ગુજરાતમાં મેઘરાજાનો મહાકહેર

Gujarat heavy Rain Monsoon 2026 : ગુજરાતમાં ચોમાસાએ ફરી એકવાર જોરદાર બેટિંગ શરૂ કરી છે. રાજ્યના મોટા ભાગના વિસ્તારોમાં છેલ્લા 24 કલાક દરમિયાન મેઘરાજાએ ધોધમાર વરસાદ વરસાવ્યો છે.રાજ્યના કુલ 225 તાલુકાઓમાં નોંધપાત્ર વરસાદ નોંધાતા અનેક વિસ્તારોમાં જનજીવન પ્રભાવિત બન્યું છે.ખાસ કરીને દક્ષિણ ગુજરાતમાં વરસાદે સૌથી વધુ કહેર વરસાવ્યો છે.વાપીમાં સૌથી વધુ સવા 8 ઇંચ જ્યારે સુરત જિલ્લાના કામરેજમાં સાડા 7 ઇંચ જેટલો વરસાદ નોંધાતા રસ્તાઓ નદીમાં ફેરવાઈ ગયા હતા.ભારે વરસાદના કારણે અનેક વિસ્તારોમાં પાણી ભરાઈ જતાં વાહનવ્યવહાર પર અસર જોવા મળી હતી. સુરત અને નવસારી જિલ્લામાં સતત વરસાદની આગાહી વચ્ચે વહીવટી તંત્રએ વિદ્યાર્થીઓની સુરક્ષાને ધ્યાનમાં રાખીને શાળાઓમાં રજા જાહેર કરી છે.

સમગ્ર ગુજરાતમાં વરસાદી માહોલ
છેલ્લા 24 કલાક દરમિયાન ઉત્તર ગુજરાત, મધ્ય ગુજરાત, સૌરાષ્ટ્ર, કચ્છ અને દક્ષિણ ગુજરાતના અનેક વિસ્તારોમાં સારો વરસાદ નોંધાયો છે. રાજ્યના 225 તાલુકાઓમાં વરસાદ નોંધાવા સાથે મોટાભાગના જળાશયોમાં નવા પાણીની આવક શરૂ થઈ છે.ખેડૂતો માટે આ વરસાદ આશીર્વાદ સમાન માનવામાં આવી રહ્યો છે કારણ કે ખરીફ પાક માટે જરૂરી ભેજ હવે પૂરતા પ્રમાણમાં ઉપલબ્ધ બન્યો છે. જોકે સતત ભારે વરસાદને કારણે નીચાણવાળા વિસ્તારોમાં પાણી ભરાવાની સમસ્યા પણ સર્જાઈ છે.

વાપીમાં સૌથી વધુ 8.56 ઇંચ વરસાદ
વાપીમાં સવા 8.56 ઇંચ અને કામરેજમાં સાડા 7 ઇંચ વરસાદ સાથે દક્ષિણ ગુજરાત હાલ સૌથી વધુ અસરગ્રસ્ત વિસ્તારોમાં સામેલ છે. સુરત અને નવસારીમાં શાળાઓ બંધ રાખવાનો નિર્ણય પણ પરિસ્થિતિની ગંભીરતા દર્શાવે છે.ભારે વરસાદના કારણે શહેરના અનેક મુખ્ય માર્ગો પાણીમાં ગરકાવ થઈ ગયા હતા.ઘણા રહેણાંક વિસ્તારોમાં વરસાદી પાણી ઘૂસી જતાં લોકોને મુશ્કેલીનો સામનો કરવો પડ્યો હતો. સ્થાનિક તંત્ર દ્વારા સતત પમ્પિંગ કરીને પાણી કાઢવાની કામગીરી હાથ ધરવામાં આવી હતી.વાપીના ઔદ્યોગિક વિસ્તારોમાં પણ વરસાદની અસર જોવા મળી હતી. કેટલીક જગ્યાએ પાણી ભરાવાને કારણે કર્મચારીઓને અવરજવર કરવામાં મુશ્કેલી પડી હતી.

