વડોદરા: પાણીગેટ પોલીસ લોકઅપમાં આરોપીનો આપઘાત

વડોદરાના પાણીગેટ પોલીસ સ્ટેશનના લોકઅપમાં આજે વહેલી સવારે એક ચોંકાવનારી ઘટના બની છે. પત્ની સાથેના ઘરકંકાસના મામલે અટકાયત કરાયેલા 40 વર્ષીય રમેશ વસાવાએ લોકઅપના ટોઇલેટમાં ગળાફાંસો ખાઈને આત્મહત્યા કરી લીધી છે. આ ઘટનાને પગલે વડોદરા પોલીસ તંત્રમાં દોડધામ મચી ગઈ છે અને કસ્ટોડિયલ ડેથના ગંભીર સવાલો ઉભા થયા છે.   સમગ્ર ઘટનાક્રમ:   મળતી માહિતી મુજબ, રમેશ વસાવા વિરુદ્ધ તેની પત્નીએ 20 જાન્યુઆરીએ મારપીટની ફરિયાદ કરી હતી. પોલીસે 21 જાન્યુઆરીની વહેલી સવારે અટકાયત કરી લોકઅપમાં રાખ્યા હતા. સીસીટીવી ફૂટેજ મુજબ, સવારે 6:43 વાગ્યે રમેશ ટોઇલેટમાં ગયો હતો અને પોતાની હૂડી (સ્વેટર)ની દોરીનો ઉપયોગ કરી બારી સાથે ફાંસો ખાઈ લીધો હતો. અન્ય એક આરોપીએ આ જોતા બૂમાબૂમ કરી હતી, પરંતુ ત્યાં સુધીમાં મોડું થઈ ચૂક્યું હતું.   પરિવારના આક્ષેપો:   મૃતકની બહેને પોલીસ અને તેના ભાઈની પત્ની પર રોષ ઠાલવ્યો છે. મૃતકની બહેને પોલીસ પર ગંભીર આક્ષેપ કરતા કહ્યું કે, "મારા ભાઈને મારી નાખવામાં આવ્યો છે."    બીજી તરફ, કાયદા નિષ્ણાતોના મતે સુપ્રીમ કોર્ટની ગાઈડલાઈન મુજબ ફેમિલી કે સિવિલ મેટરમાં પ્રાથમિક તપાસ વગર સીધી અટકાયત કરવી એ નિયમોનું ઉલ્લંઘન છે. સેક્શન 151નો દુરુપયોગ થયો હોવાની આશંકા પણ સેવાઈ રહી છે.   તપાસનો ધમધમાટ:   ડીસીપી અભિષેક ગુપ્તાએ જણાવ્યું હતું કે, સમગ્ર મામલે એસડીએમ (SDM) ની હાજરીમાં પંચનામું કરવામાં આવશે અને પેનલ ડોક્ટરો દ્વારા વીડિયોગ્રાફી સાથે પોસ્ટમોર્ટમ કરાશે. જો પોલીસની કોઈ પણ પ્રકારની બેદરકારી સામે આવશે તો કડક કાર્યવાહી કરવામાં આવશે.