અમદાવાદ શહેરના મકરબા વિસ્તારમાં પ્રોપર્ટીના લોભમાં એક પુત્રએ પોતાની જ જનેતાની હત્યા કરી હોવાની ચોંકાવનારી ઘટના પ્રકાશમાં આવી છે. મકરબામાં આવેલા ઔડાના મકાનમાં શુક્રવારે મોડી રાત્રે ઘરના વિવાદમાં ઉશ્કેરાયેલા પુત્રએ માતાને લાકડાના દંડાના ફટકા મારીને મોતને ઘાટ ઉતારી દીધી હતી.
પ્રોપર્ટીના પૈસા માગતા થયો વિવાદ:
પોલીસ તપાસમાં બહાર આવેલી વિગત મુજબ, મૃતક કપિલાબેન દેવીપૂજક તેમના ઘરે હાજર હતા ત્યારે તેમનો પુત્ર અજય ત્યાં આવ્યો હતો. છેલ્લા ઘણા સમયથી માતા-પુત્ર વચ્ચે એક ઘરને લઈને વિવાદ ચાલી રહ્યો હતો. અજયે આ ઘરના બદલામાં તેની માતા પાસે પૈસાની માંગણી કરી હતી.
ઉશ્કેરાટમાં જીવલેણ હુમલો:
જ્યારે કપિલાબેને પૈસા આપવાની સ્પષ્ટ ના પાડી દીધી, ત્યારે અજય પોતાનો કાબૂ ગુમાવી બેઠો હતો. ઉગ્ર બોલાચાલી બાદ અજયે બાજુમાં પડેલો લાકડાનો દંડો ઉઠાવ્યો હતો અને માતાના માથામાં અનેક ઝીંકી દીધા હતા. માથાના ભાગે ગંભીર ઈજાઓ થતા કપિલાબેન લોહીલુહાણ હાલતમાં ઢળી પડ્યા હતા.
સારવાર દરમિયાન મોત:
ગંભીર રીતે ઈજાગ્રસ્ત કપિલાબેનને તાત્કાલિક હોસ્પિટલ ખસેડવામાં આવ્યા હતા, પરંતુ ટૂંકી સારવાર બાદ તેમનું કરૂણ મોત નીપજ્યું હતું. ઘટનાની જાણ થતા જ આનંદનગર પોલીસનો કાફલો ઘટનાસ્થળે પહોંચી ગયો હતો. પોલીસે ત્વરિત કાર્યવાહી કરતા હત્યારા પુત્ર અજયની ધરપકડ કરી લીધી છે. હાલમાં મૃતદેહને પોસ્ટમોર્ટમ માટે મોકલી પોલીસ આ મામલે વધુ કાયદેસરની તપાસ ચલાવી રહી છે.
&nbsp;
&nbsp;

પુત્રએ કરી માતાની હત્યા

ઘરના બદલામાં પૈસા ન મળતા પુત્રએ માથામાં દંડાના ફટકા માર્યા; આનંદનગર પોલીસે કરી કાર્યવાહી..

January 31, 2026 | 14:20 IST