સુરત શહેરની વરાછા પોલીસે કાયદાના હાથ લાંબા હોય છે તે કહેવતને સાબિત કરી બતાવી છે. વર્ષ 2008માં માત્ર 50 રૂપિયા જેવી નજીવી રકમની ઉઘરાણીમાં એક યુવકની હત્યા કરીને નાસી છૂટેલા રીઢા ગુનેગારને પોલીસે 18 વર્ષ બાદ ઝારખંડના ગાઢ જંગલોમાંથી ઝડપી પાડ્યો છે. સુરત પોલીસનું આ ઓપરેશન કોઈ ફિલ્મી વાર્તાથી ઓછું નથી.
શું હતી 18 વર્ષ જૂની એ લોહિયાળ ઘટના ?
ઘટનાની વિગત મુજબ, વર્ષ 2008માં સુરતના વરાછા વિસ્તારમાં રાજેશ ઉર્ફે રાકેશ રોશન નામના શખ્સે બબલુ નામના યુવક પાસે પોતાના 50 રૂપિયા માંગ્યા હતા. આ મામૂલી રકમ બાબતે બંને વચ્ચે ઉગ્ર બોલાચાલી થઈ હતી. વિવાદ એટલો વધી ગયો કે આવેશમાં આવીને રાજેશે બબલુની નિર્મમ હત્યા કરી નાખી હતી. આ હત્યા બાદ ધરપકડના ડરથી આરોપી રાતોરાત સુરત છોડીને ભાગી ગયો હતો અને પોતાની ઓળખ છુપાવી અલગ-અલગ રાજ્યોમાં મજૂરી કામ કરવા લાગ્યો હતો.
પોલીસનું 'અન્ડરકવર' ઓપરેશન :&nbsp;
વરાછા પોલીસ સ્ટેશનના પી.આઈ. અને તેમની ટીમે લાંબા સમયથી પડતર ગુનાઓના નિકાલ માટે તપાસ તેજ કરી હતી. ટેકનિકલ સર્વેલન્સ અને હ્યુમન ઇન્ટેલિજન્સની મદદથી પોલીસને ચોક્કસ બાતમી મળી હતી કે આરોપી રાજેશ અત્યારે ઝારખંડના દુમકા જિલ્લાના અત્યંત દુર્ગમ અને જંગલ વિસ્તારમાં છુપાયેલો છે.
આરોપી ખૂબ જ સતર્ક હોવાથી પોલીસને પોતાની ઓળખ છુપાવવી અનિવાર્ય હતી. આથી, સુરત પોલીસની એક ખાસ ટીમ ઝારખંડ પહોંચી હતી અને ત્યાંના સ્થાનિક માહોલમાં ભળી જવા માટે સતત સાત દિવસ સુધી આદિવાસીઓ જેવો વેશ ધારણ કર્યો હતો. વેશપલટો કરીને પોલીસે જંગલ વિસ્તારમાં સતત વોચ રાખી હતી.
આખરે 18 વર્ષનો વનવાસ પૂરો થયો :&nbsp;
પોલીસની ટીમે જંગલમાં રહીને આરોપીની હિલચાલ પર ઝીણવટભરી નજર રાખી હતી. આખરે 19 માર્ચ, 2026ના રોજ જ્યારે યોગ્ય તક મળી ત્યારે પોલીસે તેને ચારેબાજુથી ઘેરી લીધો હતો અને તેને દબોચી લીધો હતો. આ રીતે દોઢ દાયકાથી વધુ સમય સુધી પોલીસને થાપ આપતો હત્યારો આખરે જેલના સળિયા પાછળ ધકેલાયો છે. આ સફળ કામગીરી બદલ સુરત પોલીસની સર્વત્ર પ્રશંસા થઈ રહી છે.&nbsp;

સુરત વરાછા પોલીસ હત્યા કેસ

વરાછા પોલીસે ઝારખંડના જંગલોમાં આદિવાસીનો વેશ ધારણ કરી 50 રૂપિયા માટે હત્યા કરનારને દબોચ્યો

March 20, 2026 | 17:52 IST