કાલુપુર રેલવે સ્ટેશન પર RPF-રિક્ષાચાલક ઘર્ષણ

અમદાવાદ : કાલુપુર રેલવે સ્ટેશન પર RPF અને રિક્ષાચાલકો સામસામે,પોલીસનો લાઠીચાર્જ

અમદાવાદના વ્યસ્ત કાલુપુર રેલવે સ્ટેશન પર આજે વહેલી સવારે ભારે હોબાળો મચ્યો હતો મુસાફરોને રિક્ષામાં બેસાડવા જેવી સામાન્ય બાબતે રેલવે પ્રોટેક્શન ફોર્સ (RPF) ના જવાનો અને સ્થાનિક રિક્ષાચાલકો વચ્ચે ઉગ્ર બોલાચાલી થઈ હતી, જે જોતજોતામાં હિંસક ઘર્ષણમાં ફેરવાઈ ગઈ હતી

વિવાદનું મુખ્ય કારણ : 

સામાન્ય રીતે વહેલી સવારે સ્ટેશન પર મુસાફરોની ભીડ વધુ હોય છે. રિક્ષાચાલકો પેસેન્જર મેળવવા માટે પ્રતિબંધિત ગેટ નજીક ઊભા રહેતા હોવાથી RPF જવાનોએ તેમને ત્યાંથી હટવા માટે સૂચના આપી હતી. આ બાબતે બંને પક્ષો વચ્ચે રકઝક શરૂ થઈ હતી. રિક્ષાચાલકોનો એવો દાવો છે કે તેમને વ્યવસાય કરતા રોકવામાં આવ્યા અને તેમની સાથે ગેરવર્તન કરવામાં આવ્યું.

મારપીટના આક્ષેપ અને લાઠીચાર્જ : 

ઘટના દરમિયાન એવો પણ આક્ષેપ કરવામાં આવ્યો છે કે એક રિક્ષાચાલકને પોલીસ દ્વારા માર મારવામાં આવ્યો હતો. આ વાત વાયુવેગે ફેલાતા મોટી સંખ્યામાં રિક્ષાચાલકો એકઠા થઈ ગયા હતા અને સ્ટેશન પરિસરમાં હોબાળો મચાવ્યો હતો. પરિસ્થિતિ વણસતી જોઈને ભીડને વિખેરવા માટે RPF જવાનોએ લાઠીચાર્જ કરવો પડ્યો હતો. આ સમગ્ર ઘટનાના વીડિયો સોશિયલ મીડિયા પર વાયરલ થયા છે.

સુરક્ષા અને રોજગારીનો પ્રશ્ન : 

આ ઘટના બાદ સોશિયલ મીડિયા પર બે અલગ-અલગ મંતવ્યો જોવા મળી રહ્યા છે. કેટલાક લોકો રેલવેની સુરક્ષા અને વ્યવસ્થા જાળવવા માટે પોલીસની કાર્યવાહીને યોગ્ય ગણાવી રહ્યા છે, જ્યારે અન્ય લોકો રિક્ષાચાલકોની રોજગારી અને તેમની સાથે થતા વ્યવહાર અંગે ચિંતા વ્યક્ત કરી રહ્યા છે. હાલમાં રેલવે સ્ટેશન પર પોલીસનો ચુસ્ત બંદોબસ્ત ગોઠવી દેવામાં આવ્યો છે અને પરિસ્થિતિ નિયંત્રણમાં છે.