માંજલપુર પેટાચૂંટણીમાં હોબાળો

Vadodara Manjalpur By-Election: વડોદરાની 145 માંજલપુર વિધાનસભા બેઠકની પેટા ચૂંટણીમાં આજે મતદાન યોજાઈ રહ્યું છે. ભાજપના સતેન્દ્ર પટેલ અને કોંગ્રેસના ભીખા રબારી વચ્ચે સીધી ટક્કર છે.મતદાન વચ્ચે જ આચારસંહિતા ભંગ મુદ્દે ભાજપ-કોંગ્રેસના કાર્યકરો આમને-સામને આવી ગયા.ભાજપ પર ઢોલ-નગારા સાથે પ્રચારનો આરોપ લાગ્યો, જ્યારે કોંગ્રેસના કાર્યકરો પણ પક્ષના ખેસ સાથે જોવા મળ્યા.બંને પક્ષોએ એકબીજા સામે ફરિયાદ નોંધાવવાની તજવીજ હાથ ધરી છે, જેનાથી રાજકીય માહોલ ગરમાયો છે.

કોંગ્રેસના ખેસ પહેરીને ટેબલ પર બેસવા મુદ્દે વિવાદ
મળતી વિગતો અનુસાર માંજલપુર બેઠકના એક મતદાન કેન્દ્રની બહાર કોંગ્રેસના કાર્યકરો પોતપોતાના ટેબલ પર કોંગ્રેસના પક્ષીય ખેસ પહેરીને બેઠા હતા.ચૂંટણી આચારસંહિતા અને નિયમો અનુસાર મતદાન કેન્દ્રની ચોક્કસ ત્રિજ્યામાં પક્ષીય પ્રતીક કે ખેસનો પ્રચાર કરી શકાતો નથી.કોંગ્રેસી કાર્યકરોને ખેસ સાથે જોઈને ત્યાં હાજર ભાજપના યુવા મોરચાના મહામંત્રી ઋત્વિક પુરોહિતે આ બાબતે સખત વાંધો ઉઠાવી વિરોધ દર્શાવ્યો હતો.

ભાજપ પર ઢોલ-નગારા સાથે પ્રચારનો આરોપ
મતદાન દરમિયાન સોશિયલ મીડિયા પર એક વીડિયો વાઈરલ થયો છે, જેમાં ભાજપના ધારાસભ્ય અને કાર્યકરો ઢોલ-નગારાના તાલે તેમજ પક્ષના ચિહ્નવાળા ખેસ પહેરીને મતદારોને અપીલ કરતા નજરે પડે છે. કોંગ્રેસનો આરોપ છે કે મતદાનના દિવસે પક્ષના પ્રતીકો સાથે પ્રચાર કરવો અને મતદારોને પ્રભાવિત કરવા એ ચૂંટણી નિયમોનું સ્પષ્ટ ઉલ્લંઘન છે. આ મામલે કોંગ્રેસે જિલ્લા કલેક્ટર અને ચૂંટણી અધિકારીઓ સમક્ષ વિધિવત ફરિયાદ નોંધાવવાની તજવીજ હાથ ધરી છે.

કોંગ્રેસના કાર્યકરો સામે પણ આચારસંહિતા ભંગનો આક્ષેપ
બીજી તરફ, કોંગ્રેસના કાર્યકરો સામે પણ આચારસંહિતા ભંગના આક્ષેપો ઊઠ્યા છે.વોર્ડ નંબર 16ના એક મતદાન મથક પર કોંગ્રેસના કાર્યકરો પક્ષના ચિહ્નવાળા ખેસ પહેરીને હાજર હોવાનું સામે આવ્યું હતું.ભાજપના કાર્યકરોએ આ સામે ભારે વિરોધ નોંધાવતાં બંને પક્ષના કાર્યકરો વચ્ચે મતદાન મથક બહાર જ ઉગ્ર બોલાચાલી અને તું-તું મેં-મેં થઈ હતી.કોંગ્રેસના કાર્યકરોએ બચાવ કરતા જણાવ્યું હતું કે, 'ભાજપના લોકો ઢોલ-નગારા સાથે પ્રચાર કરે છે તે તંત્રને દેખાતું નથી અને માત્ર કોંગ્રેસના કાર્યકરોને જ લક્ષ્ય બનાવવામાં આવી રહ્યા છે.' પેટા ચૂંટણી દરમિયાન બંને પક્ષો દ્વારા એકબીજા પર આક્ષેપ-પ્રત્યાક્ષેપ ચાલુ રહેતાં સમગ્ર માંજલપુર પંથકમાં ભારે રાજકીય ચર્ચા જાગી છે.

પોલીસે સ્થળ પર પહોંચી કોંગ્રેસના ખેસ હટાવાવ્યા
ભાજપ અને કોંગ્રેસ વચ્ચે તકરાર વધતાં જ ઘટનાસ્થળે અફરાતફરી મચી ગઈ હતી. મામલો વધુ બિચકે તે પહેલાં જ સ્થાનિક પોલીસનો (Police) કાફલો તાત્કાલિક સ્થળ પર દોડી આવ્યો હતો. પોલીસે સ્થિતિ પર કાબૂ મેળવવા માટે કોંગ્રેસના કાર્યકરોના ટેબલ પરથી તેમજ તેમના ગળામાંથી પક્ષના ખેસ તાત્કાલિક હટાવી દીધા હતા અને શાંતિ જાળવવા કડક સૂચના આપી હતી.

ભાજપના સતીષ પટેલ અને કોંગ્રેસના ભીખાભાઈ રબારી વચ્ચે સીધી ટક્કર
આ પેટાચૂંટણીમાં મુખ્ય મુકાબલો ભારતીય જનતા પાર્ટી અને કોંગ્રેસ વચ્ચે છે. ભાજપ તરફથી સતીષ પટેલ (Satish Patel) અને કોંગ્રેસ તરફથી ભીખાભાઈ રબારી ચૂંટણી મેદાનમાં છે. બંને પક્ષો દ્વારા ચૂંટણી પ્રચારમાં પૂરજોશ લગાવવામાં આવ્યો હતો અને હવે મતદારો કોના પક્ષમાં નિર્ણય આપે છે તે જોવું રસપ્રદ બની રહેશે.

જાણીતા આગેવાનોએ કર્યું મતદાન
શહેર ભાજપ પ્રમુખ ડો. જયપ્રકાશ સોનીએ મતદાન કર્યું.કોંગ્રેસના ઉમેદવાર ભીખાભાઈ રબારીએ ભવન્સ સ્કૂલ ખાતે મતદાન કર્યું.બંને આગેવાનોએ મતદારોને વધુમાં વધુ મતદાન કરવાની અપીલ કરી.

મતદાનને લઈ ચુસ્ત બંદોબસ્ત
શહેરભરમાં પોલીસનો કડક બંદોબસ્ત ગોઠવાયો.સંવેદનશીલ મતદાન મથકો પર SRP અને QRT તૈનાત કરાઈ.CCTV અને વેબકાસ્ટિંગ દ્વારા સતત દેખરેખ રાખવામાં આવી.ચૂંટણી અધિકારીઓ સતત મોનીટરિંગ કરતા રહ્યા.