વકફ બોર્ડની 100 કરોડની મિલકતનું કૌભાંડ: ED દ્વારા 10 સ્થળો ઉપર દરોડા

અમદાવાદમાં ગુજરાત વક્ફ બોર્ડ સંચાલિત જમાલપુર કાચની મસ્જિદ ટ્રસ્ટની AMCને ભાડે આપેલી જગ્યા પચાવી ગેરકાયદે દબાણ કરનાર સલીમ પઠાણના ઘર સહિત 10 સ્થળો ઉપર ED (એન્ફોર્સમેન્ટ ઓફ ડિરેક્ટોરેટ) દ્વારા દરોડા પાડીને તપાસ શરૂ કરવામાં આવી છે. અમદાવાદના માલપુર અને ખેડા જિલ્લામાં ED દ્વારા સર્ચ ઓપરેશન હાથ ધરાયુ છે.

મંગળવારે વહેલી સવારથી જમાલપુર વિસ્તારમાં સૌદાગર બિલ્ડર્સ નામે કન્સ્ટ્રક્શનનો વ્યવસાય કરતાં સલીમ પઠાણનાં નિવાસસ્થાન અને ઓફિસમાં ઇડી દ્વારા દરોડા પાડવામાં આવ્યા છે. જમાલપુર કાચની મસ્જિદ, સના 7 બિલ્ડિંગ, ખેડા ખાતેના ફાર્મહાઉસ સહિત 10 સ્થળો ઉપર ઈડીએ સર્ચ ઓપરેશન હાથ ધર્યુ છે. સલીમ પઠાણ દ્વારા વક્ફ બોર્ડની જમીન પર કોર્પોરેશનને ભાડે આપેલી જગ્યામાં ગેરકાયદે દબાણ કરી ફ્લેટ અને દુકાનો બનાવી દેવામાં આવી હતી. છેલ્લા 20 વર્ષથી ફ્લેટ અને દુકાનોનું ભાડુ ઉઘરાવી વકફ બોર્ડ સાથે છેતરપિંડી કરવામાં આવી હતી.

શું હતો સમગ્ર મામલો?

વક્ફ બોર્ડે AMCને આપેલી જમીન પરની શાળા જર્જરિત થઈ ગઈ હતી. આ જગ્યા ઉપર પાંચ શખ્સોએ નવી શાળા બનાવવાના બદલે 20 વર્ષ અગાઉ ગેરકાયદે દુકાનો બાંધી દીધી છે. સલીમખાન પઠાણ નામનો શખ્સ વક્ફ બોર્ડની 100 કરોડની મિલકત પર દુકાનો અને મકાન બનાવી ગેરકાયદે રીતે ભાડું વસૂલતો હતો. કાચની મસ્જિદની પાસે રહેતા મોહમ્મદ રફીક અન્સારીએ ગાયકવાડ હવેલી પોલીસ સ્ટેશનમાં ફરિયાદ નોંધાવી હતી. તેઓ વર્ષોથી કાચની મસ્જિદ ટ્રસ્ટની મિલકતમાં રહે છે. ટ્રસ્ટના તમામ જૂના ટ્રસ્ટીઓના મરણ થઈ ચૂક્યા છે. આ જમીન વર્ષો પહેલાં વકફ ટ્રસ્ટે AMCને સોંપી હતી.

દુકાનો બનાવી 20 વર્ષ સુધી ભાડું ઉઘરાવ્યું

AMCએ વકફ ટ્રસ્ટની જમીન ઉપર શાળા બનાવી હતી. 2001માં ભૂકંપ સમયે સ્કૂલનું બાંધકામ જર્જરીત થઈ ગયું હતું. વર્ષ 2009માં સલીમ પઠાણ સહિતના નકલી ટ્રસ્ટીઓએ શાળાનું બાંધકામ તોડી ગેરકાયદે 10 દુકાનો બનાવી દીધી હતી. ત્યારબાદ સલીમ પઠાણે શખ્સે સૌદાગર કન્સ્ટ્રક્શનની ઓફિસ ખોલીને 9 દુકાનો ભાડે આપી હતી. આ ભાડું આવ્યું વકફ ટ્રસ્ટ કે AMCના એકાઉન્ટમાં જમા નહી કરાવી છેતરપિંડી આચરી હતી.  સલીમ પઠાણ આ જગ્યા ઉપર બનેલા મકાનો 15 ભાડુઆતો પાસેથી ગેરકાયદે ભાડાં ઉઘરાવ્યા હતા. વકફ બોર્ડમાં સલીમ પઠાણ, મહેબૂબ સહિતના લોકોએ ટ્રસ્ટી તરીકે ખોટી ઓળખ આપી ગેરકાયદે ભાડા ઉઘરાવ્યા હોવાનું બહાર આવ્યુ છે. વર્ષ 2005થી સલીમખાન અને તેની સાથેના ચાર શખ્સોએ ટ્રસ્ટની જમીનમાં 25થી 30 દુકાનો અને 200 મકાનો બનાવી ભાડા ઉઘરાવ્યા હતા. આ શખ્સોએ ગેરકાયદે 6 માળના બે ફ્લેટ બનાવી ભાડું ઉઘરાવ્યા હતા. શાહ બડા કાસિમ ટ્રસ્ટની દાનપેટીમાં દર મહિને થતી 50 હજારની આવક પણ આ શખ્સો વાપરતા હોવાનું સામે આવ્યું છે.

સલીમ પઠાણનો ગુનાહિત ઈતિહાસ

સલીમ પઠાણ, મોહમ્મદ યાસર શેખ, મહેમૂદ પઠાણ, ફેઝ મોહમ્મદ જોબદાર, શાહિદ અહેમદ શેખ શખ્સોએ નકલી ટ્રસ્ટી બની વકફ બોર્ડની મિલકતમાં મકાન અને દુકાન ધરાવતા લોકો પાસેથી ગેરકાયદે ભાડા વસૂલ કર્યાં છે. ગાયકવાડ હવેલી પોલીસે 15 દિવસ અગાઉ પાંચેય શખ્સો સામે ગુનો નોંધી ધરપકડ કરી હતી. સલીમ પઠાણનો ભૂતકાળ પણ ગુનાહિત છે. સલીમ પઠાણ વિરુદ્ધ હત્યા, રાયોટિંગ સહિતના ગુના નોંધાયેલા છે. ગાંધીનગર સ્થિત વકફ બોર્ડની કચેરીમાં ખોટું સોગંદનામું રજૂ કર્યું હોવાનું પણ તપાસમાં બહાર આવ્યું છે. આ શખ્સોએ 100 કરોડની મિલકત પર ભાડું વસૂલ્યું હતું. મકાન દીઠ 5 થી 7 હજાર પ્રમાણે 100 મકાનોનું ભાડું તેમજ દુકાન દીઠ 10 હજાર પ્રમાણે 10 દુકાનનું ભાડું વસૂલવામાં આવતું હતું. વર્ષ 2005થી ટ્રસ્ટના નામે ભાડું ઉઘરાવતા હતા.