Gandhinagar : ઇન્દ્રોડા પાર્કમાં શોકનું મોજુ, સિંહણે બે મૃત બચ્ચાંને જન્મ આપ્યો

ગાંધીનગરના ઇન્દ્રોડા પ્રાણી સંગ્રહાલયમાં ગમગીની છવાઈ ગઈ છે. સક્કરબાગથી લાવવામાં આવેલી સિંહણ ગર્ભવતી હતી અને તેણે માતૃ દિવસના પૂર્વે બે મૃત બચ્ચાંને જન્મ આપ્યો છે. આ સમાચારથી પ્રકૃતિ પ્રેમીઓમાં નિરાશા ફેલાઈ ગઈ છે.

ઝૂ પ્રશાસનના જણાવ્યા અનુસાર, સવા ત્રણ વર્ષની નાની ઉંમરમાં સિંહણ ગર્ભવતી થઈ હોવાને કારણે તેના ગર્ભમાં બચ્ચાંનો યોગ્ય વિકાસ થયો ન હતો. આ કારણોસર બંને બચ્ચાં મૃત અવસ્થામાં જન્મ્યા હતા.

પ્રકૃતિ પ્રેમીઓ સિંહણ અને તેના મૃત બચ્ચાંને લઈને દુઃખ વ્યક્ત કરી રહ્યા છે. માતૃ દિવસ પહેલાં આ દુઃખદ ઘટના બનતાં શોકની લાગણી વધુ ઘેરી બની છે. સક્કરબાગથી લાવવામાં આવેલી આ જોડી પાસેથી સૌ કોઈને સારા સમાચારની અપેક્ષા હતી, પરંતુ આ ઘટનાથી નિરાશા સાંપડી છે.