SG Highway Accident: ગાંધીનગરના સરખેજ હાઇવે (SG Highway) પર ગઈકાલે 25 જૂનના રોજ મોડી રાત્રે એક અત્યંત ભયાનક અને હૃદયકંપાવનારી ઘટના સામે આવી છે. સરગાસણ બ્રિજની શરૂઆતમાં આવેલા સ્વાગત મોલની બિલકુલ સામે પૂરપાટ ઝડપે દોડતી 4 જેટલી લક્ઝુરિયસ કાર વચ્ચે ગમખ્વાર અકસ્માત સર્જાયો હતો. આ ટક્કર એટલી પ્રચંડ હતી કે ચારેય વાહનોનો કુરચો બોલી ગયો હતો. અકસ્માતની ગંભીરતાનો અંદાજ એ વાત પરથી લગાવી શકાય છે કે અકસ્માત બાદ તુરંત જ એક હ્યુન્ડાઈ ક્રેટા કારમાં ભીષણ આગ ફાટી નીકળી હતી. આ અકસ્માતમાં કારમાં સવાર 4 લોકોને નાની-મોટી ઇજાઓ પહોંચી હતી, જેમાં એક યુવકની હાલત અત્યંત ગંભીર હોવાનું જાણવા મળ્યું છે. ઘટનાની જાણ થતાં જ ગાંધીનગર ફાયર બ્રિગેડની ટીમ તાત્કાલિક ઘટનાસ્થળે દોડી આવી હતી અને ભારે જહેમત બાદ કારમાં લાગેલી આગ પર કાબૂ મેળવ્યો હતો, પરંતુ ત્યાં સુધીમાં ક્રેટા કાર સંપૂર્ણપણે બળીને ખાખ થઈ ગઈ હતી.
ચાર મોંઘીદાટ કાર વચ્ચે સર્જાયો અકસ્માત આ ચકચારી અકસ્માતની વિગત એવી છે કે સરગાસણ બ્રિજ પર સૌથી આગળ ઇનોવા કાર જઈ રહી હતી, જેની પાછળ મહિન્દ્રા ઇવી (EV) ગાડી ચાલી રહી હતી. આ દરમિયાન મહિન્દ્રા કારનો ચાલક આગળ જતી ઇનોવાને ઓવરટેક કરવા માટે સહેજ બહાર નીકળ્યો હતો. બરાબર એ જ સમયે અમદાવાદ તરફથી પુરપાટ ઝડપે આવી રહેલી ક્રેટા કારના ચાલકે પોતાના વાહન પરનો કાબૂ ગુમાવી દીધો હતો અને મહિન્દ્રા કારને પાછળથી જોરદાર ટક્કર મારી હતી. આ ટક્કરના કારણે મહિન્દ્રા કાર પણ ફંગોળાઈને આગળ જતી ઇનોવા સાથે ધડાકાભેર અથડાઈ હતી. આ અકસ્માતની ચેઇન રિએક્શનમાં અન્ય એક ટાટા ટિયાગો કાર પણ લપેટામાં આવી ગઈ હતી. અકસ્માતમાં સામેલ વાહનોમાં ઇનોવા જેનો નંબર GJ01JT7623 છે, હ્યુન્ડાઈ ક્રેટા જેનો નંબર GJ01WV4423 છે, મહિન્દ્રા ઇવી જેનો નંબર GJ02ER7677 છે અને ટાટા ટિયાગો જેનો નંબર GJ01KX9652 છે, તે તમામ ગાડીઓનો કચ્ચરઘાણ નીકળી ગયો હતો.
