સુરતમાં પાણીપુરીની લારી બાબતે હિંસક મારામારી

સુરત શહેરના વ્યસ્ત ગણાતા અશ્વિનીકુમાર રોડ વિસ્તારમાં મોડી સાંજે હિંસક દૃશ્યો જોવા મળ્યા હતા. સામાન્ય રીતે ખાણી-પીણી માટે જાણીતા આ વિસ્તારમાં પાણીપુરીની લારી ચલાવતા બે જૂથો વચ્ચે ભયાનક મારામારી થઈ હતી. રસ્તા પર લારી ક્યાં ઊભી રાખવી તે જેવી નાની બાબતથી શરૂ થયેલો વિવાદ જોતજોતામાં લોહિયાળ જંગમાં ફેરવાઈ ગયો હતો.

જાહેરમાં લાકડાના ફટકા વડે હુમલો : 

પ્રત્યક્ષદર્શીઓના જણાવ્યા અનુસાર, વિવાદ વધતા જ બંને પક્ષના યુવકો ઉશ્કેરાઈ ગયા હતા. લાકડાના ફટકા અને અન્ય સાધનો વડે એકબીજા પર આડેધડ હુમલો કરવામાં આવ્યો હતો. આ ભયાનક દૃશ્યો જોઈને રસ્તે પસાર થતા રાહદારીઓ અને સ્થાનિક દુકાનદારોમાં ગભરાટ ફેલાઈ ગયો હતો. ભીડભાડ વાળા રસ્તા પર જાહેરમાં કાયદાનો ડર રાખ્યા વિના યુવકો સામસામે આવી જતાં અફરાતફરીનો માહોલ સર્જાયો હતો.

સ્થાનિકોએ વચ્ચે પડી મામલો થાળે પાડ્યો : 

હિંસક હુમલો વધતા જોઈ આસપાસના લોકો અને અન્ય વેપારીઓ તાત્કાલિક મદદે દોડી આવ્યા હતા. ચારથી વધુ યુવકો જે હિંસક રીતે લડી રહ્યા હતા તેમને લોકોએ વચ્ચે પડીને છોડાવ્યા હતા. લોકોના ટોળા એકઠા થતા અને સમજાવટ બાદ આખરે મામલો શાંત પડ્યો હતો, પરંતુ ત્યાં સુધીમાં આ ઝઘડો આખા વિસ્તારમાં ચર્ચાનો વિષય બની ગયો હતો.

સોશિયલ મીડિયામાં વીડિયો વાઇરલ અને પોલીસ એક્શન : 

આ સમગ્ર મારામારીની ઘટના ત્યાં હાજર કોઈ વ્યક્તિએ પોતાના મોબાઈલ કેમેરામાં કેદ કરી લીધી હતી. આ વીડિયો સોશિયલ મીડિયા પ્લેટફોર્મ પર વાઇરલ થતાં જ પોલીસ વિભાગ દોડતું થયું છે. વાઇરલ વીડિયોમાં સ્પષ્ટપણે જોઈ શકાય છે કે કઈ રીતે યુવકો એકબીજા પર જીવલેણ હુમલો કરી રહ્યા છે. અશ્વિનીકુમાર વિસ્તારની પોલીસે આ વીડિયોને પુરાવા તરીકે ગણીને તપાસના ચક્રો ગતિમાન કર્યા છે. હુમલાખોરોની ઓળખ કરવાની પ્રક્રિયા હાથ ધરવામાં આવી છે જેથી કાયદેસરની કડક કાર્યવાહી કરી શકાય.