રાજ્ય સરકાર આજે પીએમજેએવાય યોજનાની SOPની કરશે જાહેરાત

રાજ્યમાં આરોગ્ય ક્ષેત્રે મોટા ફેરફારની તૈયારી થઈ રહી છે. PMJAY (પ્રધાનમંત્રી જન આરોગ્ય યોજના) હેઠળ ખ્યાતિ હોસ્પિટલ કૌભાંડ બહાર આવ્યા બાદ રાજ્ય સરકાર નવી SOP (સ્ટાન્ડર્ડ ઓપરેટિંગ પ્રોસિજર) જાહેર કરવાની છે.

PMJAY યોજના હેઠળ ગરીબો માટે મફત સારવારની વ્યવસ્થા છે. પરંતુ કેટલીક ખાનગી હોસ્પિટલો દ્વારા આ યોજનાનો દુરૂપયોગ થતો હોવાનું ખુલ્યું છે. ખાસ કરીને ખ્યાતિ હોસ્પિટલ કૌભાંડમાં જરૂરી ન હોય તેટલી એન્જિયોપ્લાસ્ટી કરવાનો ખુલાસો થયો હતો. જેમાં દર્દીઓને હેલ્થ કેમ્પના બહાને આકર્ષી, માત્ર સારવાર આપીને નાણાંનો દુરૂપયોગ થયો હતો.

PMJAY યોજના હેઠળ કાર્ડિયોલોજી તથા અન્ય મહત્વના તબીબી ક્ષેત્રે કડક નિયંત્રણ લાવવાનું નક્કી થયું છે.

દ્વિ-સ્તરીય ચકાસણી થશે 

કોઈપણ પ્રકારની શસ્ત્રક્રિયા પહેલાં નિષ્ણાતોની સમિતિ દ્વારા પ્રમાણપત્ર જરૂરી રહેશે.

આર્થિક ગેરવહીવટ રોકવા માટે આર્ટિફિશિયલ ઈન્ટેલિજન્સ (AI)ની મદદથી તમામ દસ્તાવેજોની ત્વરિત ચકાસણી થશે.

એવી હોસ્પિટલો પર લગામ કસાશે, જે PMJAY હેઠળ નિયમોની અવહેલના કરે છે.

આ SOP કેબિનેટમાં મંજૂર થયા બાદ આરોગ્ય મંત્રી ઋષિકેશ પટેલ દ્વારા જાહેર કરવામાં આવશે. સરકાર આ નિર્ણયને લઈને ગંભીર છે, કારણ કે ખ્યાતિ જેવી ઘટનાઓથી જનતાનો આરોગ્ય વ્યવસ્થામાં વિશ્વાસ ઓછો થયો છે.

પીએમજેએવાય યોજનામાં ગેરરીતિઓના કારણે આરોગ્ય વિભાગે 7 ખાનગી હોસ્પિટલો અને બે ડૉક્ટરોને પીએમજેએવાય યોજનામાંથી સસ્પેન્ડ કર્યા હતા. આ ઉપરાંત ખ્યાતિ હોસ્પિટલ સહિત કેટલાક કેસમાં તપાસ ચાલી રહી છે.

આ SOP નો મુખ્ય હેતુ આરોગ્ય સેવાઓમાં ગેરવહીવટ અટકાવવો અને PMJAYનો લાભ યોગ્ય લાભાર્થીઓ સુધી પહોંચે તે સુનિશ્ચિત કરવો છે. રાજ્ય સરકાર ખ્યાતિ જેવી ઘટનાઓ ફરી ન બને તે માટે સાવચેતીના પગલાં લઈ રહી છે.