સુરત શહેરમાં છેલ્લા 24 કલાક દરમિયાન કુલ 5.39 ઇંચ વરસાદ નોંધાયો છે. ઉપરાંત વલસાડમાં 5.28 ઇંચ, ખેરગામમાં 4.88 ઇંચ, લાઠીમાં 4.61 ઇંચ, ભાવનગરમાં 4.49 ઇંચ, સિહોરમાં 4.45 ઇંચ, બાબરામાં 4.37 ઇંચ અને અમરેલીમાં 4.25 ઇંચ વરસાદ નોંધાતા અનેક વિસ્તારોમાં વરસાદી માહોલ છવાઈ ગયો છે. વરસાદને કારણે વાતાવરણમાં ઠંડક પ્રસરી છે અને છેલ્લા કેટલાક દિવસોથી અનુભવાતી ગરમીમાંથી લોકોને રાહત મળી છે.

રાજ્યના 225 તાલુકામાં વરસાદ
રાજ્યમાં ચોમાસું ફરી સક્રિય બનતાં છેલ્લા 24 કલાક દરમિયાન કુલ 225 તાલુકાઓમાં વરસાદ નોંધાયો છે. જ્યારે આજે સવારે 6 વાગ્યાથી સાંજે 6 વાગ્યા સુધીના સમયગાળામાં રાજ્યના 98 તાલુકાઓમાં વરસાદ નોંધાયો હતો. તેમાં 39 તાલુકાઓમાં એક ઇંચથી વધુ વરસાદ વરસ્યો હોવાનું સરકારી વરસાદી આંકડાઓ દર્શાવે છે. દક્ષિણ ગુજરાત ઉપરાંત મધ્ય ગુજરાત અને સૌરાષ્ટ્રના કેટલાક વિસ્તારોમાં પણ સારો વરસાદ નોંધાતા જળાશયો અને નદીઓમાં નવા પાણીની આવક શરૂ થઈ છે. હવામાન વિભાગે દક્ષિણ ગુજરાતમાં ભારે વરસાદની આગાહી વ્યક્ત કરી હતી અને તે મુજબ સુરત, વલસાડ તથા નવસારી જિલ્લામાં વરસાદનું જોર સૌથી વધુ રહ્યું છે. અનેક નીચાણવાળા વિસ્તારોમાં પાણી ભરાતા સ્થાનિક તંત્રને પાણી કાઢવાની કામગીરી હાથ ધરવી પડી હતી. કેટલાક વિસ્તારોમાં ટ્રાફિક જામ અને જાહેર પરિવહન પર પણ વરસાદની અસર જોવા મળી હતી.

સુરત-નવસારીની શાળા-કોલેજોમાં રજા જાહેર
સુરત શહેરમાં સતત વરસી રહેલા વરસાદને કારણે અનેક મુખ્ય માર્ગો પર ટ્રાફિકની સમસ્યા સર્જાઈ હતી. શહેરના અનેક નીચાણવાળા વિસ્તારોમાં પાણી ભરાઈ જતાં વાહનચાલકોને ભારે મુશ્કેલીનો સામનો કરવો પડ્યો.મહાનગરપાલિકાની ટીમો સતત પાણીના નિકાલ માટે કામગીરી કરી રહી છે. ડ્રેનેજ સિસ્ટમ પર ભારે દબાણ સર્જાતા કેટલાક વિસ્તારોમાં પાણી લાંબા સમય સુધી ભરાયેલા રહ્યા.નવસારી જિલ્લામાં પણ ધોધમાર વરસાદને કારણે જનજીવન પ્રભાવિત બન્યું છે. શહેર તેમજ ગ્રામ્ય વિસ્તારોમાં સતત વરસાદ વરસતા નદીઓ અને તળાવોમાં નવા પાણીની આવક થઈ છે.કેટલાક વિસ્તારોમાં રસ્તાઓ પર પાણી ફરી વળતાં વાહનવ્યવહારને અસર પહોંચી છે. 

નીચાણવાળા વિસ્તારોમાં રહેતા લોકોને સતર્ક રહેવા માટે સૂચનાઓ આપવામાં આવી છે. ભારે વરસાદ અને આગામી કલાકોમાં વધુ વરસાદની આગાહીને ધ્યાનમાં રાખીને જિલ્લા વહીવટી તંત્રએ સુરત અને નવસારીમાં શાળાઓ બંધ રાખવાનો નિર્ણય કર્યો છે.વિદ્યાર્થીઓની સુરક્ષા સૌથી મહત્વની હોવાથી આ નિર્ણય લેવામાં આવ્યો હોવાનું તંત્રએ જણાવ્યું છે. વાલીઓને પણ બાળકોને અનાવશ્યક બહાર ન મોકલવા અપીલ કરવામાં આવી છે.

