વડોદરામાં વાઘોડિયા ચોકડી નજીક વેપારી પર ફાયરિંગ

Vadodara Firing: વડોદરા શહેરમાં કાયદો અને વ્યવસ્થાને પડકારતી વધુ એક ગંભીર ઘટના સામે આવી છે.શહેરના વ્યસ્ત ગણાતા વાઘોડિયા ચોકડી વિસ્તારમાં દિવસદાઢે ફિલ્મી સ્ટાઈલમાં ફાયરિંગ થતાં સમગ્ર વિસ્તારમાં દહેશતનો માહોલ સર્જાયો હતો. બાઈક પર આવેલા અજાણ્યા હુમલાખોરોએ કારમાં જઈ રહેલા એક યુવકનો પીછો કરીને તેના પર ગોળીબાર કર્યો હતો.ગોળી યુવકના ખભાના ભાગે વાગતાં તે ગંભીર રીતે ઇજાગ્રસ્ત થયો હતો.ઘટનાની જાણ થતાં જ શહેર પોલીસ, ગ્રામ્ય પોલીસ તેમજ ફોરેન્સિક સાયન્સ લેબોરેટરી (FSL)ની ટીમો તાત્કાલિક સ્થળ પર પહોંચી હતી અને સમગ્ર ઘટનાની તપાસ શરૂ કરી હતી. હુમલાખોરો ઘટનાને અંજામ આપ્યા બાદ પળવારમાં ફરાર થઈ જતાં પોલીસે શહેરભરમાં નાકાબંધી કરી તેમની શોધખોળ શરૂ કરી છે.

કેવી રીતે બન્યો હુમલો?
પ્રત્યક્ષદર્શીઓના જણાવ્યા અનુસાર આશિષ બાકોલીયા પોતાની કારમાં પસાર થઈ રહ્યો હતો ત્યારે બાઈક પર આવેલા બે જેટલા શખ્સોએ તેનો પીછો શરૂ કર્યો હતો. થોડું અંતર કાપ્યા બાદ વ્યસ્ત રસ્તા પર જ હુમલાખોરોએ નજીક આવી ગોળીબાર કર્યો હતો.ગોળી વાગતા જ કાર અનિયંત્રિત થઈ હતી. આસપાસના વાહનચાલકો અને લોકોમાં ભારે દોડધામ મચી ગઈ હતી. લોકો જીવ બચાવવા દુકાનો અને અન્ય સુરક્ષિત સ્થળોએ દોડી ગયા હતા.

108 મારફતે યુવકને હોસ્પિટલમાં લઈ જવાયો
ફાયરિંગની ઘટનાની જાણ થતાં જ 108 ઈમરજન્સી એમ્બ્યુલન્સ ઘટનાસ્થળે પહોંચી હતી. ઈજાગ્રસ્ત યુવકને પ્રથમ સારવાર માટે વડોદરાની એસએસજી હોસ્પિટલમાં લઈ જવામાં આવ્યો હતો. ત્યાં પ્રાથમિક સારવાર બાદ તેની ગંભીર સ્થિતિને ધ્યાનમાં રાખીને વધુ સારવાર માટે ખાનગી હોસ્પિટલમાં રિફર કરવામાં આવ્યો હોવાનું જાણવા મળ્યું છે. હાલ યુવકની સારવાર ચાલી રહી છે.તેની હાલત અંગે હોસ્પિટલ અથવા પોલીસ તરફથી સત્તાવાર રીતે વધુ માહિતી જાહેર કરવામાં આવી નથી. તબીબોની ટીમ તેની સારવાર પર સતત નજર રાખી રહી છે.

દિવસે  ફાયરિંગથી લોકોમાં ભય
વાઘોડિયા ચોકડી વડોદરાનો અત્યંત વ્યસ્ત વિસ્તાર માનવામાં આવે છે. અહીં દિવસભર હજારો વાહનોની અવરજવર રહે છે. આવી જગ્યાએ ખુલ્લેઆમ ગોળીબાર થવાથી લોકોમાં સુરક્ષાને લઈને ગંભીર પ્રશ્નો ઊભા થયા છે.ઘટના બાદ ઘણા સમય સુધી ટ્રાફિક જામ સર્જાયો હતો. પોલીસે વિસ્તારને કોર્ડન કરી પુરાવા એકત્ર કરવાની કાર્યવાહી હાથ ધરી હતી.

પોલીસ તાત્કાલિક એક્શનમાં, સમગ્ર વિસ્તાર કોર્ડન કરીને તપાસ શરૂ
ફાયરિંગ જેવી ગંભીર ઘટનાની જાણ થતાં જ વડોદરા શહેર પોલીસ તેમજ ગ્રામ્ય પોલીસનો મોટો કાફલો ઘટનાસ્થળે પહોંચી ગયો હતો. સમગ્ર વિસ્તારને કોર્ડન કરીને પોલીસ દ્વારા તપાસ શરૂ કરવામાં આવી હતી. કોઈપણ પુરાવા નષ્ટ ન થાય તે માટે સ્થળને સુરક્ષિત કરવામાં આવ્યું હતું. પોલીસે તાત્કાલિક શહેરના વિવિધ વિસ્તારોમાં નાકાબંધી ગોઠવી હુમલાખોરોની શોધખોળ શરૂ કરી છે. શહેરમાં પ્રવેશ અને બહાર જવાના મુખ્ય માર્ગો પર પણ વાહનોની તપાસ હાથ ધરવામાં આવી હોવાનું જાણવા મળે છે.

