GPSCના ‘અવસર’ મોડ્યૂલથી મળશે રોજગારીની તક?

Employment opportunities through GPSC's 'Opportunities' module: ગુજરાત જાહેર સેવા આયોગ (GPSC)એ સ્પર્ધાત્મક પરીક્ષામાં અંતિમ તબક્કા સુધી પહોંચ્યા છતાં પસંદગી ન પામેલા તેજસ્વી ઉમેદવારો માટે રોજગારીના નવા દ્વાર ખોલતી પહેલ કરી છે. આ માટે આયોગે ‘અવસર’ મોડ્યૂલ તૈયાર કર્યુ છે. જે ઉમેદવારો અને વિવિધ સરકારી તેમજ ખાનગી સંસ્થાઓ વચ્ચે સેતુ તરીકે કાર્ય કરશે.

સરકારી અને ખાનગી ક્ષેત્રમાં મળશે તક
GPSCના સચિવ સુધીર પટેલે જણાવ્યું કે, આ મોડ્યૂલનો મુખ્ય હેતુ પ્રતિભાશાળી ઉમેદવારોને સરકારી સાહસો, જાહેર ક્ષેત્રની કંપનીઓ, સહકારી સંસ્થાઓ તેમજ પ્રતિષ્ઠિત ખાનગી કંપનીઓમાં રોજગારીની વૈકલ્પિક તક ઉપલબ્ધ કરાવવાનો છે. જ્યારે સંસ્થાઓને પણ લાયક અને કાબેલ માનવબળ સરળતાથી મળી શકશે તેવો દાવો કરવામાં આવ્યો છે.

કોને મળશે યોજનાનો લાભ?
છેલ્લા પાંચ વર્ષમાં પૂર્ણ થયેલી વર્ગ-1 અને વર્ગ-2ની 415થી વધુ ભરતી પ્રક્રિયાના અંતિમ પરિણામમાં અસફળ અથવા પ્રતીક્ષા યાદીમાં રહેલા 18 હજારથી વધુ ઉમેદવારો ‘અવસર’ યોજનાનો લાભ લઈ શકશે. ભવિષ્યમાં યોજાનારી તમામ ભરતીમાં પણ ઉમેદવારોને અરજી વખતે જ આ મોડ્યૂલ માટે સંમતિ આપવાનો વિકલ્પ આપવામાં આવશે.

OJAS પોર્ટલ પર આપવી પડશે સંમતિ
યોજનાનો લાભ લેવા ઇચ્છુક ઉમેદવારોએ GPSC-OJAS પોર્ટલ પર ઓનલાઈન સંમતિ આપવાની રહેશે. આ પ્રક્રિયામાં ઉમેદવારનું નામ, મોબાઇલ નંબર, ઇ-મેઇલ અને શૈક્ષણિક વિગતો માત્ર ઉમેદવારની મંજૂરી બાદ જ સંબંધિત સંસ્થાઓ સાથે શેર કરવામાં આવશે. સમગ્ર પ્રક્રિયાને સુરક્ષિત બનાવવા OTP આધારિત ચકાસણીની પણ વ્યવસ્થા કરવામાં આવી છે.

માહિતીની સુરક્ષા પર ખાસ ભાર
GPSCએ સ્પષ્ટ કર્યું છે કે, ઉમેદવારોની વ્યક્તિગત માહિતીનો ઉપયોગ માત્ર રોજગારીની પ્રક્રિયા માટે જ થઈ શકશે. કોઈપણ સંસ્થા આ માહિતીનો અન્ય હેતુ માટે ઉપયોગ કે અન્ય કોઈ સાથે શેર કરી શકશે નહીં. ડેટાની સુરક્ષાની સંપૂર્ણ જવાબદારી સંબંધિત સંસ્થાની રહેશે અને આયોગ માત્ર નિયંત્રિત એક્સેસ જ આપશે.

GPSC માત્ર રહેશે મધ્યસ્થી
આયોગે જણાવ્યું છે કે ‘અવસર’ મોડ્યૂલ અંતર્ગત GPSC માત્ર એક માધ્યમ તરીકે કાર્ય કરશે. ઉમેદવારને મળનારી નોકરીની શરતો, વેતન, સેવા નિયમો અથવા કોઈ કાનૂની વિવાદ અંગે GPSCની કોઈ સત્તાવાર જવાબદારી રહેશે નહીં. ઉમેદવાર અને ભરતી કરતી સંસ્થા વચ્ચેની સમગ્ર પ્રક્રિયા સ્વતંત્ર રહેશે.

