ગોધરા કાંડના આ 14 સાક્ષીઓની સુરક્ષા પાછી ખેંચાઇ

ગુજરાતના બહુચર્ચિત ગોધરા કેસના સાક્ષીઓની સુરક્ષા દૂર કરવામાં આવી છે. ગૃહ મંત્રાલયની ભલામણ બાદ કેન્દ્ર સરકારે આ નિર્ણય લીધો છે. સૂત્રોના જણાવ્યા અનુસાર, કુલ 14 સાક્ષીઓની સુરક્ષા પાછી ખેંચી લેવામાં આવી છે, જેમને અગાઉ 150 સેન્ટ્રલ ઇન્ડસ્ટ્રિયલ સિક્યુરિટી ફોર્સ (CISF) કર્મચારીઓ દ્વારા સુરક્ષા પૂરી પાડવામાં આવતી હતી.

ગૃહ મંત્રાલયે આ નિર્ણય સ્પેશિયલ ઇન્વેસ્ટિગેશન ટીમ (SIT) ના રિપોર્ટના આધારે લીધો છે. SIT એ 10 નવેમ્બર, 2023 ના રોજ તેનો ભલામણ અહેવાલ રજૂ કર્યો હતો, જેમાં સાક્ષીઓના રક્ષણને દૂર કરવાનું સૂચન કરવામાં આવ્યું હતું. રિપોર્ટ અનુસાર, વર્તમાન પરિસ્થિતિઓને ધ્યાનમાં રાખીને આ પગલું લેવામાં આવ્યું છે.

જે 14 સાક્ષીઓની સુરક્ષા પાછી ખેંચી લેવામાં આવી છે તેમાં હબીબ રસૂલ સૈયદ, અમીનાબેન હબીબ રસૂલ સૈયદ, અકીલાબેન યાસીનમીન, સૈયદ યુસુફભાઈ, અબ્દુલભાઈ મરિયમ અપ્પા, યાકુબભાઈ, રઝાકભાઈ અખ્તર હુસૈન, નાઝીમભાઈ સત્તારભાઈ, માજીદભાઈ શેખ યાનુશ મહમદ, હાજી મયુદ્દીન, સમસુદ્દીન ફરીદાબાનુ, સમદુદ્દીન મુસ્તફા ઈસ્માઈલ, મદીનાબીબી મુસ્તફા અને ભાઈલાલભાઈ ચંદુભાઈ રાઠવાનો સમાવેશ થાય છે.

ગોધરા ઘટના શું હતી?

ગુજરાતમાં ગોધરા ઘટનાને 23 વર્ષ વીતી ગયા છે. ફેબ્રુઆરી 2002 માં, સાબરમતી એક્સપ્રેસના એક કોચને આગ લગાડવામાં આવ્યા બાદ 59 કાર સેવકોની હત્યા કરવામાં આવી હતી, જેના કારણે કોમી રમખાણો ફાટી નીકળ્યા હતા. 27 ફેબ્રુઆરી 2002 ના રોજ સવારે, સાબરમતી એક્સપ્રેસના S-6 કોચમાં આગ લાગી હતી અને તે કોચમાં મુસાફરી કરી રહેલા 59 મુસાફરો મૃત્યુ પામ્યા હતા. ટ્રેન ત્યારે ગુજરાતના ગોધરા સ્ટેશન પર પહોંચી ગઈ હતી. પીડિતોમાં 27 મહિલાઓ અને 10 બાળકોનો સમાવેશ થાય છે. ટ્રેનમાં સવાર અન્ય 48 મુસાફરો ઘાયલ થયા હતા.