6.2 ડિગ્રી સાથે નલિયા ઠુંઠવાયું

ગુજરાતમાં ખરેખરો ડિસેમ્બર મહિનાની ગુલાબી ઠંડીનો માહોલ જામ્યો છે. નલિયામાં છેલ્લા પાંચ દિવસથી કોલ્ડ વેવની અસર વર્તાઈ રહી છે. હજુ પણ ઉત્તર દિશા તરફથી આવતા ઠંડા પવનોને કારણે નલિયા સહિત સૌરાષ્ટ્ર-કચ્છ અને ઉત્તર તથા મધ્ય ગુજરાતમાં ઠંડીનું પ્રમાણ વધુ રહેવાની શક્યતાઓ છે.

 આગામી 24 કલાક હજુ પણ ગુજરાતનું વાતાવરણ યથાવત્ રહેશે. જોકે, મધ્ય અને ઉત્તર ગુજરાતના ભાગોમાં ઉત્તર અને ઉત્તર પૂર્વ દિશા તરફથી આવતા પવનોને કારણે દિવસ દરમિયાન મહત્તમ તાપમાન અને રાત્રે લઘુત્તમ તાપમાનમાં અડધાથી એક ડિગ્રી સેલ્સિયસનો વધારો કે ઘટાડો નોંધાઈ શકે છે. દિવસ દરમિયાન ફુકાતા ઠંડા પવનોને કારણે દિવસે પણ ઠંડીનો અનુભવ થશે.

છેલ્લા 24 કલાક દરમિયાન રાજ્યના સાત જિલ્લાઓનું લઘુત્તમ તાપમાન 12 ડિગ્રી સેલ્સિયસ કરતા ઓછું નોંધાયું હતું. જેમાં નલિયામાં રાજ્યનું સૌથી ઓછું 6.2 ડિગ્રી સેલ્સિયસ લઘુત્તમ તાપમાન નોંધાયું હતું. નલિયામાં છેલ્લા બે દિવસથી ઠંડીનો પારો નીચે આવતા બજારમાં દુકાનો 10 વાગ્યા બાદ ખુલવા લાગી છે. તો વહેલી સવારના બસ સ્ટેશન પર ઓછી સંખ્યામાં મુસાફરો દેખાય છે. મોટા ભાગની બસ નહિવત મુસાફરો સાથે ઉપડે છે. આગામી દિવસોમાં જેમજેમ ઠંડીનું જોર વધશે, તેમ નલિયા સહિત અબડાસા તાલુકાના જનજીવન પર અસર થશે.