Patan Bank Election Halted: પાટણ નાગરિક સહકારી બેંકની ડિરેક્ટરોની ચૂંટણીની મતગણતરી દરમિયાન મોડી રાત્રે ભારે હોબાળો અને અફરાતફરીનો માહોલ સર્જાયો હતો. કુલ 9,170 મતોમાંથી માત્ર 1,453 મતોની ગણતરી થયા બાદ અચાનક પ્રક્રિયા અટકાવી દેવામાં આવી હતી. આ અણધાર્યા નિર્ણયના વિરોધમાં પરિવર્તન પેનલના ઉમેદવારો અને સમર્થકોએ મતગણતરી કેન્દ્ર પર જ ઉગ્ર વિરોધ પ્રદર્શન શરૂ કરી દીધું હતું.
મહિલા સ્ટાફ ઘરે જતો રહેતા ગણતરી અટકી રવિવારે સાંજે 6 વાગ્યે ભારે સુરક્ષા વચ્ચે મતગણતરી શરૂ કરવામાં આવી હતી. મોડી રાત સુધી ચાલેલી આ પ્રક્રિયામાં જ્યારે 1,453 મતોની ગણતરી પૂર્ણ થઈ, ત્યારે એકાએક ગણતરી કરી રહેલો મહિલા શિક્ષકોનો સ્ટાફ ફરજ છોડીને જતો રહ્યો હતો. આ કારણે ચૂંટણી અધિકારીને તાત્કાલિક અસરથી મતગણતરી સ્થગિત કરવાની ફરજ પડી હતી. ચૂંટણી અધિકારીના જણાવ્યા અનુસાર, બેલેટ પેપર (મતપત્રકો) થી ગણતરી થતી હોવાથી પ્રક્રિયામાં ધારણા કરતાં વધુ સમય લાગી રહ્યો હતો. બીજી તરફ, ખરાબ અને વરસાદી વાતાવરણને કારણે મહિલા કર્મચારીઓ રાત્રે જ ઘરે રવાના થઈ ગયા હતા. અન્ય કર્મચારીઓએ પણ ફરજ ચાલુ રાખવાનો ઇનકાર કરી દીધો હતો. તંત્ર દ્વારા તાત્કાલિક ધોરણે વૈકલ્પિક માણસોની વ્યવસ્થા ન થઈ શકતા આખરે ગણતરી મોકૂફ રાખવી પડી હતી.
પોલીસ પ્રોટેક્શન વચ્ચે મતપેટીઓ સ્ટ્રોંગ રૂમમાં સીલ કરાઈ આ નિર્ણયની જાહેરાત થતાં જ પરિવર્તન પેનલના સભ્યો અત્યંત આક્રોશમાં આવી ગયા હતા. તેમણે મોડી રાત સુધી પ્રક્રિયા ચાલુ રાખવા માટે ચૂંટણી અધિકારી પર ભારે દબાણ કર્યું હતું. ઉમેદવારોના વિરોધને કારણે કેન્દ્ર પર તંગદિલી વધતાં વહીવટી તંત્ર દ્વારા તાત્કાલિક વધારાનો પોલીસ બંદોબસ્ત બોલાવી લેવાયો હતો. વધતા વિવાદ વચ્ચે, ચૂંટણી અધિકારીએ પોલીસ પ્રોટેક્શન હેઠળ તમામ મતપેટીઓને સુરક્ષિત રીતે સીલ કરીને સ્ટ્રોંગ રૂમમાં ખસેડી દીધી હતી. હાલ પૂરતી મતગણતરી અટકાવી દેવામાં આવી છે. ચૂંટણી અધિકારી હવે આ અંગે પ્રાંત અધિકારી સાથે ખાસ બેઠક યોજશે, ત્યારબાદ જ મતગણતરી ક્યારે પુનઃ શરૂ કરવી તેની નવી તારીખ અને સમય જાહેર કરાશે. ત્યાં સુધી બેંકની ચૂંટણીનું પરિણામ સંપૂર્ણપણે અધ્ધરતાલ બન્યું છે.

મહિલા સ્ટાફ ઘરે જતો રહેતાં મતગણતરી મોકૂફ, ઉમેદવારોનો ઉગ્ર વિરોધ

July 6, 2026 | 11:24 IST