RTI ના નામે ખંડણી ઉઘરાવનારા શખ્સો ઝડપાયા, સુરતમાં 50 થી વધુ કેસ નોંધાયા

સુરતમાં RTI નો દુરૂપયોગ કરી ખંડણી ઉઘરાવવાનો કિસ્સો સામે આવ્યો છે. મહિધરપુરા અને લાલગેટ પોલીસ સ્ટેશન દ્વારા ત્રણ આરોપીઓની ધરપકડ કરવામાં આવી છે, જ્યારે અત્યાર સુધીમાં 50 લોકો સામે ખંડણીના ગુનાઓ નોંધાઈ ચૂક્યા છે.

RTI નો દુરુપયોગ, ખંડણીનો કૌભાંડ...

RTI (માહિતી અધિકાર અધિનિયમ) જે સામાન્ય નાગરિકોને માહિતી મેળવવા માટે સશક્ત બનાવે છે, તેનો કેટલાક શખ્સો ખોટી રીતે ઉપયોગ કરી ખંડણી ઉઘરાવી રહ્યા છે.

મહિધરપુરા પોલીસે હેમંત દેસાઈ નામના વ્યક્તિને ત્રણ અલગ-અલગ ગુનાઓમાં ઝડપી પાડ્યો. દેસાઈએ ગેરકાયદેસર મકાનના નામે 50,000 રૂપિયા અને બે જરી વેપારીઓ પાસેથી 30,000 રૂપિયા ખંડણી તરીકે વસૂલ્યા હતા.

લાલગેટ પોલીસ સ્ટેશને પણ બે શખ્સોની ધરપકડ કરી છે. જેમાં દરજી કામ કરતો શાકિર હુસેન લાખાણી અને સાપ્તાહિક પેપર સંચાલક મહંમદ અન્સારીનો સમાવેશ થાય છે. આ બંન્નેએ એક વ્યક્તિ પાસેથી પાંચ લાખ રૂપિયાની ખંડણી માંગી હતી, જેમાંથી તેઓ 1.40 લાખ રૂપિયા ઉઘરાવવામાં સફળ રહ્યા હતા.

પોલીસની કડક કાર્યવાહી...

RTI ના નામે ખંડણી ઉઘરાવનાર તત્વો સામે સુરત પોલીસે લાલ આંખ કરી છે. હાલ, પોલીસે તમામ આરોપીઓની ધરપકડ કરીને કાયદેસરની કાર્યવાહી હાથ ધરી છે.

આ કેસ દિગ્દર્શન આપે છે કે RTI જેવું લોકશાહી માટે મહત્વનું સાધન, અમુક તત્વો દ્વારા ખોટી રીતે ઉપયોગ કરી નાગરિકોને શોષણમાં મૂકવામાં આવી રહ્યા છે. સુરત પોલીસના આ પગલાંથી આવા ગેરકાયદેસર પ્રવૃતિઓ પર અંકુશ આવશે તેવી આશા રાખી શકાય.