નડિયાદમાં લઠ્ઠાકાંડ કે સોડાકાંડ? ગુજરાતમાં હવે સોડા પીવાથી પણ થાય છે મોત

ગુજરાતમાં હવે સોડા પીવાથી પણ મોત થઈ રહ્યાનું સામે આવ્યુ છે. ખેડા જિલ્લાના નડિયાદમાં રવિવારે રાત્રે 3 લોકોના શંકાસ્પદ મોત થયા હતા. આ ત્રણેય વ્યક્તિઓએ મોડી રાત્રે શંકાસ્પદ પીણું પીધુ હોવાનું જાણવા મળ્યુ હતુ. હોસ્પિટલ પહોંચેલા મૃતકોના સગાઓએ દેશી દારૂ પીવાથી મોત થયાનું માધ્યમો સમક્ષ જણાવ્યુ હતુ. જો કે, ખેડાના એસપી ડો. રાજેશ ગઢીયાએ મૃતકોના બ્લડ સેમ્પલમાં મિથેનોલ આલ્કોહોલની હાજરી નહી હોવાની સ્પષ્ટતા કરી છે. મૃતકોના બ્લડ સેમ્પલ લઈને એફએસએલમાં મોકલ્યા હતા. એફએસએલના રિપોર્ટમાં ઝીરો મિથેનોલ આલ્કોહોલ મળ્યો છે. જો કે, જીરા સોડા પીધા બાદ ત્રણેય વ્યક્તિઓને અસર થઈ હોવાનું એક નજરે જોનાર વ્યક્તિએ કહ્યાનું એસપીએ જણાવ્યુ છે. ત્યારે નડિયાદમાં બનેલી ઘટના લઠ્ઠાકાંડ છે કે સોડાકાંડ તે મુદ્દે અનેક સવાલ ઉઠ્યા છે.

નડિયાદ શહેરના જવાહરનગર વિસ્તારમાં રવિવારે મોડી રાત્રે શંકાસ્પદ સંજોગોમાં ત્રણ વ્યક્તિઓનાં મોત થયા છે. માત્ર અડધા કલાકમાં ત્રણ વ્યક્તિઓનાં મોત નિપજતા અરેરાટી ફેલાઈ હતી. મૃતકના પરિવારજનોએ દારૂ પીવાથી મોત થયાના આક્ષેપો કરતાં લઠ્ઠાકાંડની આશંકા સેવાઈ રહી છે. જોકે, ત્રણેય લોકોએ જીરા સોડા પીતા 5 મિનિટમાં અસર થઈ હતી અને 3 કલાકમાં જ મોત થયું હોવાનું નજરે જોનાર એક વ્યક્તિએ કહ્યુ હોવાનો પોલીસે દાવો કર્યો છે. ત્યારે સોડાકાંડ છે કે લઠ્ઠાકાંડ તે મામલે પોલીસે તપાસ હાથ ધરી છે.

ખેડાના જિલ્લા પોલીસ વડા રાજેશ ગઢિયાએ માધ્યમોને આપેલાં નિવેદનમાં જણાવ્યું કે, ઘટનાની જાણ થતાં જ પોલીસ તાત્કાલીક પહોંચી હતી. મૃતકોના બ્લડ સેપ્મલ લઈ રાત્રે FSLમાં મોકલી દીધા હતા. બ્લડ રિપોર્ટમાં ઈથાઈલ આલ્કોહોલની હાજરી ઝીરો આવી છે. 'જીરા સોડા પીધા બાદ તમામની તબિયત બગડી' હોવાનું તેમણે જણાવ્યું હતુ. ગઢીયાએ ઉમેર્યુ કે, ‘આ ઘટનામાં અગત્યની બાબત એવી છે નજરે જોનારની અમે પૂછપરછ કરી હતી. તેઓએ અમને જણાવ્યું કે, આ મૃતકો પૈકી કનુ ચૌહાણ ઝીરા સોડાની બોટલ લઈને આવ્યો હતો. આ સોડા ત્રણેય લોકોએ પીધી હતી. નજરે જોનારને પણ સોડા પીવા કહ્યું હતું. જોકે, તેણે ના કહી હતી. સોડા પીધા બાદ રવિન્દ્રને વોમીટ થવા લાગી હતી અને તે બેભાન થઈ ગયો હતો. તેથી તાત્કાલિક હોસ્પિટલ ખસેડાયો હતો. અન્ય બે વ્યક્તિઓને પણ તકલીફ થતાં હોસ્પિટલ ખસેડવામાં આવ્યાં હતા. હોસ્પિટલમાં સારવાર દરમિયાન ત્રણેયનાં મોત થયા હતા.

SP રાજેશ ગઢિયાએ જણાવ્યું કે, એફએસએલ અધિકારીની હાજરીમાં સોડાની બોટલને ડસ્ટબિનમાંથી કબજે લેવામાં આવી છે. બોટલમાં કોઈ ઝેરી પ્રવાહી છે કે નહીં તે ખબર પડે. આ પીણું પીધા બાદ તેમને અસર થઈ હતી. આ કેસની તપાસ LCBને સોંપવામાં આવી છે. ઝેરી પીણાની બોટલ ક્યાંથી લાવ્યા, આ બોટલ કોણે અને ક્યાંથી આપી?  તે મામલે તપાસ હાથ ધરવામાં આવી છે. ઝેરી પીણાં બાબતે બાજુની દુકાનમાં પણ પૂછપરછ કરવામાં આવી હતી. જોકે, તે દુકાન ઉપર ઘણા લોકો સોડા પીવા આવતા હોય છે. પરંતુ આ બોટલમાંથી ત્રણ લોકોએ સોડા પીધી હતી. તે ત્રણ લોકોને જ અસર થઈ છે.

