ગુજરાતમાં મહિલા સુરક્ષા સામે ફરી એકવાર મોટો પ્રશ્નચિહ્ન ઉભો થયો છે. જે પોલીસ પર મહિલાઓની સુરક્ષાની જવાબદારી છે, તે જ વિભાગની એક મહિલા કર્મચારી હવસખોરનો શિકાર બની હોવાની ચોંકાવનારી ઘટના ભાવનગરમાં સામે આવી છે.
સોશિયલ મીડિયાના માધ્યમથી મિત્રતા કેળવી એક યુવકે મહિલા પોલીસકર્મીને ધાક-ધમકી આપી અનેકવાર દુષ્કર્મ આચર્યું હોવાની ફરિયાદ નોંધાતા સમગ્ર રાજ્યમાં હડકંપ મચી ગયો છે.
મળતી વિગતો અનુસાર, સિહોરના રહેવાસી આરોપીનો પીડિત મહિલા પોલીસકર્મી સાથે સોશિયલ મીડિયા દ્વારા સંપર્ક થયો હતો. શરૂઆતમાં બંને વચ્ચે સામાન્ય મિત્રતા હતી, પરંતુ ત્યારબાદ આરોપીએ મહિલાની મજબૂરી કે અંગત વિગતોનો ગેરફાયદો ઉઠાવી તેને ડરાવવાનું શરૂ કર્યું હતું. આરોપીએ પીડિતાને ગંભીર પરિણામો ભોગવવાની અને બદનામ કરવાની ધમકી આપી બળજબરીથી શારીરિક સંબંધો બાંધ્યા હતા.
આ મામલે 20 જાન્યુઆરીની મોડી રાત્રે ભાવનગરના ગંગાજળિયા પોલીસ સ્ટેશનમાં ફરિયાદ નોંધાઈ છે. ઘટનાની ગંભીરતાને જોતા જિલ્લા પોલીસ વડાએ તપાસના આદેશ આપ્યા છે અને DySP આર.આર. સિંઘલને આ કેસની તપાસ સોંપવામાં આવી છે.
હાલ પોલીસ આરોપીની શોધખોળ માટે અલગ-અલગ ટીમો બનાવીને ચક્રો ગતિમાન કર્યા છે. એક રક્ષક જ જ્યારે ભક્ષકનો શિકાર બને છે ત્યારે સમાજમાં સુરક્ષાને લઈ ગંભીર ચર્ચાઓ જાગી છે.

લેડી પોલીસ પર દુષ્કર્મ

સિહોરના યુવકે સોશિયલ મીડિયા પર મિત્રતા કરી ધમકી આપી લેડી પોલીસ પર દુષ્કર્મ; તપાસ તેજ.

January 21, 2026 | 16:55 IST