રાજકોટ: INOXમાં સેન્ડવીચ પર વંદો ફરતો દેખાયો

રાજકોટની જાણીતી મલ્ટીપ્લેક્સ ચેન આર વર્લ્ડ INOX માં ગ્રાહકોના સ્વાસ્થ્ય સાથે ચેડાં થતા હોવાની ગંભીર ઘટના સામે આવી છે. થિયેટરની કેન્ટીનમાં વેચાતી સેન્ડવીચ પર વંદો ફરતો હોવાનો વીડિયો સોશિયલ મીડિયા પર વાયરલ થતાં ખળભળાટ મચી ગયો છે. ઉંચી કિંમતે ખાદ્ય પદાર્થો વેચતા સિનેમા ઘરોમાં સ્વચ્છતાના નામે કેવા લોલમલોલ ચાલે છે તેનો આ પુરાવો છે.

સિનેમાની કેન્ટીનમાં વંદાનું સામ્રાજ્ય : 

મળતી માહિતી મુજબ, 19 માર્ચ 2026ના રોજ રાત્રે 'ધુરંધર' ફિલ્મ જોવા ગયેલા એક ગ્રાહકે આ દ્રશ્યો કેમેરામાં કેદ કર્યા હતા. ફિલ્મમાં ઇન્ટરવેલ પડતા જ્યારે ગ્રાહક કેન્ટીન પાસે નાસ્તો લેવા ગયા, ત્યારે કાચના ડિસ્પ્લેમાં રાખેલી સેન્ડવીચ પર વંદો આરામથી ફરતો જોવા મળ્યો હતો. ગ્રાહકે તાત્કાલિક આ ઘટનાનો વીડિયો બનાવી લીધો હતો, જેમાં સ્પષ્ટ દેખાય છે કે ખાદ્ય સામગ્રી કેટલી અસુરક્ષિત રીતે રાખવામાં આવી છે.

તંત્રનો લૂલો બચાવ અને બેદરકારી : 

જ્યારે ગ્રાહકે આ બાબતે કેન્ટીન સ્ટાફ અને મેનેજરનું ધ્યાન દોર્યું, ત્યારે સત્તાવાળાઓએ પોતાની ભૂલ સ્વીકારવાને બદલે અજીબ બચાવ કર્યો હતો. મેનેજમેન્ટ દ્વારા એવો દાવો કરવામાં આવ્યો હતો કે જે સેન્ડવીચ પર વંદો હતો તે માત્ર 'ડિસ્પ્લે' માટે હતી અને ગ્રાહકોને વેચવા માટે નહોતી. જોકે, ગ્રાહકોમાં એ સવાલ ઉઠી રહ્યો છે કે જો પ્રદર્શનમાં રાખેલી વસ્તુઓમાં જીવાત હોય, તો રસોડામાં કેવી સ્થિતિ હશે?

મેનેજરે આ બાબતે સફાઈ આપતા જણાવ્યું કે તેઓ નિયમિત સફાઈ કરે છે, પરંતુ અચાનક વંદો આવી ગયો હતો. આ ઘટના બાદ આખી કેન્ટીન ફરીથી સાફ કરવામાં આવી હોવાનો દાવો પણ કરાયો છે.

ફૂડ વિભાગની નિષ્ક્રિયતા સામે રોષ : 

રાજકોટમાં ખાદ્ય પદાર્થોમાં જીવજંતુઓ મળી આવવાની ઘટનાઓ સતત વધી રહી છે. આ વીડિયો વાયરલ થયા બાદ પણ રાજકોટ મહાનગરપાલિકાના ફૂડ વિભાગ દ્વારા કોઈ કડક કાર્યવાહી કરવામાં ન આવતા લોકોમાં રોષ જોવા મળી રહ્યો છે. નાગરિકોની માંગ છે કે માત્ર રેડ પાડવાના નાટકો કરવાને બદલે આવી પ્રીમિયમ જગ્યાઓ પર પણ નિયમિત ચેકિંગ કરવામાં આવે અને લોકોના સ્વાસ્થ્યને જોખમમાં મૂકનાર એકમો સામે કડક દંડનીય કાર્યવાહી થાય.