ગુજરાતના ત્રણ સ્કિન સ્પેશિયાલિસ્ટ ડોક્ટર સસ્પેન્ડ!

3 skin specialist doctors suspended: ગુજરાત મેડિકલ કાઉન્સિલ (GMC)એ રાજ્યના ત્રણ જાણીતા સ્કિન સ્પેશિયાલિસ્ટ ડોક્ટરો સામે શિસ્તભંગની કાર્યવાહી કરી છે. મેડિકલ એથિક્સના નિયમોનું ઉલ્લંઘન કરવા બદલ કાઉન્સિલે ત્રણેય ડોક્ટરોને 13 મહિના માટે સસ્પેન્ડ કર્યા છે. આ સમયગાળા દરમિયાન તેમનું મેડિકલ રજિસ્ટ્રેશન પણ સ્થગિત કરાયું હોવાથી તેઓ તબીબી પ્રેક્ટિસ કરી શકશે નહીં.

સુરતના બે અને અમદાવાદના એક ડોક્ટર સામે કાર્યવાહી
સસ્પેન્ડ કરાયેલા ડોક્ટરોમાં સુરતના જાણીતા ડર્મેટોલોજિસ્ટ ડો. જગદીશ સખિયા, સ્કિન સ્પેશિયાલિસ્ટ ડો. અમી શાહ અને અમદાવાદના સ્કિન સ્પેશિયાલિસ્ટ ડો. ગીતા પટેલનો સમાવેશ થાય છે. કાઉન્સિલે જણાવ્યું છે કે, મેડિકલ વ્યવસાયની આચારસંહિતાના ભંગ બદલ આ કાર્યવાહી કરવામાં આવી છે.

પેરિસ પ્રવાસ બન્યો વિવાદનું કારણ
તપાસ દરમિયાન સામે આવ્યું કે, વર્ષ 2014 અને 2024 દરમિયાન આ ત્રણેય ડોક્ટરો ફ્રાન્સના પેરિસમાં યોજાયેલી આંતરરાષ્ટ્રીય મેડિકલ કોન્ફરન્સમાં હાજરી આપવા ગયા હતા. આ પ્રવાસ દરમિયાન એર ટિકિટ, હોટલમાં રોકાણ તેમજ અન્ય આતિથ્યનો ખર્ચ એક ફાર્માસ્યુટિકલ કંપની દ્વારા ઉઠાવવામાં આવ્યો હતો. આર્થિક લાભ સ્વીકારવાના મુદ્દે સમગ્ર મામલો વિવાદમાં આવ્યો હતો.

મેડિકલ એથિક્સ શું કહે છે?
મેડિકલ કાઉન્સિલના નિયમો મુજબ કોઈપણ નોંધાયેલા ડોક્ટર ફાર્મા, બાયોટેક અથવા મેડિકલ ડિવાઇસ કંપની પાસેથી ભેટ, સ્પોન્સરશિપ, વિદેશ પ્રવાસ કે અન્ય આર્થિક લાભ સ્વીકારી શકતા નથી. લાભ લેતાં તબીબો નિર્ણયોને પ્રભાવિત કરી શકે છે. તેથી તેને વ્યવસાયિક આચારસંહિતાનું ગંભીર ઉલ્લંઘન માનવામાં આવે છે.

13 મહિના સુધી નહીં કરી શકે પ્રેક્ટિસ
કાઉન્સિલના આદેશ બાદ ત્રણેય ડોક્ટરો આગામી 13 મહિના સુધી દેશમાં ક્યાંય પણ તબીબી પ્રેક્ટિસ કરી શકશે નહીં. તેઓ પોતાના ક્લિનિક અથવા હોસ્પિટલ પર ડોક્ટર તરીકેનું બોર્ડ પણ લગાવી શકશે નહીં. સસ્પેન્શન પૂર્ણ થયા બાદ નિયમ મુજબ ફરી રજિસ્ટ્રેશન કરાવી તેઓ પ્રેક્ટિસ શરૂ કરી શકશે.

દેશભરના ડોક્ટરોની પણ થઈ હતી તપાસ
દેશના 9 રાજ્યોમાંથી અંદાજે 30 જેટલા હેલ્થકેર પ્રોફેશનલ્સ આંતરરાષ્ટ્રીય કોન્ફરન્સમાં ભાગ લેવા માટે ફ્રાન્સના પેરિસ ગયા હતા. આ વિદેશ પ્રવાસનો તમામ ખર્ચ એબીવી હેલ્થકેર ઇન્ડિયા પ્રાઇવેટ લિમિટેડ નામની બાયોટેક કંપની દ્વારા ઉઠાવવામાં આવ્યો હતો. જેમાં પ્રતિ ડોક્ટરનો 1 લાખ રૂપિયાથી વધુનો પ્રવાસ અને આતિથ્યનો લાભ આપવામાં આવ્યો હતો. નેશનલ મેડિકલ કમિશન સમક્ષ આ મુદ્દો ઉઠાવવામાં આવ્યા બાદ તપાસ હાથ ધરાઈ હતી.

નિયમોનો સીધો ભંગ ગણાયો
મેડિકલ કાઉન્સિલના જણાવ્યા અનુસાર, ફાર્મા કંપનીઓ પાસેથી આવી સ્પોન્સરશિપ કે ભેટ સ્વીકારવી એ ઇન્ડિયન મેડિકલ કાઉન્સિલ રેગ્યુલેશન્સ 2002 ની જોગવાઈઓનો ભંગ છે. ફાર્માસ્યુટિકલ માર્કેટિંગ પ્રેક્ટિસના નિયમો હેઠળ ડોક્ટરો માટે આ પ્રકારના પ્રવાસો સંપૂર્ણપણે પ્રતિબંધિત છે. જેની સામે કાર્યવાહી કરવામાં આવી છે તે સુરતના ડો. જગદીશ સાખિયા ચામડીના રોગોના ડોક્ટરોના સંગઠન આઈએડીવીએલ (IADVL) ગુજરાત ચેપ્ટરના પ્રમુખ છે. તેઓ આગામી આંતરરાષ્ટ્રીય કોન્ફરન્સ 'ડર્માકોન 2027'ના ઓર્ગેનાઇઝિંગ સેક્રેટરી પણ છે. તેઓ અમદાવાદ, સુરત, પાલનપુર અને દુબઈમાં સ્કિન ક્લિનિક્સની મોટી ચેઈન પણ ચલાવે છે.

અપીલ કરવાનો રહેશે અધિકાર
આ નિર્ણય પહેલાં સંબંધિત ડોક્ટરોને નોટિસ પાઠવી તેમનો જવાબ માંગવામાં આવ્યો હતો. ત્યારબાદ 30 જૂનની બેઠકમાં અંતિમ નિર્ણય લેવામાં આવ્યો. જો કે,  ડોક્ટરો ઈચ્છે તો તેઓ નેશનલ મેડિકલ કમિશન (NMC) સમક્ષ આ નિર્ણય સામે અપીલ કરી શકે છે.

દાખલારૂપ કાર્યવાહી
મેડિકલ ક્ષેત્રમાં ફાર્મા કંપનીઓની સ્પોન્સરશિપ અને તેના પ્રભાવ અંગે લાંબા સમયથી ચર્ચા ચાલી રહી છે. આવી સ્થિતિમાં ગુજરાત મેડિકલ કાઉન્સિલ દ્વારા કરવામાં આવેલી આ કાર્યવાહી અન્ય તબીબો માટે પણ ચેતવણીરૂપ અને દાખલારૂપ માનવામાં આવી રહી છે.