તલાટી-કમ-મંત્રીઓની આજથી હડતાળ, વધારાનું કામ બંધ

Talati-cum-ministers' strike: ગુજરાત રાજ્ય તલાટી-મંત્રી મહામંડળે રાજ્ય સરકાર સામે અસહકાર આંદોલનની જાહેરાત કરી છે. મહામંડળના નિર્ણય મુજબ 3 જુલાઈ, 2026થી રાજ્યના અંદાજે 11 હજાર તલાટી-કમ-મંત્રીઓ મહેસૂલ વિભાગની ફરજિયાત કામગીરી સિવાયની તમામ વધારાની સરકારી કામગીરીથી દૂર રહેશે. આ નિર્ણયનો અમલ રાજ્યભરમાં એક સાથે કરવામાં આવશે. ગુજરાત રાજ્ય તલાટી મહામંડળના પ્રમુખ પંકજ મોદી અને મહામંત્રી રામભાઈ દેસાઈ દ્વારા સત્તાવાર યાદી જાહેર કરી રાજ્યભરના તમામ તલાટીઓને આ નિર્ણયનો અમલ કરવા આદેશ કરાયો છે.

જોબચાર્ટ નક્કી કરવાની માંગ મુખ્ય મુદ્દો
તલાટી-કમ-મંત્રીઓનું કહેવું છે કે વર્ષોથી તેમના કાર્યક્ષેત્ર અને જવાબદારીઓ અંગે જોબચાર્ટ નક્કી કરવાની માંગ સરકાર સમક્ષ કરવામાં આવી રહી છે. મૌખિક અને લેખિત રજૂઆતો તેમજ અનેક બેઠકો છતાં આ મુદ્દે કોઈ અંતિમ નિર્ણય લેવામાં આવ્યો નથી. તેના કારણે તલાટીઓમાં અસંતોષ વધ્યો છે.

નવી ભરતી બાદ અસંતોષ વધુ વધ્યો
સરકારે તાજેતરમાં નવા રેવન્યુ તલાટીઓની નિમણૂકના આદેશો જાહેર કર્યા છે. મહામંડળનું માનવું છે કે જૂની માંગણીઓનો ઉકેલ લાવ્યા વિના નવા કર્મચારીઓની ભરતી કરવામાં આવતા હાલના તલાટી-કમ-મંત્રીઓમાં રોષ વધુ ભભૂક્યો છે. તેના વિરોધ સ્વરૂપ આ આંદોલન શરૂ કરવાનો નિર્ણય લેવાયો છે.

કઈ કામગીરીઓ પર પડશે અસર?
આંદોલન દરમિયાન તલાટી-કમ-મંત્રીઓ મહેસૂલી કામગીરી સિવાયની અનેક સરકારી જવાબદારીઓ બજાવશે નહીં. તેમાં ડિજિટલ એગ્રીકલ્ચર હેઠળ ફાર્મર રજિસ્ટ્રેશન, ડિજિટલ પાક સર્વે, વિવિધ વિભાગોના સર્વે, સરકારી નોંધપોથી અને હિસાબોની કામગીરી, રેશનકાર્ડ સંબંધિત પ્રક્રિયા તેમજ ગ્રામ પંચાયત સ્તરે આપવામાં આવતા વિવિધ દાખલાઓ જેવી સેવાઓનો સમાવેશ થાય છે.

કઈ કામગીરી બંધ રહેશે?

મહામંડળે જાહેર કરેલા સત્તાવાર પરિપત્ર મુજબ, તલાટીઓ હવે પોતાના મૂળ મહેસૂલી કામો સિવાયની 50થી વધુ પ્રકારની વધારાની સરકારી જવાબદારીઓ સંભાળશે નહીં. આ બહિષ્કાર હેઠળ નીચે મુજબની મહત્વની કામગીરીઓ અટકી જશે:

-ડિજિટલ ક્રોપ સરવે: એગ્રીસ્ટેક ફાર્મર રજિસ્ટ્રેશન અને ડિજિટલ ક્રોપ સરવે (પાક સર્વેક્ષણ)
-ગ્રામીણ સર્વેક્ષણ: સરકારના વિવિધ વિભાગો દ્વારા અવારનવાર કરાવવામાં આવતા જુદા-જુદા સરવે
-રેકોર્ડ અને હિસાબ: વાર્ષિક હિસાબો તૈયાર કરવા, વિવિધ સરકારી નોંધપોથી અને રેકોર્ડની જાળવણી
-જનસુવિધા: રેશનકાર્ડ સંબંધિત કામગીરી તેમજ પંચાયત સ્તરેથી અપાતા વિવિધ પ્રમાણપત્રો (દાખલાઓ)

કલેક્ટર અને DDOને કરાશે રજૂઆત
મહામંડળના જિલ્લા હોદ્દેદારો પોતાના જિલ્લાનાં કલેક્ટર અને જિલ્લા વિકાસ અધિકારીને આવેદનપત્ર આપશે. સાથે આંદોલન અંગેના નિર્ણયની નકલ પણ સોંપવામાં આવશે. મહામંડળે જણાવ્યું છે કે સરકાર તરફથી લેખિત અને સ્પષ્ટ નિર્ણય નહીં આવે ત્યાં સુધી અસહકાર યથાવત રહેશે.

ગામડાઓમાં વહીવટ પર પડી શકે અસર
તલાટી-કમ-મંત્રીઓની આ કાર્યવાહીથી રાજ્યની ગ્રામ પંચાયતોમાં રોજિંદા વહીવટી કામકાજ પર અસર પડી શકે છે. ખેડૂતો, વિદ્યાર્થીઓ અને ગ્રામજનોને મળતી વિવિધ સરકારી સેવાઓમાં વિલંબ થવાની શક્યતા છે. જો સરકાર અને મહામંડળ વચ્ચે વહેલી તકે સમાધાન નહીં થાય તો ગ્રામ્ય વિસ્તારોમાં વહીવટી કામગીરી વધુ પ્રભાવિત થઈ શકે છે.