ખંભાત નગરપાલિકામાં ભાજપની મહિલા કોર્પોરેટરો સામે શા માટે નોંધાઈ ફરિયાદ?

ખંભાત નગરપાલિકામાં મહિલા કોર્પોરેટરો અને ક્લાર્ક વચ્ચે લાફાવાળી થઈ હતી. રજિસ્ટરમાં સહી કરવા મુદ્દે ક્લાર્ક અને મહિલા કોર્પોરેટરો વચ્ચે રકઝક થયા બાદ મારામારી થઈ હતી. રાજીનામુ આપવા છતાં મહિલા કોર્પોરેટરો સામાન્ય સભામાં હાજર રહીને રજિસ્ટરમાં સહી કરવા ગયા હતા. આ સમયે હોબાળો થતાં મહિલા કોર્પોરેટરોએ ક્લાર્ક સાથે મારામારી કરી હતી. તેથી ચીફ ઓફિસરે ભાજપની 5 અને અપક્ષની 1 મળી 6 મહિલા કોર્પોરેટરો સામે ફરિયાદ નોંધાવી છે.

ખંભાત નગરપાલિકાની બજેટ મામલે સામાન્ય સભા યોજાઈ હતી. નવેમ્બર-2024માં નગરપાલિકાના કોર્પોરેટર પદેથી રાજીનામુ આપનાર ભાજપની 5 અને 1 અપક્ષ મહિલા કોર્પોરેટરોએ હોદ્દા ઉપર ન હોવા છતાં સામાન્ય સભામાં હાજર રહ્યા હતા. તે સમયે રજિસ્ટરમાં સહી કરવા બાબતે ઈન્ચાર્જ હેડ ક્લાર્ક ચેતન સોની સાથે રકઝક થઈ હતી. ક્લાર્કે સહી કરવાની ના કહેતાં પૂર્વ ઉપપ્રમુખ ઉષાબેન બારૈયાએ ક્લાર્કને લાફા ઝીંકી દીધા હતા. આ ઘટનાનો વીડિયો સોશિયલ મીડિયામાં વાયરલ થયો હતો. ત્યારબાદ ચીફ ઓફિસરે 6 મહિલા કોર્પોરેટરો સામે ખંભાત પોલીસ સ્ટેશનમાં ફરિયાદ નોંધાવી છે.

કોની સામે ફરિયાદ નોંધવામાં આવી?

ખંભાત પોલીસ સ્ટેશનમાં ઉષાબેન પ્રકાશભાઈ બારૈયા, તેજલબેન સાગરભાઈ સોલંકી, નિષાદબાનું સોયેબભાઈ મન્સૂરી, કામિનીબેન હિરેનભાઈ ગાંધી, હેતલબેન કરશનભાઈ ભીલ અને શાંતિબેન ભૂપતભાઈ માછી સામે ફરિયાદ નોંધવામાં આવી છે.

શું હતો સમગ્ર મામલો?

રાજીનામું આપનાર 6 મહિલા કોર્પોરેટરોને કર્મચારી દ્વારા રજિસ્ટરમાં સહી કરવા દેવામાં ન આવતા વિવાદ સર્જાયો હોવાનું જાણવા મળ્યુ છે. પરિસ્થિતિ વણસતા કર્મચારી અને મહિલા કોર્પોરેટરો વચ્ચે ઘર્ષણ થયું હતું. આ દરમિયાન મહિલા કાઉન્સિલરોએ રજિસ્ટર લઈ પોતાની સહી કરી હતી. ખંભાત નગરપાલિકામાં હંમેશા વિવાદમાં રહી છે. ખંભાત નગરપાલિકામાં બે મહિના અગાઉ યોજાયેલી સામાન્ય સભામાં પણ બબાલ થઈ હતી. કોર્પોરેટરોના અસભ્ય વર્તનથી કર્મચારીઓમાં રોષ ફેલાયો હતો.

મહિલા કોર્પોરેટરોએ શું કહ્યું?

મહિલા કોર્પોરેટરોએ જણાવ્યું હતું કે તેમની પાસે હાઈકોર્ટનો સ્ટે ઓર્ડર છે. સ્ટે ઓર્ડર ડિસ્પેચ વિભાગમાં જમા કરાવીને પહોંચ પણ મેળવી હતી. તેમ છતાં કર્મચારી દ્વારા સહી કરતાં રોકવામાં આવ્યા હતા.  સત્તા પક્ષ મનમાની કરી રહ્યો છે અને સત્તાનો દુરુપયોગ થઈ રહ્યો છે. જો તેમને સસ્પેન્ડ કરવામાં આવ્યા હોત તો બોર્ડ બેઠકમાં રાજીનામાની ચર્ચા કરવાની જરૂર જ ન હતી. મહિલા કોર્પોરેટરે સાથે મારામારી થયા બાદ બજેટ બોર્ડની બેઠક મુલતવી રહી હતી. તેથી બજેટ મંજૂર થવા અંગે અનિશ્ચિતતા પ્રવર્તી રહી છે.