અલ્પેશ કથિરીયાનો ફરી પડકાર, ગોંડલમાં બે નંબરનું શું-શું ચાલે છે એ પુરાવા સાથે લાવીશું'

ગોંડલમાં અલ્પેશ કથિરીયા વિરુદ્ધ ગણેશ ગોંડલ વચ્ચેનો જંગ હજું પણ શાંત પડ્યો નથી. પાટીદાર અને ક્ષત્રિયો વચ્ચે આરપારની લડિ જોવા મળી રહી છે. રવિવારે ગણેશ ગોંડલના પડકાર બાદ અલ્પેશ કથિરીયા અને જીગીશા પટેલ સહિતના પાટીદાર અગ્રણીઓ ગોંડલ પહોંચ્યા હતા જ્યાં ભારે ધમાસાણ થયું હતું. હવે ફરી એક વાર અલ્પેશ કથિરીયાએ ગણેશ ગોંડલ પર નિશાન સાધ્યું છે. 

સુરતના મોટા વરાછા વિસ્તારમાં ગુરુકૃપા ફાર્મ હાઉસ ખાતે અલ્પેશ કથીરિયાનો સ્નેહમિલન કાર્યક્રમ યોજાયો હતો. જેમાં સમાજ દ્વારા અલ્પેશ કથિરીયાનું સન્માન કરાયું હતું. આ કાર્યક્રમ દરમિયાન તેમણે ફરી એકવાર ગોંડલની ચર્ચા કરી હતી.  જાહેર મંચ ઉપરથી તેમણે કેટલાક મહત્વના મુદ્દાઓને લઈને આગામી દિવસોમાં તેમની રણનીતિ અંગે વાત કરી હતી.

ગોંડલના ગણેશ જાડેજા દ્વારા જે પ્રકારે અલ્પેશ કથીરિયાને પડકાર ફેંકવામાં આવ્યો હતો, તેનો જવાબ ફરી અલ્પેશ કથિરિયાએ આપ્યો છે.  કથિરિયાએ જાહેર મંચથી જણાવ્યું કે, સૌરાષ્ટ્રમાં કહેવત છે કે માના દૂધને પડકાર ફેકે અને કોઈ ગાળો આપે તે કોઈ ન ખાય, ગોળી ખાઈ લે. ગોંડલમાં મજા પડે ત્યારે ફરવા જઈશું. હવે ગાડીઓમાં નુકસાન તો શું એક કાર્યકરનો કોલર પણ પકડી ન શકે તેવી તૈયારી હશે તેવી ચીમકી તેમણે આપી હતી. અલ્પેશ કથીરિયાએ કહ્યું કે, ગોંડલમાં બે નંબરનું શું-શું ચાલે છે એ પુરાવા સાથે લાવીશું.