ભૂવાએ મહિલાને આકળાના મૂળનું પાણી પીવડાવતાં મહિલાનું સારવાર દરમિયાન મોત

 

આ પહેલા પણ ભિલોડા તાલુકાના રામપુરી ગામે મહિલા ડાકણ હોવાનો વહેમ રાખી તેના કુંટુંબીએ ગોળી મારી મોત નીપજાવ્યું હોવાની  ઘટના સામે આવી હતી અને હવે અરવલ્લી જિલ્લાના માલપુર તાલુકાના પીપરાણા પંથકના એક ભૂવા દ્વારા શરીરે દુઃખાવાની પીડાથી પીડાતી મહિલાને તાંત્રિક વીધી બાદ આકળાના મુળનું પાણી પીવડાવતા આ ૨૧ વર્ષિય મહિલાના શરીરમાં વ્યાપક ઝેર ફેલાતાં તબીયત લથડી હતી. મોડાસા ખાતેની ખાનગી હોસ્પિટલમાં સારવાર હેઠળ રખાયેલ મહિસાગર જિલ્લાના ખાનપુરની આ મહિલાને વધુ સારવાર માટે અમદાવાદ લઈ જતી વેળાએ મોત નીપજયું હતું. 

મૃતક મહિલાના મૃતદેહને પોસ્ટ મોર્ટમ માટે માલપુરના સરકારી દવાખાને લવાયો હતો. અને જે ભુવાને કારણે આ મહિલા મોતના મુખમાં ધકેલાઈ હતી તે ભૂવા વિરૂધ્ધ ફરીયાદ નોંધાવવા તજવીજ હાથ ધરાઈ હતી. 

 

અંધશ્રધ્ધાને લઈ કેટલાય પરીવારો માનસિક અને આર્થિક રીતે પીડાઈ રહયા છે. આ વહેમ કેટલાયનો જીવ લઈ રહયો છે ત્યારે કાયદાઓ સાથે સામાજિક ચિંતન જરૂરી મનાઈ રહયું છે.