Vadodara માં દારૂબંધીના ધજાગરા, SMC એ ઝડપ્યું વિદેશી દારૂનું ગોડાઉન, પોલીસની ઊંઘ ઉડી!

વડોદરા શહેરની પોલીસ ફરી એકવાર તેની ઊંઘતી કાર્યપદ્ધતિને કારણે જાહેરમાં ખુલ્લી પડી છે. છાણી પોલીસ સ્ટેશનની હદમાં આવેલા દશરથ ગામેથી વિદેશી દારૂનું એક વિશાળ ગોડાઉન ઝડપાયું છે, જે શહેરમાં દારૂબંધીના દાવાઓને પોકળ સાબિત કરે છે. રાજ્યના ગૃહ વિભાગની SMC (સ્ટેટ મોનિટરિંગ સેલ) ટીમે દરોડો પાડીને લાખો રૂપિયાના વિદેશી દારૂના જથ્થા સાથે ચાર આરોપીઓની ધરપકડ કરતા સ્થાનિક પોલીસની કાર્યક્ષમતા સામે ગંભીર સવાલો ઉભા થયા છે.

સ્થાનિક પોલીસની નિષ્ફળતા અને SMC નો સપાટો...

પ્રાપ્ત માહિતી અનુસાર, દશરથ ગામે આવેલા આ ગોડાઉનમાં રાજસ્થાન પાર્સિંગની એક ટ્રકમાંથી વિદેશી દારૂનો જથ્થો ઠાલવવામાં આવી રહ્યો હતો. આ ગુપ્ત ઓપરેશનની જાણ સ્થાનિક છાણી પોલીસને ન હોતી, પરંતુ SMC ની ટીમે બાતમીના આધારે ત્રાટકીને સમગ્ર કૌભાંડનો પર્દાફાશ કર્યો હતો. SMC એ સ્થળ પરથી વિદેશી દારૂ, દારૂ ભરેલી ટ્રક અને અન્ય મુદ્દામાલ કબજે કર્યો છે. આ ઘટના દર્શાવે છે કે, સ્થાનિક પોલીસની રહેમનજર હેઠળ કે પછી તેમની બેદરકારીના કારણે શહેરમાં દારૂની બદી બેફામપણે ધમધમી રહી છે.

ચાર આરોપીઓની ધરપકડ, મુખ્ય સૂત્રધાર હજુ ફરાર?

SMC એ ગોડાઉન પરથી ચાર આરોપીઓની ધરપકડ કરી છે, પરંતુ આ તો માત્ર પ્યાદાઓ છે. દારૂનો આટલો મોટો જથ્થો કોણે મગાવ્યો હતો? આ ગોડાઉનનો માલિક કોણ છે? અને આ રેકેટ પાછળનો મુખ્ય સૂત્રધાર કોણ છે? તે દિશામાં SMC દ્વારા ઊંડાણપૂર્વક તપાસ શરૂ કરવામાં આવી છે. આશા છે કે આ તપાસમાં દારૂના આ મોટા રેકેટના તમામ ભેદ ખુલી જશે અને તેમાં સંડોવાયેલા તમામ મોટા માથાઓ સામે કડક કાર્યવાહી થશે.

આ પણ વાંચો : Wildlife Tourism : ગુજરાતના જંગલોમાં ચાર મહિના સન્નાટો, પ્રવાસીઓ પર સંપૂર્ણ પ્રતિબંધ!

પોલીસ તંત્ર પર પ્રશ્નાર્થ...

વારંવાર આવી ઘટનાઓ સામે આવતા વડોદરા પોલીસ તંત્ર પર ગંભીર સવાલો ઉભા થાય છે. શું પોલીસ ખરેખર દારૂબંધીને અસરકારક રીતે લાગુ કરવામાં સક્ષમ નથી? કે પછી આવા ગેરકાયદેસર ધંધામાં કેટલાક તત્વોની સાંઠગાંઠ છે? રાજ્યસ્તરની એજન્સીઓ દ્વારા દરોડા પાડવામાં આવે ત્યારે જ આવા મોટા કૌભાંડો પકડાય છે, જે સ્થાનિક પોલીસની નિષ્ક્રિયતા સ્પષ્ટપણે દર્શાવે છે. વડોદરામાં દારૂના આ ગોડાઉનનું ઝડપાવવું એ માત્ર એક ગુનો નથી, પરંતુ તે કાયદો અને વ્યવસ્થાની સ્થિતિ પર પણ એક લાલબત્તી છે. વહીવટી તંત્રએ આ મામલે ગંભીરતા દાખવીને જવાબદાર અધિકારીઓ સામે પગલાં લેવા જોઈએ અને દારૂબંધીને વધુ કડક બનાવવા માટે નક્કર કાર્યવાહી કરવી જોઈએ.

આ પણ વાંચો : છેલ્લુ લોકેશન AHMEDABAD પ્લેન ક્રેશથી માત્ર 700 મીટર દુર.. સંગીતકાર ક્યા ગયા ?