બે યુવતીના આપઘાત મામલે નવો વળાંક, સામે આવ્યું કારણ

સુરતના ડિંડોલી વિસ્તારમાં રહેતી બે આશાસ્પદ કોલેજિયન વિદ્યાર્થિનીઓના રહસ્યમય અને કરુણ મૃત્યુએ સમગ્ર રાજ્યને હચમચાવી દીધું છે. સણિયા કણદે ખાતે આવેલા નવનિર્મિત આત્મીય સંસ્કારધામ સ્વામિનારાયણ મંદિરના બાથરૂમમાંથી આ બંને સખીઓના મૃતદેહ મળી આવતા ભારે ચકચાર મચી ગઈ હતી. માત્ર 18 અને 20 વર્ષની વય ધરાવતી આ વિદ્યાર્થિનીઓએ જે રીતે મોતને વહાલું કર્યું, તેણે સમાજ અને વાલીઓ સામે ગંભીર પ્રશ્નો ઉભા કર્યા છે.

શું બની હતી સમગ્ર ઘટના?

મૃતક યુવતીઓમાં 18 વર્ષીય રોશની શરદભાઈ શિરશાઠ, જે ઉધનાની સિટીઝન કોલેજમાં બી.કોમ ફર્સ્ટ યરમાં હતી અને તેની મિત્ર 20 વર્ષીય જોસના અતુલભાઈ ચૌધરી, જે અઠવાગેટની વાડિયા વુમેન્સ કોલેજમાં બી.કોમ સેકન્ડ યરમાં અભ્યાસ કરતી હતી,નો સમાવેશ થાય છે. ગત 6 માર્ચની સવારે બંને કોલેજ જવાના બહાને પોતાના ઘરેથી નીકળી હતી. પરંતુ બપોર સુધી તેઓ ઘરે ન પહોંચતા પરિવારજનો ચિંતામાં મુકાયા હતા. પરિવારના ફોન કોલ્સ પર તેમણે "આવીએ છીએ" તેવો જવાબ આપ્યો હતો, પરંતુ બાદમાં તેમનો સંપર્ક તૂટી ગયો હતો.

પરિવારે ડીંડોલી પોલીસ મથકમાં ગુમ થયાની ફરિયાદ નોંધાવી હતી. પોલીસે ટેકનિકલ સર્વેલન્સ અને મોબાઈલ લોકેશનના આધારે તપાસ શરૂ કરતા સણિયા કણદેના આત્મીય સંસ્કારધામ મંદિર સુધી પહોંચી હતી, જ્યાં બંનેની મોપેડ પાર્ક કરેલી મળી આવી હતી. સીસીટીવી ફૂટેજમાં બંને યુવતીઓ બાથરૂમ તરફ જતી દેખાઈ હતી. પોલીસ અને પરિવારે દરવાજો તોડીને અંદર જોયું ત્યારે બંને યુવતીઓ બેભાન હાલતમાં હતી, રોશની પર જોસના ઢળેલી હતી અને તેમના મોઢામાંથી ફીણ નીકળતા હતા. બંનેને તાત્કાલિક હોસ્પિટલ ખસેડાઈ હતી, પરંતુ તબીબોએ તેમને મૃત જાહેર કરી હતી.

આત્મહત્યાની પદ્ધતિ: એનેસ્થેસિયાનો ઓવરડોઝ

સ્થળ પરથી પોલીસને ઈન્જેક્શન અને એનેસ્થેસિયાની દવાની ત્રણ બોટલો મળી આવી હતી. સ્મીમેર હોસ્પિટલના ડો. સંદીપ રાલોટીએ જણાવ્યું હતું કે, મૃતક પાસેથી 'અટ્રાક્યુરિયમ બેસીલેટ' નામનું એનેસ્થેસિયા ઈન્જેક્શન મળી આવ્યું છે, જેનો ઓવરડોઝ લેવાથી વ્યક્તિનું મૃત્યુ નિશ્ચિત છે. પ્રાથમિક તપાસમાં સામે આવ્યું છે કે બંને યુવતીઓએ પૂર્વ આયોજિત કાવતરા મુજબ ડાબા હાથમાં ઈન્જેક્શન લીધા હતા. તેમની કોલેજ બેગમાંથી કેલ્ક્યુલેટર, બુક્સ, મોબાઈલ અને ફોટોગ્રાફ્સ પણ મળી આવ્યા હતા, જે દર્શાવે છે કે તેઓ કોલેજ જઈને સીધા આ અંતિમ પગલા તરફ વળ્યા હતા.

ટેકનોલોજીનો દુરૂપયોગ અને ચોંકાવનારો ખુલાસો

પોલીસ તપાસમાં જે વિગતો સામે આવી છે તે અત્યંત ડરામણી છે. બંને યુવતીઓએ મોબાઈલમાં 'આપઘાત કેમ કરવો?' અને 'આપઘાત કરવાની રીત' જેવી બાબતો સર્ચ કરી હતી. આટલું જ નહીં, તેઓએ 'ચેટજીપીટી' (ChatGPT) જેવા આર્ટિફિશિયલ ઇન્ટેલિજન્સ પ્લેટફોર્મનો ઉપયોગ કરીને ઈન્જેક્શન કેવી રીતે લેવા તેની માહિતી મેળવી હતી. તેમની ગેલેરીમાંથી ઇન્જેક્શન મારવાની પદ્ધતિ સમજાવતા ફોટોગ્રાફ્સ પણ મળી આવ્યા છે. સ્પષ્ટ છે કે, 11 મહિના પહેલા બનેલી કોઈ ઘટનામાંથી શીખ મેળવીને તેમણે આ આત્યંતિક પગલું ભર્યું હતું.

ખુશીના વાતાવરણમાં છવાયેલો શોક

રોશની અને જોસનાની આ વિદાયથી પરિવારમાં માતમ છવાઈ ગયો છે. રોશનીના પિતાની એક દિવસ પહેલા જ મેરેજ એનિવર્સરી હતી અને પરિવાર ઉજવણીમાં મગ્ન હતો, જેની અંતિમ તસવીરો હવે પરિવાર માટે આજીવન વેદના બની ગઈ છે. આ ઘટનાએ વાલીઓ માટે લાલબત્તી સમાન સ્થિતિ પેદા કરી છે. શું બાળકો શું સર્ચ કરે છે અને કોની સાથે ફરે છે, તેના પર દેખરેખ રાખવી કેટલી અનિવાર્ય છે, તે આ કિસ્સો સાબિત કરે છે.

હાલમાં પોલીસે ફોરેન્સિક તપાસ માટે તમામ નમૂનાઓ મોકલી આપ્યા છે. સૌથી મોટો પ્રશ્ન એ છે કે, આ બે યુવતીઓને એનેસ્થેસિયા જેવી ઘાતક દવાઓ ક્યાંથી અને કોણે પૂરી પાડી? શું કોઈ મેડિકલ સ્ટોર સંચાલકની ભૂલ છે? પોલીસ હવે આ દવાના સોર્સ સુધી પહોંચવા માટે તપાસ તેજ કરી રહી છે. સુરતની આ ઘટનાએ યુવા પેઢીના માનસિક સ્વાસ્થ્ય અને ઇન્ટરનેટના જોખમી ઉપયોગ બાબતે મોટો પ્રશ્ન ઉભો કર્યો છે.