અભિયાનમાં જોડાશે. જેથી નિયમોનો ભંગ કરનારા વાહન માલિકોના ઘરે નોટિસ મોકલી શકાશે.