ભવિષ્યમાં વધુ વિસ્તરણની તૈયારી
GPSCએ વહીવટી, તબીબી, શૈક્ષણિક અને ટેકનિકલ ક્ષેત્ર મુજબ ઉમેદવારોનો અલગ ડેટાબેઝ તૈયાર કર્યો છે. આ મોડ્યૂલ દ્વારા ભવિષ્યમાં વધુ સંસ્થાઓને જોડવાની યોજના છે જેથી પ્રતિભાશાળી ઉમેદવારોને યોગ્ય રોજગારી ઝડપથી મળી શકે.

‘અવસર’ મોડ્યૂલની મહત્વપૂર્ણ બાબતો

1.      માહિતીની સુરક્ષા: આયોગ દ્વારા સંસ્થાને આપવામાં આવેલી માહિતીનો ઉપયોગ સંસ્થા રોજગારીનો અવસર આપવા સિવાય બીજા કોઈ હેતુ માટે ઉપયોગ કરી શકશે નહીં તથા તે બીજા કોઈને શેર કરી શકશે નહીં, તેવી સંસ્થા પાસેથી બાંહેધરી લેવામાં આવશે અને ડેટાની સુરક્ષાની સંપૂર્ણ જવાબદારી સંસ્થાની રહેશે.

આયોગ દ્વારા ઉમેદવારોના ડેટાની સુરક્ષાનું ચુસ્ત પાલન કરવામાં આવશે. આ પ્લેટફોર્મ પર નોંધાયેલ પાત્ર સંસ્થાઓ સાથે ઉમેદવારની વિગતો જેવી કે ઉમેદવારનું નામ, મોબાઈલ નંબર, ઇમેઇલ આઇડી અને શૈક્ષણિક લાયકાત જ શેર કરવામાં આવશે. આયોગ પાસેથી માહિતી મેળવ્યા બાદ જે તે સંસ્થાને યોગ્ય લાગે તે ઉમેદવારોને સંસ્થાની ભરતી પ્રક્રિયામાંથી પસાર થયા બાદ ઉમેદવારની પસંદગી કરવામાં આવશે.

2.      ઉમેદવારની પૂર્વ સંમતિ: આ પ્લેટફોર્મ પર ઉમેદવારની વિગતો તેમની ઈચ્છા અને પૂર્વ સંમતિ બાદ જ ઉપલબ્ધ કરાવવામાં આવશે. ભવિષ્યમાં આવનારી નવીન જાહેરાતો માટે ઉમેદવારો અરજી કરતી વખતે જ GPSC-OJAS પોર્ટલ પર આ અંગે ઓનલાઇન સંમતિ આપી શકશે.

3.      ભૂતકાળની ભરતીના ઉમેદવારો માટે અવસર: આયોગ દ્વારા લેવાયેલી અને છેલ્લા પાંચ વર્ષમાં પૂર્ણ થયેલી વર્ગ-1 અને વર્ગ-2ની ભરતી પ્રક્રિયાના આખરી પરિણામમાં અસફળ અને પ્રતિક્ષા યાદીમાં સમાવેશ થયેલ ઉમેદવારો આ યોજનાનો લાભ લઈ શકે તે માટે GPSC-OJAS પોર્ટલ પર "અવસર" મોડ્યૂલમાં જઇને ઓનલાઇન સંમતિ પત્રક સબમિટ કરી શકશે.

4.      ઓટીપીની વ્યવસ્થાઃ ઉમેદવારે જાહેરાત ક્રમાંક તથા કન્ફર્મેશન નંબર આપીને સંમતિ આપવાની રહેશે. ઉમેદવાર જે તે જાહેરાતનું વર્ષ સિલેક્ટ કરતાં તેને તે વર્ષની તમામ જાહેરાતોની વિગતો ઉપલબ્ધ થશે તથા ઉમેદવાર કન્ફર્મેશન નંબર ભૂલી ગયા હોય તો તેઓની કન્ફર્મેશન નંબર મેળવવાની વ્યવસ્થા પણ કરવામાં આવેલ છે. કોઈ ઉમેદવારની જગ્યાએ બીજા કોઈ ઉમેદવાર આવી સંમતિ આપી ન શકે તે હેતુથી ઓટીપીની વ્યવસ્થા કરવામાં આવેલ છે. ઉમેદવારના રજીસ્ટર્ડ મોબાઈલ નંબર અને રજીસ્ટર્ડ ઈ-મેલ આઇ.ડી. પર ઓટીપી જશે અને ઓટીપી દાખલ કર્યા બાદ જ સંમતિની પ્રક્રિયા પૂર્ણ થશે.