સુરત પોલીસે સાયબર ફ્રોડનો આરોપી ઝડપી પાડ્યો

સુરત શહેરની ચોકબજાર પોલીસે સાયબર ફ્રોડના ગુનામાં સંડોવાયેલા અને મધ્યપ્રદેશની ભોપાલ પોલીસ દ્વારા જેની પર 5,000 રૂપિયાનું ઈનામ જાહેર કરવામાં આવ્યું હતું તેવા વોન્ટેડ આરોપી શૈવિન પુંભડિયાને ઝડપી પાડવામાં મોટી સફળતા મેળવી છે. આ આરોપીની ધરપકડ સાથે દેશના ચાર મુખ્ય રાજ્યોમાં ફેલાયેલા સાયબર ફ્રોડના મોટા નેટવર્કનો પર્દાફાશ થયો છે.

પોલીસની પ્રાથમિક તપાસમાં ચોંકાવનારી વિગતો બહાર આવી છે. આરોપી શૈવિન પુંભડિયા સાયબર ઠગોને પોતાના નામે અલગ-અલગ બેંકોમાં ખાતા ખોલાવી આપતો હતો. આ 'ભાડે આપેલા' બેંક એકાઉન્ટ્સનો ઉપયોગ સાયબર માફિયાઓ નિર્દોષ લોકો સાથે છેતરપિંડી કરી નાણાં મેળવવા માટે કરતા હતા. આરોપીના બેંક ખાતાઓમાં અત્યાર સુધીમાં અંદાજે 3.80 કરોડ રૂપિયા જેટલી માતબર રકમનું ટ્રાન્ઝેક્શન થયું હોવાનું સામે આવ્યું છે.

આ કૌભાંડના તાર માત્ર ગુજરાત પૂરતા મર્યાદિત નથી. આરોપીના એકાઉન્ટમાં જમા થયેલા નાણાં મધ્યપ્રદેશ, ઉત્તરપ્રદેશ, દિલ્હી અને તેલંગણા સહિતના રાજ્યોમાં આચરેલા સાયબર ફ્રોડના હોવાનું તપાસમાં ખુલ્યું છે.

ઉલ્લેખનીય છે કે, શૈવિન પુંભડિયા એક રીઢો ગુનેગાર છે. એક વર્ષ અગાઉ પણ નવી દિલ્હી સાયબર સેલ દ્વારા તેની સાયબર ફ્રોડના ગુનામાં ધરપકડ કરવામાં આવી હતી, તેમ છતાં તેણે જેલમાંથી બહાર આવી આ ગોરખધંધો ચાલુ રાખ્યો હતો.

ચોકબજાર પોલીસે બાતમીના આધારે વોચ ગોઠવીને શૈવિનને દબોચી લીધો છે. ભોપાલ પોલીસ ઘણા સમયથી આ ઈનામી આરોપીની શોધમાં હતી. હાલ સુરત પોલીસે આરોપીની અટકાયત કરી કાયદેસરની કાર્યવાહી હાથ ધરી છે અને તેનો કબજો ભોપાલ પોલીસને સોંપવા માટેની તજવીજ તેજ કરી છે. સાયબર ક્રાઈમના વધતા કિસ્સાઓ વચ્ચે સુરત પોલીસનું આ ઓપરેશન મહત્વનું માનવામાં આવે છે.