અંજારની કુખ્યાત લેડી ડોન સહિત 3 પાસા હેઠળ ધકેલાયા

અંજારની કુખ્યાત લેડી રિયા ગૌસ્વામીની ટોળકી વિરુદ્ધ પોલીસે પાસા હેઠળ કાર્યવાહી કરી છે. ભાઇ અને બે બહેનોની ત્રિપુટી વિરુદ્ધ પૂર્વ કચ્છ પોલીસે ગુજસીટોક બાદ હવે પાસાનું શસ્ત્ર ઉગામ્યુ છે. અંજારની આ ત્રિપુટી ગેરકાયદેસર વ્યાજખોરી અને પઠાણી ઉઘરાણી માટે કુખ્યાત છે. રિયા  ઈશ્વર ગૌસ્વામી , તેની બહેન આરતી ઈશ્વર ગૌસ્વામી અને ભાઈ તેજસ ઈશ્વર ગૌસ્વામી વિરુદ્ધ અસંખ્ય ગુન્હા અંજાર પોલીસ સ્ટેશનમાં નોંધાયેલા છે. આ ત્રિપુટી વિરુદ્ધ અગાઉ પણ ગુજસીટોકની કાર્યવાહી થઈ હતી.

થોડા સમય અગાઉ પૂર્વ કચ્છ પોલીસે ભાઈ બહેનોની ત્રિપુટી વિરુદ્ધ ગુજસીટોકની કાર્યવાહી કરી તેની ધરપકડ કરી હતી. આરોપી જામીન પર છૂટયા બાદ પણ ગેર કાયદેસર વ્યાજખોરીની પ્રવૃત્તિ ચાલુ રાખતા પોલીસે પાસા હેઠળ કાર્યવાહી કરી છે. 

કુખ્યાત ત્રિપુટી વિરુદ્ધ પાસાનું શસ્ત્ર ઉગામ્યુ
અંજારની કુખ્યાત ભાઈ બહેનોની ત્રિપુટી વિરુદ્ધ પૂર્વ કચ્છ લોકલ ક્રાઈમ બ્રાન્ચે  પાસા હેઠળ કાર્યવાહી કરવા જિલ્લા મેજિસ્ટ્રેટને દરખાસ્ત કરી હતી. જિલ્લા મેજિસ્ટ્રેટની મંજૂરી મળતા  પૂર્વ કચ્છ લોકલ ક્રાઈમ બ્રાન્ચ અને અંજાર પોલીસે સયુક્ત ઓપરેશન હાથ ધરી ત્રણેય આરોપીની અટકાયત કરી છે.  રિયા ગૌસ્વામી અને આરતી ગૌસ્વામીને અમદાવાદ મધ્યસ્થ જેલ અને તેના ભાઈ તેજસ ગૌસ્વામીને રાજકોટ મધ્યસ્થ જેલમાં ધકેલી દેવાયો છે.