" તમારે સાંભળવું પડશે અને સી.આર.પાટીલ પણ માથુ ઝુકાવીને માત્ર સાંભળતા જ રહ્યા..."

કાશ્મીરમાં પહલગામ આતંકી હુમલામાં સુરતના શૈલેશ કળથીયાને પણ આતંકીઓએ ગોળી મારતા તેમનું મોત થયું હતું. શૈલેશભાઇના મૃતદેહને આજે સુરત લવાયો હતો અને સવારે તેમને અંતિમ વિદાય અપાઇ હતી.  મૃતક શૈલેષ કળથીયા ના પત્નીએ કેન્દ્રીય જળ મંત્રી સી.આર.પાટીલ સહિતના નેતાઓ સમક્ષ ઉગ્ર આક્રોશ વ્યક્ત કર્યો હતો. તેમણે નેતાઓને કહ્યું કે મારો પતિ મને પાછો આપો. જો આપણી સરકારને પોતાની જ સુવિધા રાખવી છે. તમારો જીવ જીવ છે તો અમારો જીવ જીવ નથી.?  જો તમારી પાછળ કેટલી ગાડી છે. જે ટેક્ષ પે કરે છે તેમનો જીવ જીવ નથી.? મારા છોકરાઓનું શું થશે.? મને ન્યાય જોઇએ. મારા છોકરાનું ભવિષ્ય બગડવું ના જોઇએ. બધો ટેક્ષ તમે લો છો તો મારા ઘરવાળાને જરુર હતી તો તને સુરક્ષા સુવિધા કેમ ના મળી. આવા અનેક નિર્દોષ મર્યા છે. એ લોકોએ હિન્દુ મુસ્લિમ ને અલગ કરીને મારી નાખ્યા હતા. તેમણે કહ્યું કે  આતંકવાદી એ મારા પતિ ને ગોળી મારી મોત ના થયું ત્યાં સુધી ત્યાં ઉભો રહ્યો અને હસતો રહ્યો હતો..

મૃતકના પત્નીએ સીઆર પાટીલ સમક્ષ જ્યારે આ આક્રોષ વ્યક્ત કર્યો હતો ત્યારે સીઆરપાટીલ નતમસ્તક બનીને ઉભા રહ્યા હતા. તમામ નેતાઓ મૂકપ્રેક્ષક બનીને ઉભા જ રહ્યા હતા. તેમની સમક્ષ સાંત્વના આપવા સિવાય કોઇ વિકલ્પ ન હતો. નેતાઓને પણ ખબર છે કે મૃતકના પત્નીનો આક્રોષ વાજબી છે. આતંકવાદ સામે હવે કડક પગલાં લેવાનો સમય આવી ગયો છે. દેશમાં રહેતો તમામ વ્યક્તિ પોતાને સુરક્ષિત વ્યકત કરે તે જરુરી છે.

આવી સરકારને કોઈ વોટ જ ન આપતા... ત્યાં કોઈ સુવિધા નહોતી, કોઈ આર્મી નહોતી કે કોઈ પોલીસ નહોતી. તમારી પાછળ ગાડીઓનો મોટો કાફલો હોય છે. જ્યારે VIP આવે ત્યારે ઉપર હેલિકોપ્ટર હોય છે. આ બધુ અમારા ટેક્સ પરથી જ ચાલે છે ને? તો અમારા માટે કેમ કઈ સુવિધા નહિ? તમારે જવાબ દેવો પડશે, મારા ઘરનો તો સ્તંભ જતો રહ્યો છે, પાછો આપો. છોકરાને એન્જિનિયર અને દીકરીને ડોક્ટર બનાવવી છે, હવે હું શું કરીશ? ત્યાં કોઇ સુવિધા કે સુરક્ષા જ ન હતી. અમે કોઈ વસ્તુ ખરીદીએ, ક્યાય જઈએ તો ફરીથી ટેક્સ. ટોલ ટેક્સ બધા ટેક્સ અમારી પાસેથી લ્યો છો તો મારા ઘરવાળાને જ્યારે જરૂર હતી તો કોઈ સુવિધા નથી મળી તેનો મને ન્યાય જોઈએ. વધુમાં પાટીલને કહ્યું કે, તમે તો અહીં જ (સુરતમાં) રહો છો તો કહો મારા પતિ માટે શું કરશો? આ એક નહિ આના જેવા જેટલા નિર્દોષ ભાઈઓ હતાં તે બધાને નાના-નાના છોકરાઓ છે. મુસ્લિમોને કંઇ ન કર્યુ ને જેટલા હિન્દુ હતા એ બધાને ગોળી મારી દીધી અને જ્યાં સુધી જીવ ન ગયો ત્યાં સુધી આંતકવાદીઓ ઉભા ઉભા હસતા હતા. કાશ્મીરનું નામ બદનામ કરો છો પણ કાશ્મીરમાં કંઇ વાંધો નથી, વાંધો આપણી સરકાર અને સિક્યુરિટીમાં છે.....આ તેમના શબ્દો હતા.