FSLની ટીમે એકત્ર કર્યા પુરાવા
ઘટનાની ગંભીરતાને ધ્યાનમાં રાખીને ફોરેન્સિક સાયન્સ લેબોરેટરી (FSL)ની ટીમ પણ ઘટનાસ્થળે પહોંચી હતી. ટીમે સ્થળ પરથી જરૂરી વૈજ્ઞાનિક પુરાવા એકત્રિત કરવાની કામગીરી હાથ ધરી હતી. ગોળીના ખોખાં, ફાયરિંગની દિશા તેમજ અન્ય ફોરેન્સિક પુરાવાના આધારે સમગ્ર ઘટનાક્રમ સમજવાનો પ્રયાસ કરવામાં આવી રહ્યો છે. ફોરેન્સિક તપાસના અહેવાલના આધારે પોલીસને હુમલાખોરો સુધી પહોંચવામાં મહત્વની મદદ મળી શકે તેવી શક્યતા છે.

સીસીટીવી સૌથી મોટો પુરાવો
પોલીસ માટે હાલ સૌથી મહત્વનો આધાર સીસીટીવી ફૂટેજ બની શકે છે.વાઘોડિયા ચોકડી અને આસપાસના વેપારી સંકુલો, પેટ્રોલ પંપ, દુકાનો તેમજ ટ્રાફિક કેમેરાના ફૂટેજની તપાસ કરવામાં આવી રહી છે.પોલીસ હુમલાખોરોના કપડાં, બાઈકનો રંગ, નંબર પ્લેટ અને ભાગવાના રૂટ અંગે માહિતી મેળવવાનો પ્રયાસ કરી રહી છે.દિવસદાઢે થયેલા ગોળીબારનો વીડિયો અને ફોટા સોશિયલ મીડિયામાં ઝડપથી વાયરલ થયા હતા.ઘટનાને લઈને લોકોમાં ભારે ચર્ચા શરૂ થઈ હતી.ઘણા લોકોએ જાહેર સ્થળે સુરક્ષા વ્યવસ્થા અંગે પ્રશ્નો ઉઠાવ્યા હતા.

સ્થાનિકોમાં સુરક્ષાને લઈને ચિંતા
શહેરના વ્યસ્ત વિસ્તારમાં જાહેરમાં ગોળીબારની ઘટનાએ સ્થાનિક વેપારીઓ અને રહીશોમાં ચિંતા વધારી છે. દિવસના સમયે આવી ઘટના બનતાં લોકોમાં સુરક્ષાને લઈને અનેક પ્રશ્નો ઊભા થયા છે.વેપારીઓનું કહેવું છે કે વ્યસ્ત વિસ્તારમાં આવી ઘટના બનવી ચિંતાજનક છે અને પોલીસ દ્વારા સતત પેટ્રોલિંગ વધારવાની જરૂર છે.
પોલીસ અધિકારીઓએ જણાવ્યું છે કે હુમલાખોરોને ઝડપવા માટે અલગ-અલગ ટીમો બનાવવામાં આવી છે અને ટૂંક સમયમાં આરોપીઓ સુધી પહોંચવાનો પ્રયાસ કરવામાં આવશે. સમગ્ર ઘટનાની ગંભીરતાને ધ્યાનમાં રાખીને તપાસ ઝડપી ગતિએ આગળ વધારવામાં આવી રહી છે.

ફાયરિંગ પાછળનું કારણ હજુ સ્પષ્ટ નથી
પ્રાથમિક તપાસમાં હજુ સુધી ફાયરિંગ પાછળનું ચોક્કસ કારણ સામે આવ્યું નથી. અંગત અદાવત, જૂની દુશ્મની, આર્થિક વ્યવહાર કે અન્ય કોઈ કારણ જવાબદાર છે કે કેમ તે દિશામાં પણ પોલીસ તપાસ કરી રહી છે. ઈજાગ્રસ્ત યુવકના પરિચિતો તેમજ પરિવારજનોના નિવેદન લેવામાં આવી રહ્યા છે. પોલીસનું કહેવું છે કે તમામ સંભવિત એંગલને ધ્યાનમાં રાખીને તપાસ આગળ વધારવામાં આવી રહી છે અને કોઈપણ શક્યતાને નકારી કાઢવામાં આવી નથી. તપાસ પૂર્ણ થયા બાદ જ ઘટનાનું સાચું કારણ સ્પષ્ટ થઈ શકશે.