રાજકોટ જિલ્લાના આટકોટ-ગોંડલ રોડ પર વહેલી સવારે એક અત્યંત કરુણ અકસ્માત સર્જાયો છે. મોટા માંડવા અને મોટા દડવા ગામની વચ્ચે એક પૂરપાટ ઝડપે જતી કારના ચાલકે સ્ટેયરિંગ પરથી કાબૂ ગુમાવતા કાર પુલ નીચે ખાબકી હતી. કાર ઊંધી વળી જવાથી અને પલટી મારવાને કારણે તેમાં અચાનક ભીષણ આગ ફાટી નીકળી હતી.
કારના દરવાજા લોક થતા સર્જાઈ તારાજી :&nbsp;
પ્રાથમિક તપાસમાં બહાર આવેલી વિગતો મુજબ, કાર પુલ નીચે પડતાની સાથે જ તેના દરવાજા જામ થઈ ગયા હતા. કારમાં સવાર મુસાફરોને બહાર નીકળવાની તક મળે તે પહેલા જ આગે વિકરાળ સ્વરૂપ ધારણ કરી લીધું હતું. આ ભયાનક આગમાં એક માસૂમ બાળક સહિત કુલ ત્રણ વ્યક્તિઓ જીવતા ભુંજાયા છે. આગ એટલી તીવ્ર હતી કે પોલીસને ઘટનાસ્થળેથી માત્ર માનવ હાડપિંજર જ મળી આવ્યા છે.
અકસ્માત પાછળના સંભવિત કારણો :&nbsp;
સ્થાનિક લોકોના જણાવ્યા અનુસાર, વહેલી સવારે વાતાવરણમાં ભારે ધુમ્મસ હોવાને કારણે વિઝિબિલિટી ઓછી હોઈ શકે છે, જે અકસ્માતનું કારણ બની શકે. બીજી તરફ, પોલીસનું અનુમાન છે કે કારની ગતિ વધારે હોવાથી ચાલકે નિયંત્રણ ગુમાવ્યું હતું.
પોલીસ અને ફાયર વિભાગની કાર્યવાહી :&nbsp;
ઘટનાની જાણ થતા જ ગોંડલ પોલીસ અને ફાયર બ્રિગેડનો કાફલો ઘટનાસ્થળે પહોંચી ગયો હતો. ફાયર વિભાગે આગ પર કાબૂ મેળવ્યા બાદ તપાસ હાથ ધરી છે. હાલમાં ગોંડલ પોલીસે અકસ્માતે મોતનો ગુનો નોંધી મૃતકોની ઓળખ વિધિ અને આગળની કાયદેસરની કાર્યવાહી શરૂ કરી છે.

રાજકોટ કાર અકસ્માત

ગોંડલ પાસે પુલ નીચે કાર ખાબકતા દરવાજા લોક થઈ ગયા, એક બાળક સહિત ત્રણ લોકો જીવતા ભુંજાયા

January 30, 2026 | 11:19 IST