અમદાવાદના આ 5 નાનકડાં વિસ્તારોની બદલાશે રોનક

ગુજરાતના આંગણે ભવ્ય ઓલિમ્પિક રમત રમાવા જઈ રહી છે. ગુજરાતે ઓલિમ્પિક 2036 માટે બીડ કર્યું છે. તેના માટે સરકાર અત્યારથી જ આયોજન કરી રહી છે. ઓલિમ્પિકની તડામાર તૈયારીઓ વચ્ચે અમદાવાદના 5 નાનકડા વિસ્તારોની રોનક બદલાઈ જશે. આગામી સમયમાં આ વિસ્તારો ઓળખી ન શકાય તેવા બનશે, અને વિદેશી શહેરોની જેમ હરણફાળ ભરશે. અમદાવાદ આસપાસ 12થી 25 કિમી વિસ્તારમાં 5 શહેર ઓલિમ્પિક પહેલાં સેટેલાઈટ ટાઉન બનાવવાનું આયોજન છે. જેમાં કલોલ, સાણંદ, દહેગામ, બારેજા, મહેમદાવાદની સિકલ બદલાશે.

ભારતમાં ઓલિમ્પિકની તૈયારીઓ માટે મોટું પગલું ભરાયું છે. ભારતીય ઓલિમ્પિક સંઘે 2036 ના ઓલિમ્પિકની મેજબાની કરવા માટે આંતરરાષ્ટ્રીય ઓલિમ્પકને ઔપચારિક રીતે એક પત્ર સોંપ્યો છે. હાલ જવાબની રાહ જોવાઈ રહી છે. રિપોર્ટ અનુસાર, આ પત્ર 1 ઓક્ટોબરના રોજ સોંપવામાં આવ્યો હતો. ત્યારે અમદાવાદ ઓલિમ્પક માટે તૈયાર થઈ રહ્યું છે. આ માટે અમદાવાદની આસપાસના 5 વિસ્તારોની પસંદગી કરવામાં આવી છે.

સેટેલાઇટ ટાઉન એવા નગરો છે, જે મુખ્ય શહેરની નજીક સ્થિત હોય છે અને તેની વધતી જતી વસતી અને આર્થિક પ્રવૃત્તિઓને સમર્થન આપે છે. આ શહેરોમાં આધુનિક સુવિધાઓ, ટ્રાન્સપોર્ટેશન, અને રહેણાંક વિકલ્પો ઉપલબ્ધ હોય છે, જે મુખ્ય શહેર પરનો ભાર ઘટાડવામાં મદદરૂપ થાય છે.

ઓલિમ્પિકની તૈયારીઓના ભાગરૂપે, અમદાવાદમાં સરદાર વલ્લભભાઈ પટેલ સ્પોર્ટ્સ એન્ક્લેવ, નારણપુરા ઇન્ટરનેશનલ સ્પોર્ટ્સ કોમ્પ્લેક્સ, અને રિવરફ્રન્ટ સ્પોર્ટ્સ કોમ્પ્લેક્સ જેવા પ્રોજેક્ટ્સ પર કામ ચાલી રહ્યું છે. આ પ્રોજેક્ટ્સમાં વિવિધ રમતો માટેની સુવિધાઓ, ખેલાડીઓ માટે રહેણાંક, અને અન્ય આવશ્યક ઇન્ફ્રાસ્ટ્રક્ચરનો સમાવેશ થાય છે. આ આયોજનથી અમદાવાદ અને તેની આસપાસના વિસ્તારોમાં વિકાસની નવી તકો ઊભી થશે અને શહેરની આંતરરાષ્ટ્રીય ઓળખમાં વધારો થશે.