કેગ રિપોર્ટથી લઈને ગેરકાયદે ખનન સુધીના મુદ્દાઓ ઉપર વિપક્ષના ધારાસભ્યો આક્રમક

સુરેશ વણોલ, ગાંધીનગર

ગુજરાત વિધાનસભા સત્રના છેલ્લાં દિવસે વિપક્ષના ધારાસભ્યોએ અનેક મુદ્દાઓને લઈ રાજ્ય સરકારને ઘેરી હતી. કેગ (CAG)ના રિપોર્ટને અંતિમ દિવસે રજૂ કરવા, ગેરકાયદે ખનન, વાયબ્રન્ટ સમિટનો ખર્ચ, જમીન મહેસૂલ સુધારા વિધેયક અને ધિરાણ સહાયમાં ગેરરીતિઓ મામલે વિપક્ષે સરકારને ઘેરી આકરા પ્રહાર કર્યા હતા. 

વિધાનસભા વિરોધના નેતા અમિત ચાવડાએ આક્ષેપ કર્યો હતો કે છેલ્લા કેટલાય વર્ષોથી સરકાર કેગના રિપોર્ટને અંતિમ દિવસે રજૂ કરે છે. તેથી સરકારના ગેરવહિવટ અંગે ચર્ચા ટળી શકે અને બેદરકારી  છુપાવી શકાય. વિપક્ષના ઉપનેતા શૈલેષ પરમારે સરકાર પર પ્રહાર કરતાં કહ્યું કે કેગનો રિપોર્ટ વહીવટમાં ગેરરીતિઓ, ભ્રષ્ટાચાર અને ખર્ચની વિગતો આપે છે. તેથી ભાજપ સરકારે વર્ષોથી અંતિમ દિવસે રિપોર્ટ મૂકવાની પરંપરા શરૂ કરી છે.

કોંગ્રેસના નેતાઓએ વાયબ્રન્ટ સમિટમાં થયેલા ખર્ચ અને પરિણામોને લઈ સરકારને સવાલ કર્યો હતો. અમિત ચાવડાએ ગૃહમાં પૂછ્યું કે છેલ્લી વાયબ્રન્ટ સમિટ ક્યારે યોજાઈ અને કેટલો ખર્ચ થયો? ઉદ્યોગ મંત્રીએ જવાબ આપતાં જણાવ્યું કે 10 થી 12 જાન્યુઆરી 2024 દરમિયાન યોજાયેલી સમિટમાં રૂપિયા 114.53 કરોડનો ખર્ચ થયો હતો અને 98,970 કંપનીઓ દ્વારા કુલ રૂપિયા 47,51,290 કરોડના MOU થયા હતા.

જ્યારે ભાજપના ધારાસભ્ય હાર્દિક પટેલે વિધાનસભામાં CSR ફંડ અંગે યોગ્ય જવાબ ન મળવાનો મુદ્દો ઉઠાવ્યો હતો. ઉદ્યોગ મંત્રીએ હાર્દિક પટેલના સૂચનને આવકાર્યુ હતુ. પરંતુ હાર્દિક પટેલે જણાવ્યું કે જિલ્લા સંકલન સમિતિની બેઠકમાં માહિતી માંગવા છતાં યોગ્ય માહિતી આપવામાં આવતી નથી અને ઘણી કંપનીઓ પોતાનાં NGO મારફતે CSR ફંડનો દુરુપયોગ કરી રહી છે.

સોમનાથના કોંગ્રેસના ધારાસભ્ય વિમલ ચુડાસમાએ તેમના વિસ્તારમાં ગેરકાયદે ખનનના પુરાવા રજૂ કર્યા હોવા છતાં કાર્યવાહી ન થતી હોવાનો આક્ષેપ કર્યો હતો. આ મુદ્દે ગૃહમાં ચર્ચા થઈ રહી હતી. તે દરમિયાન વિમલ ચુડાસમાને સાર્જન્ટો દ્વારા ગૃહમાંથી બહાર કાઢવામાં આવ્યા હતા. કોંગ્રેસે આ ઘટનાને લઈને સરકાર પર પ્રહાર કરતાં કહ્યું કે ગુજરાતમાં ગેરકાયદે ખનન બેફામ ચાલી રહ્યું છે અને પોલીસ-પ્રશાસન અટકાવવામાં નિષ્ફળ રહ્યું છે. વિમલ ચુડાસમાએ આક્ષેપ કર્યો કે ખનન માફિયાઓ ખુલ્લેઆમ કહી રહ્યા છે કે ‘ઉપર સુધી હપ્તા પહોંચે છે,’ અને સરકાર ખનન રોકવા માટે કોઈ પગલાં નથી ભરતી.

વિધાનસભામાં ગુજરાત જમીન મહેસૂલ સુધારા વિધેયક પર પણ ગરમા ગરમી રહી હતી. કોંગ્રેસના શૈલેષ પરમારે આક્ષેપ કર્યો કે NA (Non-Agricultural) પરમિશન માટેની ઓનલાઇન પ્રક્રિયા હોવા છતાં ભ્રષ્ટાચાર યથાવત છે. તેમણે કહ્યું કે સરકારી અધિકારીઓ બિલ ભરવાની મુદતમાં વધારો કરી રહ્યા છે અને NA કમિશન લાવવા છતાં ગેરરીતિઓ થઈ રહી છે. 

વિધાનસભા સત્રના છેલ્લા દિવસે કોંગ્રેસના ધારાસભ્ય ઇમરાન ખેડાવાલા વિધાનસભા ગૃહમાં મોડા પહોંચ્યા હતા. તેઓ સીધા જવાબ આપતાં ધારાસભ્ય અને અધ્યક્ષની વચ્ચેની જગ્યામાંથી પસાર થતાં સમગ્ર બાબત અધ્યક્ષને ધ્યાનમાં આવી હતી. તેથી અધ્યક્ષે તેમને ગૃહ બહાર જવા આદેશ આપ્યો હતો. 

કોંગ્રેસના ધારાસભ્યોએ અનેક મુદ્દે રાજ્ય સરકારને ઘેર્યા બાદ ગુજરાતમાં લાડલી બહેન યોજના લાગુ કરવા માગણી કરી હતી. શિક્ષણ રાજ્ય મંત્રી પ્રફુલ પાનશેરીયાએ સ્પષ્ટ જવાબ ન આપતા કોંગ્રેસે આ મુદ્દાને લઈ સરકાર સામે સવાલ ઉઠાવ્યા હતા. આ સમયે અધ્યક્ષે કહ્યું કે ગુજરાતમાં પહેલેથી જ ‘વ્હાલી દીકરી’ યોજના છે. જે લાડલી બહેન યોજના જેવી જ છે.

વિધાનસભાના અંતિમ દિવસે પરંપરાગત ભવાઈ કલાકારોને ગૃહમાં આમંત્રણ આપવામાં આવ્યુ હતુ. અંદાજે 30 જેટલા કલાકારો વિધાનસભા ગૃહની કાર્યવાહી જોવા માટે ઉપસ્થિત રહ્યા હતા. અંતિમ દિવસે વિપક્ષે સરકાર પર અનેક મુદ્દાઓને લઈ આકરા પ્રહારો કરતાં ભાજપ સરકાર અને વિપક્ષ વચ્ચેના સંવાદમાં અનેક રસપ્રદ ટકોર પણ સાંભળવા મળી હતી.