તાપીનો ડોસવાડા ડેમ ઓવરફ્લો,17 ગામ એલર્ટ
તાપી જિલ્લાના સોનગઢમાં આવેલો ગાયકવાડી શાસન સમયનો ઐતિહાસિક ડોસવાડા વિયર ડેમ ઉપરવાસના ભારે વરસાદને કારણે ઓવરફ્લો થયો છે. ડેમની સપાટી પરથી 2.4 સેન્ટીમીટર જેટલું પાણી વહી રહ્યું હોવાથી હેઠવાસના 17 ગામોને હાઈએલર્ટ કરાયા છે.

અમરેલી જિલ્લામાં જળબંબાકાર, 10માંથી 7 ડેમો ઓવરફ્લો
અમરેલી જિલ્લામાં છેલ્લા 48 કલાકમાં વરસેલા અનરાધાર વરસાદને પગલે જળસંકટ હળવું થયું છે અને જિલ્લાના 10માંથી 7 મોટા જળાશયો ઓવરફ્લો થયા છે. આ ભારે પાણીની આવકને કારણે મોડી રાત્રે ઠેબી ડેમના 6 દરવાજા ખોલવામાં આવ્યા હતા, જોકે મેઘરાજાએ વિરામ લેતાં હાલ ડેમના 3 દરવાજા 2 ફૂટ સુધી ખુલ્લા રાખવામાં આવ્યા છે. ડેમમાંથી સતત થઈ રહેલા પાણીના ડિસ્ચાર્જને પગલે વહીવટી તંત્ર દ્વારા નીચાણવાળા વિસ્તારો એવા અમરેલી, ફતેપુર, પ્રતાપગઢ અને ચાપાથળ સહિતના ગામોને હાઈએલર્ટ કરી નદી કિનારે ન જવા કડક સૂચના આપવામાં આવી છે.

હવામાન વિભાગનું રેડ અને ઓરેન્જ ઍલર્ટ
હવામાન વિભાગ દ્વારા આગામી દિવસો માટે ભારેથી અતિભારે વરસાદની આગાહી સાથે ઍલર્ટ જાહેર કરવામાં આવ્યું છે સાતમી જુલાઈએ સુરત, ડાંગ, તાપી, નવસારી, વલસાડ, દાદરાનગર હવેલી, ભાવનગરમાં રેડ એલર્ટ આપવામાં આવ્યું છે. નર્મદા, ભરૂચ, અમરેલીમાં ઓરેન્જ ઍલર્ટ. આઠમી જુલાઈ (આવતીકાલે)એ ડાંગ, નવસારી, વલસાડ, દમણ, દાદરા નગર હવેલીમાં ઓરેન્જ ઍલર્ટ છે.

આગામી દિવસોમાં પણ ભારે વરસાદની શક્યતા
હવામાન વિભાગના અનુમાન મુજબ આગામી દિવસોમાં પણ દક્ષિણ ગુજરાત, સૌરાષ્ટ્ર અને રાજ્યના કેટલાક અન્ય વિસ્તારોમાં ભારે વરસાદની શક્યતા યથાવત છે. સ્થાનિક વહીવટી તંત્ર દ્વારા નીચાણવાળા વિસ્તારોમાં રહેતા લોકોને સાવચેત રહેવા, નદી-નાળા નજીક ન જવા તેમજ ભારે વરસાદ દરમિયાન જરૂરી કામ સિવાય બહાર ન નીકળવાની અપીલ કરવામાં આવી છે. વીજળી પડવાની સંભાવના હોય ત્યારે ખુલ્લા મેદાનોમાં ઉભા ન રહેવા, પાણી ભરાયેલા વિસ્તારોમાં વીજળીના થાંભલા અથવા ખુલ્લા વાયરથી દૂર રહેવા તેમજ બાળકોને વરસાદી પાણીમાં રમવા ન દેવાની પણ સૂચના આપવામાં આવી છે. બચાવ દળો અને સ્થાનિક તંત્રને પણ સંભવિત પરિસ્થિતિનો સામનો કરવા એલર્ટ પર રાખવામાં આવ્યા છે.