130 કિલોમીટરથી વધુની સ્પીડ અને પ્રત્યક્ષદર્શીનો સનસનાટીભર્યો ખુલાસો આ અકસ્માતના પ્રત્યક્ષદર્શીએ આખી ઘટના અંગે જણાવ્યું કે અકસ્માત સ્થળની નજીક આવેલા એક કોમ્પ્લેક્સમાં તેમની ઓફિસ આવેલી છે. મોડી રાત્રે તેઓ અને તેમના મિત્રો કામકાજમાંથી થોડો બ્રેક લઈને નીચે બેઠા હતા, તે સમયે અચાનક આશરે 300 મીટર દૂરથી એક જોરદાર અને કાન ફાડી નાખે તેવો ધડાકાભેર અવાજ સંભળાયો હતો. અવાજ સાંભળતાની સાથે જ તેઓ ઘટનાસ્થળ તરફ દોડ્યા હતા. ત્યાં પહોંચીને તેમણે જોયું તો ચારેય કાર એકબીજા સાથે ખરાબ રીતે અથડાઈ પડી હતી અને ક્રેટા ગાડી ધાણીની જેમ સળગી રહી હતી. તેમણે વધુમાં જણાવ્યું કે ઇજાગ્રસ્ત યુવાનોમાંથી 3 યુવકો સંપૂર્ણપણે નશાની હાલતમાં ધૂમ સ્ટાઇલમાં ગાડી ચલાવી રહ્યા હતા અને અકસ્માત સમયે ગાડીઓની સ્પીડ અંદાજે 130 કિલોમીટર પ્રતિ કલાકથી પણ વધુ હોવી જોઈએ.
ઇજાગ્રસ્તોને તાત્કાલિક સારવાર માટે 108 એમ્બ્યુલન્સ મારફતે હોસ્પિટલ ખસેડાયા અકસ્માત સર્જાતા જ આસપાસના લોકો એકઠા થઈ ગયા હતા અને સ્થાનિક લોકોની મદદથી તુરંત જ 108 એમ્બ્યુલન્સને જાણ કરવામાં આવી હતી. એમ્બ્યુલન્સ મારફતે ચારેય ઇજાગ્રસ્તોને તાત્કાલિક સારવાર અર્થે નજીકની હોસ્પિટલોમાં ખસેડવામાં આવ્યા હતા. આ અકસ્માતમાં ભોગ બનેલા પૈકી 3 વ્યક્તિઓને ગાંધીનગરની સિવિલ હોસ્પિટલમાં સારવાર માટે લઈ જવામાં આવ્યા હતા, જ્યારે અન્ય એક વ્યક્તિની સ્થિતિ વધુ ગંભીર જણાતા તેને અમદાવાદની સિવિલ હોસ્પિટલ અને ત્યારબાદ વધુ સારવાર માટે કેડી (KD) હોસ્પિટલમાં દાખલ કરવામાં આવ્યા છે. અકસ્માત બાદ સમગ્ર હાઇવે પર અરાજકતા અને અફરાતફરીનો માહોલ સર્જાઈ ગયો હતો, જેનો લાભ લઈને કોઈપણ વાહનના મૂળ માલિક અથવા ડ્રાઈવર ઘટનાસ્થળે હાજર મળી આવ્યા ન હતા.
અમદાવાદના નબીરાઓ સામે સેક્ટર 7 પોલીસે ગુનો નોંધી તપાસ શરૂ કરી મળતી માહિતી મુજબ, અકસ્માત બાદ સળગી ગયેલી ક્રેટા કારમાં 3 યુવાનો સવાર હતા, જેમની ઓળખ અયાન, કૌસ્તુભ દવે અને ચિત્રાંગ દવે તરીકે થઈ છે અને આ ત્રણેય યુવકો અમદાવાદના રહેવાસી હોવાનું સામે આવ્યું છે. ગાંધીનગરમાં નશામાં ધૂત ધનિક નબીરાઓએ મધરાત્રે હાઇવેને બાનમાં લેતા અન્ય વાહનચાલકોમાં ભારે ફફડાટ અને રોષ વ્યાપી ગયો છે. આ સમગ્ર ચકચારી ઘટનાને પગલે ગાંધીનગરની સેક્ટર 7 પોલીસે ગુનો નોંધીને કાયદેસરની કાર્યવાહી હાથ ધરી છે. પોલીસ હવે સીસીટીવી (CCTV) ફૂટેજના આધારે નશાખોર નબીરાઓ સામે કડક કલમો હેઠળ એફઆઈઆર નોંધી અકસ્માતના ચોક્કસ કારણોની વધુ તપાસ ચલાવી રહી છે.

સરગાસણ બ્રિજ પાસે 4 લક્ઝુરિયસ કાર વચ્ચે અકસ્માત, ભડભડ સળગી ક્રેટા કાર

June 26, 2026 | 11:28 IST