અમદાવાદમાં વાસણામાં લુખ્ખા તત્વોનો આતંક ચરમસીમાએ

સ્માર્ટ સિટી અમદાવાદમાં જાણે કાયદો અને વ્યવસ્થાના લીરેલીરા ઉડી રહ્યા હોય તેમ લુખ્ખા તત્વો બેફામ બન્યા છે. શહેરના વાસણા વિસ્તારમાં ગઈકાલે મોડી રાત્રે ફિલ્મી સ્ટાઈલમાં એક કાર પર હુમલો કરી તોડફોડ કરવાની ઘટના સામે આવી છે. આ ઘટનાએ પોલીસના પેટ્રોલિંગ અને ગુનેગારોમાં પોલીસના ડર પર અનેક પ્રશ્નો ઉભા કર્યા છે.

મધરાતે આતંકનો માહોલ:

ગઈકાલે રાત્રે આશરે 12 વાગ્યાના સુમારે જ્યારે શહેર શાંત થઈ રહ્યું હતું, ત્યારે વાસણાના પ્રવીણનગર પાસે એક સફેદ રંગની બ્રેઝા કારે એક થાર ગાડીનો પીછો કર્યો હતો. હુમલાખોરોએ થારને રસ્તાની વચ્ચે આંતરીને ઉભી રખાવી હતી. કાર ઉભી રહેતાની સાથે જ બ્રેઝામાંથી ચાર શખ્સો લોખંડના પાઈપ અને લાકડાના ધોકા સાથે નીચે ઉતર્યા હતા અને કાંઈ પણ પૂછ્યા વગર થારના કાચ ફોડવાનું શરૂ કરી દીધું હતું.

ખાખીની હાજરીમાં જ ગુંડાગીરી:

સૌથી ચોંકાવનારી બાબત એ છે કે જ્યારે આ લુખ્ખાઓ સરેઆમ આતંક મચાવી રહ્યા હતા, ત્યારે નજીકમાં જ એક પોલીસ કોન્સ્ટેબલ હાજર હોવાનું ચર્ચાઈ રહ્યું છે. સીસીટીવી ફૂટેજમાં હુમલાખોરોની બેફામતા સ્પષ્ટ દેખાય છે, છતાં પોલીસ કર્મચારી મૂકપ્રેક્ષક બનીને તમાશો જોતા રહ્યા હોય તેમ જણાય છે. આ ઘટના બાદ વાસણા પોલીસની કામગીરી પર ગંભીર સવાલો ઉઠી રહ્યા છે કે શું પોલીસ ગુંડાઓથી ડરી રહી છે કે પછી તેમને છાવરી રહી છે?

પોલીસની તપાસ: 

રહેણાંક વિસ્તારમાં મધરાતે થયેલી આ તોડફોડ અને સંભવિત અપહરણના પ્રયાસથી સ્થાનિક રહીશોમાં ભયનો માહોલ છે. હુમલા પાછળ અંગત અદાવત છે કે લૂંટનો ઈરાદો, તે હજુ સુધી સ્પષ્ટ થયું નથી. વાસણા પોલીસે હાલમાં તપાસ હાથ ધરી હોવાનો દાવો કર્યો છે, પરંતુ સ્થાનિકો તેને માત્ર કાર્યવાહીનો દેખાડો ગણાવી રહ્યા છે.