મૃતકોએ દેશી દારૂ પીધો કે ઝીરા સોડા પીધી કે બધુ મિક્સ પીધું? તેવા સવાલના જવાબમાં એસપીએ કહ્યું કે, મૃતકોના પરિવારજનોના જણાવ્યાં મુજબ ત્રણમાંથી બે લોકોને દારૂ પીવાની ટેવ હતી. જ્યારે એક વ્યક્તિ ક્યારેક ક્યારેક દારૂ પીતો હતો. મૃતકોના બ્લડ સેમ્પલ લઈને FSLને મોકલવામાં આવ્યાં છે. જેના રિપોર્ટમાં મિથેનોલ મળ્યુ નથી. નજરે જોનાર વ્યક્તિએ એટલુ કહ્યું છે કે, સોડાની બોટલમાં તેઓએ પીણું પીધુ છે. ઝેરી દ્રવ્ય શું છે તે અમારો મુખ્ય મુદ્દો છે. પોસ્ટમોર્ટમના રિપોર્ટ બાદ સાચું કારણ સામે આવશે, અત્યાર સુધીની તપાસમાં એ સ્પષ્ટ નથી થયુ કે, એ લોકો દારૂ પીવા ગયા હતા તો ક્યા ગયા હતા. મુખ્ય તપાસ એ છે કે, પાંચ જ મિનિટમાં આટલી ગંભીર અસર થવી. કોઈ ઝેરી પ્રવાહીના કારણે તાત્કાલિક ગંભીર અસર થઈ છે.

નડિયાદના જવાહરનગર વિસ્તારમાં વર્ષ 2008માં લઠ્ઠાકાંડ થયો હતો. ઘટના સ્થળ છે તે બુટલેગરનું ઘર છે તેવી માહિતી સામે આવતા એસપીએ જણાવ્યું કે, જે જગ્યાએ ઘટના બની હતી તે સ્થળથી 40થી 50 મીટર દૂર એક દુકાન છે. કઈ જગ્યાએથી સોડા લીધી છે તે ચોક્કસ કહી શકાય નહી. કનુ ચૌહાણ સોડાની બોટલ લઈને આવ્યો હતો. 2008માં થયેલા લઠ્ઠાકાંડને અને આ ઘટનાને કોઈ કનેક્શન નથી. તે સમયે જે લોકો સંડોવાયેલા હતા. તેમાંથી કોઈ આ કેસમાં સંકળાયેલા હોય તેવું હજુ સુધી સામે આવ્યું નથી. આ ઘટનામાં મિથેનોલ બિલકુલ નથી, સોડિયમ નાઈટ્રાઈડ કે સાઈનાઈડ કે એવુ કઈ ઉપયોગ થયો હોય તો એ આપનાર વ્યક્તિ અથવા લેનાર વ્યક્તિ સામે ગુનો દાખલ થઈ શકે.

નડિયાદ ટાઉન પોલીસે મૃતદેહોનું પીએમ કરાવવાની કામગીરી હાથ ધરી છે. મૃતકના પરિવારજનોએ દેશી દારૂ પીધા બાદ ત્રણેયની તબિયત લથડી હતી અને બાદમાં મોત થયું છે તેવા ગંભીર આક્ષેપ કર્યા છે. રવિવારે રાત્રે યોગેશ કુશવાહ, રવિન્દ્ર રાઠોડ તથા કનુભાઈ ચૌહાણ નામના વ્યક્તિઓના મોત થયા હતા.

મૃતકના સંબંધી પી.કે.ચૌહાણે જણાવ્યું હતુ કે, મારો ભત્રીજો કનુ ચૌહાણ કાયમ વજન કાંટો લઈને જવાહરનગર ફાટક પાસે બેસતો હતો. તે દરરોજ દારૂ પીવે છે. આજે સાંજે પીધો હશે એટલે તેની તબિયત લથડી હતી. અમને જેવી જાણ થઈ અમે ત્યાં પહોંચ્યા અને તેને 108 એમ્બ્યુલન્સ મારફતે નડિયાદ સિવિલ હોસ્પિટલમાં લાવ્યા હતા. જ્યાં ડોક્ટરે મૃત જાહેર કર્યો હતો. અડધા કલાકમાં 3 વ્યક્તિઓ દારૂ પીધા બાદ મૃત્યુ પામ્યા હોવાનું જણાવ્યું હતુ.  

ઉલ્લેખનીય છે કે, ખેડા જિલ્લામાં ડિસેમ્બર-2023માં આયુર્વેદિક સીરપ પીવાના કારણે 5 લોકોના મોત થયા હતા. જેમાં ત્રણ લોકો નડિયાદના બિલોદરાના, એક વડદલા અને એક બગડુ ગામના વ્યક્તિનો સમાવેશ થાય છે. પાંચેય લોકોએ ભેળસેળવાળી આયુર્વેદિક સિરપનું સેવન કર્યું હતું.