જેતપુર સાડી ઉદ્યોગ પર મધ્યપૂર્વ યુદ્ધની માઠી અસર

રાજકોટ જિલ્લાના જેતપુર શહેરની ઓળખ સમાન સાડી અને ટેક્સટાઈલ ઉદ્યોગ અત્યારે ઇતિહાસના સૌથી કપરા સમયમાંથી પસાર થઈ રહ્યો છે. મધ્યપૂર્વ (મિડલ ઈસ્ટ)માં ચાલી રહેલા યુદ્ધના કારણે વૈશ્વિક સ્તરે સર્જાયેલી અસ્થિરતાની સીધી અસર જેતપુરના ડાઈંગ અને પ્રિન્ટિંગ ઉદ્યોગ પર જોવા મળી રહી છે. કાચા માલના ભાવમાં અસહ્ય ઉછાળો અને ઈંધણની અછતને કારણે સ્થાનિક ઉદ્યોગકારોની ચિંતામાં મોટો વધારો થયો છે.

ઉત્પાદન ખર્ચમાં 30 ટકા સુધીનો તોતિંગ વધારો : 

જેતપુર ડાઈંગ એન્ડ પ્રિન્ટિંગ એસોસિયેશન દ્વારા કરવામાં આવેલા આંતરિક સર્વેક્ષણ મુજબ, સાડીના ફિનિશિંગ અને પ્રિન્ટિંગ માટે વપરાતા કલર, કેમિકલ્સ તેમજ પેકિંગ મટીરિયલના ભાવમાં છેલ્લા કેટલાક સમયમાં 20 થી 30 ટકાનો ધરખમ વધારો થયો છે. માત્ર કાચો માલ જ નહીં, પરંતુ એકમો ચલાવવા માટે જરૂરી કોલસા અને કોમર્શિયલ એલપીજી ગેસના ભાવમાં પણ સમાન સ્તરે વધારો નોંધાયો છે. આ આર્થિક બોજાને પહોંચી વળવા માટે એસોસિયેશને હવે જોબવર્કના ભાવમાં પ્રતિ મીટર 2 રૂપિયા અને સાડી દીઠ 10 રૂપિયાનો વધારો કરવાનો નિર્ણય લીધો છે.

એલપીજી ગેસની અછત અને મશીનરી પર બ્રેક : 

ભાવવધારાની સાથે અત્યારે સૌથી મોટી સમસ્યા કોમર્શિયલ એલપીજી ગેસના પુરવઠાની છે. યુદ્ધની સ્થિતિને કારણે ગેસના સપ્લાયમાં વિક્ષેપ પડતા જેતપુરના અનેક મોટા પ્રિન્ટિંગ એકમો પાસે ઉત્પાદન બંધ કરવા સિવાય કોઈ વિકલ્પ બચ્યો નથી. ઘણા કારખાનેદારો અત્યાર સુધી ખોટ ખાઈને પણ એકમો ચલાવી રહ્યા હતા, પરંતુ હવે ઈંધણની તીવ્ર અછતના કારણે ઉત્પાદન સાવ તળિયે પહોંચી ગયું છે.

80 હજાર શ્રમિકોના ભવિષ્ય પર પ્રશ્નાર્થ : 

જેતપુરના સાડી ઉદ્યોગ સાથે પ્રત્યક્ષ અને પરોક્ષ રીતે આશરે 80,000 થી વધુ શ્રમિકો જોડાયેલા છે. જો આ જ પરિસ્થિતિ લાંબો સમય ચાલુ રહેશે તો આ હજારો પરિવારોની રોજીરોટી છીનવાઈ જવાનો ડર સેવાઈ રહ્યો છે. ટેક્સટાઈલ એકમો બંધ થવાની અસર માત્ર કારખાનેદારો પર જ નહીં, પરંતુ શહેરના નાના વેપારીઓ અને આનુસંગિક વ્યવસાયો પર પણ પડશે, જે જેતપુરના આર્થિક તંત્રને હચમચાવી શકે છે.

ઉદ્યોગને બચાવવા માટેના પ્રયાસો : 

સ્થાનિક એસોસિયેશન અને ઉદ્યોગપતિઓ અત્યારે આ વિકટ પરિસ્થિતિમાંથી માર્ગ કાઢવા માટે મથામણ કરી રહ્યા છે. જેતપુરની આર્થિક જીવાદોરી ગણાતા આ ઉદ્યોગને જો જલ્દી સરકારી મદદ કે વૈશ્વિક બજારમાં રાહત નહીં મળે, તો આગામી દિવસોમાં મોટા પાયે બેરોજગારી અને આર્થિક મંદીની શક્યતા નકારી શકાય તેમ નથી.