ગુજરાતમાં કાળઝાળ ગરમી: 10 જિલ્લામાં ઓરેન્જ એલર્ટ

ગુજરાતમાં ઉનાળાની શરૂઆતમાં જ ગરમીએ પોતાનું રૌદ્ર સ્વરૂપ બતાવવાનું શરૂ કરી દીધું છે. ઉત્તર-પૂર્વ દિશામાંથી ફૂંકાતા ગરમ પવનોને કારણે સમગ્ર રાજ્યમાં તાપમાનનો પારો ઝડપથી ઉપર જઈ રહ્યો છે. હવામાન વિભાગે રાજ્યની વર્તમાન સ્થિતિને ધ્યાનમાં રાખીને 10 જિલ્લાઓમાં 'ઓરેન્જ એલર્ટ' જાહેર કર્યું છે, જે સૂચવે છે કે આગામી દિવસોમાં હીટવેવની ગંભીર અસર જોવા મળી શકે છે.

તાપમાનનો પારો 41 ડિગ્રીને પાર : 

હવામાન વિભાગની આગાહી મુજબ, રાજ્યના મોટાભાગના શહેરોમાં તાપમાન 41 ડિગ્રી સેલ્સિયસની આસપાસ રહેવાની શક્યતા છે. ખાસ કરીને અમદાવાદ અને રાજકોટ જેવા મોટા શહેરોમાં ગરમીની તીવ્રતા વધુ અનુભવાઈ રહી છે. અમદાવાદમાં આજે ઓરેન્જ એલર્ટ આપવામાં આવ્યું છે, જેના કારણે બપોરના સમયે ઘરની બહાર નીકળવું મુશ્કેલ બની ગયું છે. માત્ર દિવસ દરમિયાન જ નહીં, પરંતુ રાત્રિના સમયે પણ ભેજ અને ઉકળાટને કારણે લોકો પરેશાન થઈ રહ્યા છે.

કયા જિલ્લામાં કયું એલર્ટ ?

ગરમીની તીવ્રતાના આધારે હવામાન વિભાગે રાજ્યને બે ભાગમાં વહેંચ્યું છે:

ઓરેન્જ એલર્ટ: કચ્છ, બનાસકાંઠા, પાટણ, મોરબી, સુરેન્દ્રનગર, રાજકોટ અને જૂનાગઢ સહિત 10 જિલ્લાઓમાં કાળઝાળ ગરમીની આગાહી સાથે ઓરેન્જ એલર્ટ અપાયું છે.

યલો એલર્ટ: મહેસાણા, સાબરકાંઠા, ખેડા, આણંદ, વડોદરા, ભરૂચ, સુરત, ભાવનગર, બોટાદ, અમરેલી, ગીર સોમનાથ અને કેન્દ્રશાસિત પ્રદેશ દિવમાં સાવચેતીના ભાગરૂપે યલો એલર્ટ જાહેર કરાયું છે.

રાજકોટમાં લોકડાઉન જેવો માહોલ : 

સૌરાષ્ટ્રના હબ ગણાતા રાજકોટમાં ગરમીનો પારો 39 થી 40 ડિગ્રી સુધી પહોંચી ગયો છે. માર્ચ મહિનાની શરૂઆતમાં જ પડી રહેલી આ આકરી ગરમીને કારણે બપોરના સમયે શહેરના માર્ગો સુમસામ ભાસી રહ્યા છે. લોકો ગરમીથી બચવા માટે બપોરના સમયે બહાર નીકળવાનું ટાળી રહ્યા છે, જેને જોતા જાણે અઘોષિત લોકડાઉન જેવી સ્થિતિ સર્જાઈ હોય તેવું લાગી રહ્યું છે. લોકો ગરમીથી રાહત મેળવવા માટે ઠંડા પીણા, શેરડીનો રસ અને આઈસ્ક્રીમનો સહારો લઈ રહ્યા છે.

સુરતમાં પણ ગરમીનો પારો ઉંચકાયો : 

દક્ષિણ ગુજરાતના સુરત શહેરમાં પણ ગરમીની શરૂઆત આક્રમક રહી છે. સુરતમાં તાપમાન 38 ડિગ્રી સુધી પહોંચતા લોકોએ બપોરના સમયે કામકાજ અટકાવી દીધા છે. ગરમ પવનોને કારણે ટુ-વ્હીલર ચાલકોને લૂ લાગવાનો ભય પણ સતાવી રહ્યો છે.

હવામાન વિભાગના જણાવ્યા અનુસાર, આગામી થોડા દિવસો સુધી આ ગરમ પવનોનો સિલસિલો યથાવત રહેશે, જેથી નાગરિકોને બપોરના સમયે સીધા સૂર્યપ્રકાશથી બચવા અને વધુ પ્રમાણમાં પાણી પીવાની સલાહ આપવામાં આવી છે.